L’ASTROLOGVE FRANCOIS,
predisant les éuenemens singuliers & vniuersels
des Estats & Empires du monde.

Selon le changement des Globes Celestes.

L’EXPERIENCE iournaliere nous faict
voir que les Anciens Philosophes ont eu
bonne grace de dire que les Causes superieures
gouuernent les inferieures ; & que ce n’est pas sans
raison qu’vn de nos Poëtes a dit,Astra regunt homines,
sed Deus Astra regit. Dans mon Astrologie
ie n’entends point parler des Euenemens des
Causes Vegetatiues & Sensitiues, ny aussi des
Corps simples ; Si vous exceptez le Ciel & la Terre,
seulement ie desire monstrer, le bon-heur &
le peril des Villes, des Estats, des Royaumes &
Empires, en descouurent le changement de la
bonne & mauuaise fortune des plus grands hommes
de l’Vniuers. Pour ce suject ie suiuray la methode
des Anciens Geographes, en diuisant le
Globe Terrestre en quatre parties. C’est à sçauoir,
en Europe, Asie, Affrique, & les deux Ameriques.
En premier lieu, comme l’Europe est
la plus noble partie de l’Vniuers, dans laquelle
mesme nous habitons, il ne sera pas hors de propos

-- 4 --

de commencer par elle ; Vous remarquerez
donc que la terre dont la longueur est de trois
mille trois cens cinquante lieuës, Sa lergeur de
deux mille cent cinquante, & que le Globe de
l’eau & de la terre n’a que neuf mille lieuë de tour,
lequel Globe reçoit non seulement les influences
des quarante-huict constellations Celestes : mais
encore tous les Estres qui sont produits, où qui y
viuent, si vous exceptez l’Ame raisonnable, laquelle
estant immaterielle est incapable de souffrir
des passions estrangeres. L’Europe est vne des
parties de ce Globe, qui contient les Estats & les
terres du Pape, du Roy de France, de l’Empereur,
du Roy d’Espagne, des Ducs de Florence,
de Venise, de Sennes & de Gennes. Comme aussi
des Rois d’Angleterre, de Hongrie, de Boësme,
du Portuguez, de Pologne & de Dannemarc,
ces puissances suprémes ont sur leur domination
plusieurs grands Personnages. Ie preuois par la
Conionction de Mars auecque Venus au second
degré du Belier, que Bellonne apres quelques assauts
qu’elle aura donné, sera contrainte de faire
filer son bagage ailleurs, si elle n’est arrestée en
Angleterre, & chez les Venitiens, par la froide
mine de Mercure, plusieurs grands Personnages
seront accusez de Peculat & Concussions & quelques
vns mourront par poisons.

 

Ie ne puis bien reprimer mes pensées ny mes

-- 5 --

conceptions, sans parler confusement & ensemblement
des trois parties qui restent, par ce qu’elles
font dominées par quatre grande Puissances,
qui sont, le grand Seigneur, le grand Sophy de
Perse, le grand Tartare & le Prestre Iean. Ie ne
laisseray pas de parler le plus distinctement que ie
pourray, Si bien que vous sçauray que l’Asie est la
seconde partie du monde, enuironnée presque de
toutes pars de la mer Occeanne, dont la longueur
depuis l’Orient à l’Occident est de dix-sept cens
cinquante lieuës, & ce depuis la mer Noire iusques
à l’Occean de Lachine Orientale, & sa largeur est
de quinze cens cinquante lieuës, en suitte suit l’Affrique,
qui seroit Isle si vn istiner estoit couppé, sa
longueur est en droite ligne de 1650. lieuës, &
sa largeur qui est depuis le Cap de bonne Esperance,
iusques à la Mer Mediterannée, contient
seize cens soixante quinze lieuës, ainsi elle est plus
large que longue : En dernier lieu est l’Amerique,
qui est neant moins la plus grande de toutes, & s’estend
du Septentrion vers le Midy, & contient
deux Prouinces seulement, qui sont le Perou &
Mexicque joints ensemble par viristine de terre
qui a quelques vingt lieuës de larges, ces deux
tant renommées Prouinces pour l’or & l’argent,
& autres choses precieuses qu’on en apporte en
nostre Europe, ont de longueur de l’Occident à
l’Orient : Sçauoir celle de Mexicque deux mille

