passages seront ouuerts, le negoce libre, le Roy
reuindra dans Paris, & en suitte vous ferez vne
paix generale, laquelle nous souhaittons auec la
mesme ambition que nous desirons viure souz les
loix de vostre Couronne. Ce iuste motif est cause
que nous vous auons député exprez c’est Ambassadeur,
pour vous supplier & conjurer au nom de
tous vos suiects de vostre Prouince, de vouloir
tousiours maintenir nos interests & de ne nous remettre
point souz la domination de l’Espagne, le
droict des gens, & le droict ciuil forceroient vostre
Maiesté à condescendre à nostre equitable desir,
quand mesme vostre singuliere bonté, n’auroit
pas dessein de nous l’accorder. Depuis le regne de
la Reine Blanche, les Catalans sont nés subjets du
Roy de France, si bien que nous n’auons point fait
de tort au Roy d’Espagne, quand nous auons secoüé
le joug de sa seruitude pour nous réünir à
vostre Empire, auec l’esperance que nous auons
que le Roy qui a mesure qu’il croistra en aage, accroistra
aussi nostre felicité, nous conseruera tousiours
comme ses tres-fidels subjets ; & aussi de
vostre Majesté à qui nous demandons pour toute
recompence de nos peines, la sortie de Mazarin
hors de la France.

FIN.