par la retraitte du principal Plenipotentiaire d’Espagne
hors de Munster, où se faisoit l’Assemblée pour
la Paix generalle ; Nous auons resolu par l’aduis de la
Reyne Regente nostredite Dame & Mere, de vous
donner au plustost la satisfaction que vous nous auez
tesmoigné souhaitter auec tant de passion, en nous rendant
à Paris l’vn des iours de la sepmaine prochaine :
Dequoy nous auons bien voulu vous donner aduis par
aduance, comme de chose dont nous sçauons que vous
receurez beaucoup de joye ; Vous asseurant de nostre
bonne volonté entiere pour tout ce qui regarde le
repos, l’vtilité, & les aduantages de nostredite Ville. Et
la presente n’estant pour autre fin, Nous ne vous la ferons
plus longue. DONNÉE à Compiegne le vnziéme
Aoust mil six cens quarante neuf, Signé LOVIS, Et
plus bas, LE TELLIER.

Et sur la suscription est escript :

A Nos tres-chers & bien amez les Preuost
des Marchands & Escheuins de nostre
bonne Ville de Paris.