Anonyme [1649], LE PROCEZ CRIMINEL DV CARDINAL MAZARIN ENVOYÉ D’ESPAGNE. AVEC LA DENONCIATION de l’Empereur. , françaisRéférence RIM : M0_2885. Cote locale : C_6_68.
Section précédent(e)

LE
PROCEZ
CRIMINEL
DV
CARDINAL MAZARIN
ENVOYÉ D’ESPAGNE.

AVEC LA DENONCIATION
de l’Empereur.

A PARIS,
Chez PIERRE VARIQVET, ruë S. Iean de Latran,
deuant le College Royal.

M. DC. XLIX.

AVEC PERMISSION.

-- 2 --

-- 3 --

LE PROCEZ CRIMINEL
du Cardinal Mazarin enuoyé d’Espagne,
auec la Denonciation
de l’Empereur.

GILLES Figule, l’vn des fameux Philosophes
de l’Antiquité, disoit qu’entre
deux signes du Zodiaque, qui sont le
Lion & les Balances, y a vne Vierge qui
s’appelle Iustice, laquelle demeura entre les hommes
au temps passé, & apres qu’elle fut bien ennuyée
d’eux, monta és Cieux. Ce Philosophe voulut
donner à entendre, que la Iustice est vne vertu
tant supreme & excellente, qu’elle surpassa la capacité
humaine, puis qu’elle voulut faire sa demeure
és hauts Cieux, ne trouuant personne (en Italie)
qui la voulust receuoir dans sa maison.

Mais depuis ce temps là, elle est redescenduë dans
la France, specialement dans ce grand Senat de cette
superbe Ville, où elle a trouué des Illustres Senateurs
beneuoles, pitoyables, patiens, zelateurs de
vertu, veritables & equitables ; la Iustice demeure
parmy eux, & auec vn tel éclat, qu’elle donne de l’admiration
mesme aux Estrangers.

Il ne faut s’étonner si elle ne trouua aucun siege
en cette fatale Italie, veu que c’est le lieu où a tousiours
residé la tyrannie, & d’où naissent les plus inhumains,

-- 4 --

desquels la rage paroist par tout, aussi bien
que l’vsurpation ; ils se rendent opulens par le butin
qu’ils font de Royaume en Royaume, il ne faut que
faire inspection sur Mazarin, qui a despoüillé les
Champs Iberiens de tous leurs fruicts, aussi bien que
ceux de la France : C’est ce qui a obligé l’Espagne à
luy faire instruire son procez, & l’enuoyer en France,
afin qu’estant veu & ioinct, on puisse consequemment
tirer les conclusions, & l’admettre à tel-
peine, que ces crimes & vexations l’exigent.

 

En premier chef, est produit la Denonciation de
l’Empereur, par laquelle il declare que Mazarin est
vn proditeur & vn homme sans foy, qui a violé les
protestation qu’il luy auoit si solemnellement faites,
& choqué diuerses fois son authorité Imperiale,
& attenté sur ses Suiets, & rauit leurs biens, pour
reparation dequoy il demande Iustice.

Pour le Roy d’Espagne, il produit & met en auant
plusieurs pieces iustificatiues tendantes à la
conuiction Mazarine, par l’exploict de ces fins. Il
l’accuse de perturbation, & d’estre le seul sedieux qui
a troublé son Estat, & ruiné sa Monarchie par les
troubles qu’il y a semé.

En suite dequoy, il monstre que Mazarin est naturel
Espagnol, comme ayant pris naissance sur son
territoire, & partant qu’il deuoit tous les hommages
respectueux, & les seruices deus à sa Couronne, par
le droict de vasselage ; neantmoins qu’en diuerses
rencontres & occasions il auoit contreuenu, & laschement
violé les Loix de sa Monarchie, & partant

-- 5 --

qu’il merite d’estre chastié selon les rigueurs d’icelles.

 

Apres quoy est prouué dans vne autre piece, que
Mazarin a attrapé par ses adresses & inuentions de
grandes sommes de ses vassaux, & qui les a trahy, auec
plusieurs concussions & méfais par luy commis
auant que venir en France.

En vne autre piece, est nettement representé le
droict positif & dispenses Papales, où Mazarin a
contreuenu, & rendu complices de plusieurs cas.

Qu’il a esté le scandal de tout le Sainct Clergé Apostolique,
& par luy declaré excommunié, qui a
voulu destruire le droict Papal, & abroger ses Constitutions,
fait des factions sur son Domaine, & deceu
plusieurs foibles esprits, qui se sont facilement
laissé surprendre à ses promesses, lesquels par son
mauuais conseil, ont fait des extorsions indicibles.

Mais en la principale piece, & qui est la maieure,
il est cotté expressément, que Mazarin est l’Autheur
du sang qui a esté versé dans son Royaume par la
mort de plus de deux millions d’hommes parmy lesquels
s’est rencontré plusieurs des plus Grands de cét
Estat Espagnol.

