pour la conseruation de tout le Royaume.

Cette vnion que les trois Prouinces ont iuree,
inuite toutes les autres, & principalement le Parlement
de Paris à fait vne Vnion entiere de tous
les bons François pour exterminer ces monstres
qui ne sont plus infames par leurs vices, que redoutables
par leur puissance & authorité.

Nous protestons (disent-ils) non point comme
les Suisses qui ont recouuert leur liberté par vne
sanglante expedition de leur Noblesse, qui ont resistez
par la Ligue des treize Cantons contre les
forces de l’Empire, non point comme les Hollandois
qui ont formé des Estats que la Maison d’Austriche
a esté contrainte de declarer libres & Souuerains,
non point comme des Catalans & Napolitains
qui ont trouué du support parmy nous, apres
auoir voulu secoüer le joug d’Espagne à raison
des Impositions, qui ne sont rien en comparaison
des nostres. Moins encores comme l’Anglois dont
nous detestons la procedure, bien qu’il se soit trouué
mesme vn Roy qui a sait Ligue offensiue &
defensiue auec leur nouuelle Republique. Mais
nous protestons desirer viure & mourir comme
bons François pour le seruice du Roy, la conseruation
de son Estat, le soulagement de son peuple,
& la gloire de la Patrie.

FIN.