Anonyme [1649], FACTVM CONTENANT LES IVSTES Deffenses des Rentiers de l’Hostel de Ville de Paris: Et les moyens veritables de la seureté de leurs Rentes, & de leur conseruation. , françaisRéférence RIM : M0_1360. Cote locale : A_4_2.
page précédent(e)

page suivant(e)

-- 8 --

les plus fauorables qu’ils peussent iamais esperer. L’on soustient
au Preuost des Marchands, que luy mesme quand ils
auoient esté rendus, estoit demeuré d’accord, qu’il y auoit
de la rigueur, & de la dureté pour les Rentiers, qu’il ne failloit
point craindre les euenemens de la poursuitte, que les
Adiudicataires estoient trop interessez par les grands prests
qu’ils auoient faits au Roy pour abandonner leur ferme, mais
que quand cela arriueroit, il y auoit dequoy se payer dans
les effects, qu’ils n’auoient pû encore diuertir, de beaucoup
plus qu’ils n’estoient redeuables.

 

Pour la ferme, qu’ils l’auoient desia abandonnée, qu’il y
auoit des moyens plus aduantageux & plus vtiles pour la
faire subsister.

Mais bien que l’on ne deût pas mettre vne affaire tant de
fois terminée en deliberation, la deffense des Rentiers fut
encore trouuée si iuste, & les consequences dont le Preuost
des Marchands se voulut seruir pour la detruire, parurent si
foibles, & si peu considerables, que l’assemblée arresta que
les Declarations & les Arrests seroient executez.

L’on se saisit donc de la personne de quelques vns des Adiudicataires :
mais pour leurs biens ils en demeurent tousjours
les maistres. Le Preuost des Marchands n’enuoye
point dans leurs maisons, leur prison est mesme vn lieu de
delices pour eux, ils sont visités de tout le monde, ils donnent
toutes sortes d’aduis pour le diuertissement de leurs effects,
ils en reçoiuent de tous costez.

Les demandeurs voyans que cette sorte de prison estoit
vne illusion à la Iustice, ils presenterent leur Requeste à la
Chambre des Vacations, par laquelle ils demanderent deux
choses.

La premiere, que les Adjudicataires fussent transferez
dans la Conciergerie du Palais pour la seureté publique.

La seconde, que leur procez leur fust fait & parfait, à cause
du diuertissement de leurs effects, & de leur banqueroute
frauduleuse.

Les Adjudicataires presenterent aussi vne Requeste de
leur part, qui tendoit seulement à ce que les proprietaires des



page précédent(e)

page suivant(e)