vos volontez, & cherissant ceux que vous cherissez,
ils en seront plus en honneur, plus en authorité &
plus en asseurance. Il n’y aura faction si forte & si
puissante, quelque dangereuse qu’elle puisse estre,
qui s’ose esleuer contre eux, quand vostre Maiesté les
tiendra sous vne protection si considerable que la vostre,
ny Monarque si grand & si redoutable en toute
l’Europe qui veüille entreprendre d’armer contre
vous, quand ils ne vous abandonneront iamais, &
qu’ils seront tousiours prests d’exposer leurs biens &
leurs vies pour vostre seruice. Ainsi vostre maiesté
leur seruira de Protecteur, contre leurs enuieux, &
ces illustres Heros vous seruiront de rempart contre
tous les plus grands de la terre. Voyez de grace aprés
celà SIRE, si toute la France n’est pas bien
obligée de vous remercier, comme elle fait par mon
entremise, de la deliurance de ces Princes, puis
qu’ils sont si necessaires à Vostre Maiesté, & puis
qu’ils doiuent faire le salut de toute cette Monarchie.

FIN.