R. Oüy, mais non pas en la maniere que l’entend
la Politique de Machiauel ; mais en celle que nous apprenons
de l’Euangile : c’est à dire qu’exerçant la iustice
de Dieu sur les hommes, il a droit de leur oster la vie,
ou de la leur conseruer, cõformément aux Loix de Dieu,
& non autrement ; ou à celles qu’il a establies & qui ne
derogent point à celles de Dieu, s’il ne veut pecher. Car
c’est vne chose qu’il faut bien obseruer, ce qui sert comme
de fõdement aux responses qu’on doit faire à toutes
les questions qui se peuuent proposer en ces matieres.
Que les Roys ne sont pas d’eux mesmes absolus & independants ?
Qu’il n’y a que Dieu qui possede cette perfection
par soy-mesme & de soy-mesme, & qu’ils dependent
absolumẽt de luy, & ne peuuent rien au delà de ses
loix, ny de ses ordonnances, comme les Gouuerneurs
des Prouinces sont obligez de suiure les ordres & les
commandements des Roys. Et c’est pour cette raison
que dans l’Ancien Testamẽt il estoit ordõné au Roy de
prendre le liure de la Loy de la main du Prestre : & que
dans celuy de la Nouuelle alliance, on luy fait baiser celuy
de l’Euangile, lors qu’il assiste au sacrifice auguste du
Corps de Iesus Christ, pour luy monstrer l’obligation
qu’il a de suiure les ordres de Dieu & de l’Euangile, & la
protestation continuelle qu’il fait de les obseruer. Ainsi
le droict de vie & de mort qu’a le Souuerain sur ses subjets,
doit estre reglé par ces regles diuines & infaillibles,
lors qu’il s’agist ou de tirer vengeance des crimes, ou de
pardonner aux coulpables. Et c’est sur ce fondemẽt que
Sainct Paul les propose comme redoutables, n’ayant pas
inutilemẽt le glaiue à la main ; & que le Chancelier refuse