Que le mesme Mazarin par ses intelligences secrettes
qu’il a eu auec les Napolitains, il a fait sousleuer
cette Metropolitaine, & fait rebeller contre
son Roy, qui auroit perdu la gloire du triomphe,
n’eust esté la force de ses armes iointes à ses promesses.

Il y a encore plusieurs autres pieces, dont ie serois

-- 6 --

trop long à rapporter, où est veu manifestement
les crimes perpetrez par cette ame Mazarine,
toutes lesquelles pieces concluent à la perte de ce
Tyran, & qui ont esté enuoyées à Paris, pour estre
iointes auec le procez qui luy sera fait, afin que par
icelles, les luges puissent prononcer tel Arrest de
mort contre luy, qu’ils verront bon estre.

 

Neantmoins ie n’obmettray encore d’inserer ce
qui est cotté dans la penultiéme piece, où est remarqué
vne prodition tres noire par vn Contract testifié
par faux tesmoins, remply d’impostures & calomnies
qui tendoient à la perte d’vn Comte & d’vn
Marquis, des Suiets de cette Monarchie Espagnole,
lesquels il accusoit d’intelligence auec quelque Prince
Estranger, & d’auoir par poison fait mourir plusieurs
personnes aussi considerables par leur valeur,
que par leur illustre naissance : toutes lesquelles procedures
ont esté suiuies d’empoisonnement, & consequemment
de grands procez, qui ont ruiné plusieurs
familles, reduites à de grandes extremitez, qui
demandent Iustice ; & partant que Mazarin doit subir
la peine, & son procez fait & parfait : sa Sentence
prononcée, pour estre en consequence supplicié
au lieu patibulaire, destiné aux criminels, perturbateurs
& faussaires.

Ces faits sont assez conneus, il ne sera pas difficile
d’en tirer les conclusions & consequences. Il a butiné
toute la terre, & partant c’est vn Predateur : Il
a mesme extorqué les biens & reuenu des Eglises,
c’est pourquoy à iuste cause on le peut appeller Profane

-- 7 --

& Sacrilege : il a diuerty le Seruice Diuin, donc
c’est vn impie : il est complice de l’effusion vniuerselle
du sang humain, partant c’est vn meurtrier &
homicide : il est cause que les Religieuses ont esté
violées, & pour cét effet il est inceste : Le bruslement
des Villes & petits lieux, le font passer pour incendiaire :
Les Guerres qu’il a suscitez, & les amitiez
des deux Couronnes qu’il a desunies, le rendent seditieux :
Enfin il est paruenu dans le cohorte & comble
de tous les crimes, dont il est coupable.

 

Grand Dieu, autrefois vous auez fait paroistre
les effects de vostre Iustice, pour punir quelque peché
particulier, & neantmoins vostre bonté paroist
si extréme, que vous soufrez que ce Tyran accumule
& entasse les pechez, comme il a fait l’or & l’argent
de la France.

Non, non, Mazarin, ne fais pas cette iniure à
Dieu, que de croire qu’il laisse tes forfaits à impunir :
tu sçais quelle punition il exigea d’Herode qui
t’a precedé, ayant plus fait mourir d’innocens que
luy, tu ne dois pas esperer moindre chastiment. Si
autrefois il a puny plusieurs, qui sembloient innocens
en apparence ; Toy qui est conneu pour le plus
cruel & barbare, pourquoy demeureras-tu à impunir ?
Tous tes crimes ne crient-ils pas vengeance deuant
Dieu ? Ne sçais-tu pas bien que toutes tes plus
noires pensées luy sont manifestes ?

Souuiens-toy donc que tu ressentiras les traits de
sa Iustice, & dans le temps & dans l’éternité : Ne
vois tu pas que tu ne peux éuiter le sort de ta perte,

-- 8 --

tu n’as aucun asile ny retraite. L’Espagne t’a en horreur,
ta Patrie te deteste, la France n’a qu’imprecations
& indignitez, & qui se promet que par ta perte,
elle sera affranchie de tous ses maux ; mesmes les
Astrologues remarquent dans leur Art, que les Astres
n’ont plus que de mauuaises influences pour
toy : Bref, toutes les creatures te sont opposées, qui
est vn effect du Ciel iustement irrité, qui veut se
seruir des creatures, que tu as si tyranniquement
mal-traittées, afin de t’absorber dans vne fondriere,
d’où tu ne sortiras iamais.

 

FIN.

Section précédent(e)


Anonyme [1649], LE PROCEZ CRIMINEL DV CARDINAL MAZARIN ENVOYÉ D’ESPAGNE. AVEC LA DENONCIATION de l’Empereur. , françaisRéférence RIM : M0_2885. Cote locale : C_6_68.