LE LIBELLE INTITVLÉ
L’ESPRIT DE PAIX
Semé dans les Ruës de Paris la nuict
du 25. de Iuin 1652.
IE ne suis ny Prince ny Mazarin, ie ne suis ny de
party, ny de cabale, ie ne suis qu’Esprit & ne fais
point de corps ; ie veux la Paix & ie deteste la Guerre ;
ie suis bon François & ie ne prends part qu’aux seuls
interests de ma Patrie.
PEVPLES.
Croyez cét auis aussi desinteressé que veritable ;
n’entrez point dans vne querelle, où vous ne pouuez
que perir. Elle a esté assez fatale à tout le Royaume
pour vous en détourner, par le souuenir des choses
passées & par l’exemple des malheureux. Vous
voyez tout l’Estat en combustion, les Prouinces desolées,
les Peuples fugitifs, les Loix mortes, le commerce
rompu par tout où l’animosité des partis a porté
ses ressentimens, il n’y a liberté de respirer que dans
les lieux où la Guerre n’a point encore esté, & dans
ces climats heureux que les factieux n’ont pû seduire
par leur intrigues, ny tirer par leurs promesses de leur
deuoir, pour les jetter dans le desordre.
Quel interest auez-vous dans celuy des Princes ?
combatent-ils pour vous ? sont-ils vnis auec vous ? ne