Saint-Julien,? [?] [1650], LE COVRRIER BVRLESQVE DE LA GVERRE DE PARIS, Enuoyé à Monseigneur le Prince de Condé, pour diuertir son Altesse durant sa prison. Ensemble tout ce qui se passa jusques au retour de Leurs Majestez. , françaisRéférence RIM : M0_814. Cote locale : A_9_9.
page précédent(e)

page suivant(e)

-- 6 --


Pour la Reine ou le Cardinal,
Prestò, vous voilà sus cheual,
Et tous deux qui ne voyant goutte
De sainct Germain prenez la routte.

 

 


Vnze heures de nuict enuiron,
Vray temps d’Amant, ou de larron,
Monsieur arriua chez Madame,
Et luy dit ; Dormez-vous ma femme ?
Ouy, respondit-elle, ie dors :
Prenez, luy dit-il, vostre corps,
Venez à sainct Germain en Laye.
A sainct Germain, luy dit-elle, aye,
Repettant trois fois sainct Germain ;
Mon cœur, ie partiray demain.
A quoy Monsieur fit repartie,
A demain donc soit la partie ;
Et vint dans le Palais Royal
Auec son confident loyal,
L’Abbé, digne de la Riuiere :
Palais, où l’aube la premiere
Ne treuuant plus leurs Majestez,
Ains seulement des chats restez.
Les vit prés sainct Germain en Laye
Auec Messieurs la Mesleraye,
Le Cardinal, le Chancelier,
Dont le dernier ne peut nier.
Qu’vn peu deuant l’Hostel de Luyne
Le garentit à sa ruïne.
Harcourt, Longueville, Conty,
Et tout le reste estoit party ;
Vne nuict que l’excez de boire
Nous donna presque à tous la foire,
(Car pour en parler franchement
Tout eut depuis le déuoyement,)
Nuict des Rois, mais sans Roy passée,
Nuict fatale, qui commencée
Par l’abondance d’vn festin
Nous laissa la faim sur sa fin.

 

 


Ces nouuelles ne furent sçeuës
Qu’apres les sept heures venuës :
Mais sept heures ayant sonné
Tout Paris fut bien estonné.
La Bourgeoise estoit soucieuse,
La Boulangere estoit joyeuse ;
Tous les artisans detestoient,
Les Escholiers se promettoient
D’auoir campo durant le siege,
Et qu’on fermeroit leur College :
Les Moines disoient chapelets,
L’habitant courroit au Palais,
Le plus zellé courroit aux armes,
Le Maltotier versoit des larmes :
Et tout regardoit à son pain,
Le soupesant auec la main.
C’estoit de Ianvier le sixiéme,
Si ce n’est assez du quantiesme,
C’estoit vn triste Mercredy
Que fut fait vn coup si hardy,
Et que du Parlement les membres
Dispersez par toutes les Chambres,
Dirent qu’il estoit à propos
D’en faire vn seul qui fust plus gros.
Où les Escheuins de la ville
Eurent audience ciuille ;
Les Gens du Roy pareillement :
En suitte on fit vn reglement
Qu’on feroit garde à chaque porte
Nuict & iour de la mesme sorte :
A cela nul ne contredit.
Et de plus, il fut interdit
A tous de tout sexe & tout âge
D’emporter armes ny bagage :
Le reste de ce reglement
Est au Iournal du Parlement.

 

6. Ianv.

 


Ce mesme iour vne charette,
Où fut treuuée vne cassette
Que reclama Monsieur Bonneau,
Tres-pleine d’argent bon & beau,
Parut au pleuple trop chargée,
Dont elle fut sort soulagée.
Et l’on traitta pareillement
Quelque autre charitablement.

 

 


Du depuis les belles Cohortes
De nos habitans fiers aux portes,
N’ont laissé passer vn festu
Sans luy demander, Où vas-tu ?

 

 


Lors fut vne lettre restée
Au Preuost des Marchands portée,
Qui s’adressoit à tout son corps ;
Lettre, où malgré de vains efforts,
On ne treuua raison aucune
Pour ce trou qu’on fit à la Lune.
Portant sur l’aduertissement
Qu’aucuns de nostre Parlement
Ont eu secrette intelligence
Auec les ennemis de France ;

page précédent(e)

page suivant(e)