Anonyme [1649], LA IVSTIFICATION DV PARLEMENT ET DE LA VILLE DE PARIS DANS LA PRISE DES ARMES ; CONTRE L’OPPRESSION & Tyrannie du Cardinal Mazarin. , françaisRéférence RIM : M0_1796. Cote locale : C_5_73.
page précédent(e)

page suivant(e)

-- 4 --

Pour iustifier de la raison de cette defence, il faut se remettre
en memoire, que dans le commencement de la Monarchie
Françoise & premiere race de nos Roys : Et c’est
vne des Loix fondamentales du Royaume, qu’ils n’ont pû
prendre aucune resolution importante à l’Estat sans assembler
les plus notables Personnages du Royaume, laquelle
assemblée a eu dés ce temps le nom de Parlement ; Mais comme
dans la troisiesme race le Royaume a pris vne meilleure
face, & a eu vne plus grande estenduë, les affaires croissans
& estant necessaire de pouruoir aux plus frequentes plaintes
& differends des François : Les Roys ont tenu aupres d’eux
certain nombre des plus considerables du Royaume pour
rendre la Iustice à leurs Subjets, lequel a retenu le nom de
Parlement, & a fait sa residence aupres de leurs personnes
iusques au regne de Louys dixiesme, dit Hutin, qui establit
& institua le Siege du Parlement de France & Cour des
Pairs en la Ville de Paris.

Auparauant cette institution & depuis iusques au regne
du deffunct Roy Louys XIII. le Parlement suiuant les Loix
iustes & legitimes de son establissement, a tousiours esté en
possession de prendre connoissance de tous les Edicts, Declarations,
Ordonnances & volontez de nos Roys, tant
pour le regard de la Iustice que des Armes & Finances, pour
les accepter, refuser, ou receuoir, auec telles conditions &
moderations qu’il a iugé raisonnables, principalement dans
le temps de la minorité de nos Roys, pendant laquelle les
desordres sont d’ordinaire tousiours plus grãds : Et les Roys
n’ont point entrepris de faire aucune leuée de deniers sur
leurs Subjets, d’establir aucun nouueau droict, ny rien innouer,
qu’en vertu d’Edicts & Declarations deuëment verifiez
dans les Cours souueraines de son Royaume, ausquels elles
ont tousiours esté adressées pour en connoistre la Iustice. De
sorte qu’il doit demeurer pour vne verité constante, qu’aucun
nouueau establissement ne peut estre valablement faict
qu’en vertu d’Edicts ou Declarations receuës & approuuées
par les Compagnies souueraines du Royaume. La
raison de cette Loy a esté entr’autres, pour empescher
que les Fauoris de nos Roys, portez par leur passion &
interest particulier, ou par vn mauuais conseil, ne changent



page précédent(e)

page suivant(e)