Tous les obstacles qui se sont trouuez dans la paix, ont esté
vn effect continu de ce dessein, que Sauedra Plenipotentiaire
d’Espagne ne peût mesme celer en partant de l’assemblée,
quand il dit qu’il estoit bien aise de ne se pas trouuer à la signature
d’vne paix si desauantageuse pour son maistre, & qu’il n’y
auoit pas d’apparence qui peust durer. Ils y estoient venus plustost
pour nous des-vnir d’auec nos alliez, que pour s’vnir auec
nous : & nous auons eu plus de peine à nous defendre de tous
les artifices qu’ils employoient pour cela, que des raisons
qu’ils apportoient pour soustenir leur cause. Ils ont fait la
cour aux Suedois, & ont mesme composé * des liures, pour
monstrer l’ancienne alliance des Goths & des Espagnols. Et
ils ont tasché par toutes sortes de deferences indignes de flatter
les Hollandois, accordant d’abord la main & le tiltre
d’Excellence aux Deputez de ceux qu’ils traittoient auparauant
de rebelles : pource qu’ils voyoient que nous faisions
quelque difficulté de leur donner ces auantages, n’y en ayant
point encore eu d’exemple. La Reyne de Suede auec vne generosité
digne de la fille du grand Gustaue, na point biaisé
dans l’obseruation de l’ancienne alliance de sa Couronne auec
la nostre ; Et le grand Chancelier Oxcenstern a tousiours bien
reconnu le veritable interest de sa patrie, malgré toutes les
ruses malicieuses dont les Espagnols se sont seruis pour nous
broüiller auec luy, & qu’vn esprit moins esclairé que le sien
auroit eu bien de la peine à descouurir. La Lãdtgraue de Hesse,
l’heroïne de nostre siecle : quelques aduersitez dont elle ait
esté esprouuée, & quelques aduantages qu’on luy ait offerts,
n’a point balancé non plus. Et ce n’est pas merueille que les
finesses ayent mieux reüssi parmy des esprits plus grossiers,
plus susceptibles d’interest, & moins capables de la belle
gloire.

[illisible]

Le faste d’Espagne ne s’est point abbaissé inutilement. Elle
a crû ne pouuoir trop donner à la Hollande pour la payer d’vne
infidelite de cette consequence : Et la Hollande n’a pû se
defendre d’accepter vne paix particuliere à des conditions
qu’elle craignoit de ne pas obtenir, si elle la faisoit coniointement
auec nous. Dés qu’elle a eu trouué son compte, elle
nous a abandonnez là ; & ne s’est meslée de la mediation que