de mille taxes, comme ils ont desia commancé,
& vostre opiniastreté n’aura seruy qu’à
allumer & nourrir vne guerre ciuile, qui rendra
la France la proye de ses ennemis, & changera vostre
ville la plus belle du monde & la plus heureuse,
en vn theatre d’horreur & de miseres.

Le Cardinal est vn meschant homme, parce
qu’il n’a pas voulu consentir à la destruction de la
Royauté, où aucuns du Parlement visent pour
gouuerner eux-mesmes : C’est vn perturbateur du
repos public, parce qu’il n’est pas tombé d’acord
de contenter Nouion, Blancmesnil, Viol, Broussel
& autres, ny les Princes dans ce qui leur estoit
venu à la teste de pretendre : Il trouble le Royaume,
luy qui a incessamment trauaillé & auec succez
à le conseruer en tranquilité pendant toute la
Regence & à la procurer au dehors. Il n’a ni luy ny
aucun de ses parens place, ny charge, ny gouuernement
ny establissement ; & c’est vn ambitieux,
vn interessé, vn perfide : Les autres pretendans
n’ont rien contribué comme luy aux conquestes
qui ont esté faites & ne laissent pas de demander
les meilleures places du Royaume, & des graces
qu’ils n’ont point meritées.

Le Cardinal s’entend auec les Espagnols pour
trahir l’Estat, pour les en rendre maistres : Il faut
qu’il soit bien habile, & qu’il les dupe bien finement,
de conseruer ainsi leurs bonnes graces lors
que le Royaume s’acroist toutes les années, de
places, & par fois de Prouinces entieres à leurs despens.