-- 6 --

neuf cens lieuës, & de l’argueur quinze cẽs lieuës,
la longueur du Perou, il y a d’vne mer à l’autre encore
quinze cens lieuës, & de largeur seize cens
lieuës : de sorte que supputant toutes les terres qui
sont és Indes, & qui appartiennent au Roy d’Espagne,
sans les Isles que i’ay ci-dessus nommé, & toutes
les autres Isles qu’il possede en l’vne & l’autre
mer : On verra qu’à bon droict ie soustiens qu’il est
le plus grand terrien du monde, dont le centre &
le milieu, est la Ville de Ierusalem, où toutes les
nuicts selon le fidel rapport des pelerins, paroist à
la minuit vn comette d’vne énorme grandeur, qui
semble auoir la teste d’vn Elephant, & la queuë
d’vn Dragon ; ce metheore ne disparoist point, que
lors que l’Aurore commence à poindre, alors il
court plus viste en la plus haute region de l’air,
qu’vn Tigre desesperé parmy nos campagnes. Ce
prodige nous tesmoigne assez que la plus grand
part des peuples doiuent estre chastiés par le fleau
de la guerre les vns apres les autres, & principalement
les Infidelles & Idolatres ; car ce n’est pas
sans mistere que ce signe espouuantable paroist
dans le milieu des Nations du monde selon Ezechiel,
pour nous apprendre que Dieu les veut toutes
chastier, & par ce que selon Dauid le salut des
hommes fut fait au milieu de la terre, qui est Hierusalem,
il est aussi expedient que le signal de sa
colere paroisse au mesme endroit où il a prodigué

-- 7 --

sa charité. Dauantage les abysmes des feux sousterains,
les tremblemens de terre & la cheute
des montagnes, confirment les pronostications de
mon Astrologie, tirées des plus grands Autheurs
qui par les Phenomenes ou apparitions des Astres
qui se selebrent en ces quartiers m’aprenennent
que la guerre doit quitter entierement l’Europe,
pour ruiner entierement les trois autres parties,
l’Iris & la Colombe qui estoient familieres à ces
peuples ont paru sur nostre chef, quittant les
estrangeres Nations, pour y laisser gronder le
tonnerre, & croasser les Corbeaux, quand à la
France n’a plus à craindre aucune reuolution, le
benin Iupiter qui la regarde d’vn œil amoureux,
la fauorisera tousiours de ses plus douces inuences,
s’il y arriue quelque changement, ce sera
dans les charges de la guerre, à cause que Mars est
le Seigneur de nostre Horison, l’Italie, l’Allemagne,
l’Espagne n’auront point d’autres allarmes,
que celles que le grand Turc leur causera du costé
de la Hongrie, les autres Estats de l’Europe à cause
que Lucine regarde de mauuais œil Saturne qui
les domine, viuront plustost en troubles qu’en
tranquilité, & leur malheur seroit plus grand si le
Ciel ne s’armoit d’vne foudre pour donner de la
terreur à leur seine, le triple regard de Mars auec
Mercure du coste de l’Orient, me faict conclurre
que ces trois grandes parties du monde entreront

-- 8 --

en si grande dissention que les peuples dresseront
des armées à celles de Circez, & l’Amerique
estant secondée par plusieurs autres troupes de
l’Espagne, comme aussi le Prestre Iean par les armées
de France, sans doute, que le grand Seigneur
le Tartare & le grand Sophy donneront du nez
par terre. Ce qui a esté declaré par les Centuries
de Nostra-damus, & qui est confirmé par
cette sentence commune que les Dieux ont
les pieds de laine & les bras de fer, sa diuine
bonté ayant iusques icy attendu ces Infidelles
à repentance en punition de leur obstination,
à armer son bras d’vne verge de fer pour
les punir ; l’Europe n’a rien plus à craindre ny redouter,
la fin de ses malheurs sera vn commencement
d’vne prosperité durable, les heureuses Planettes
qui ont reluy à la natiuité du Roy, & dans la
naissance de Monseigneur le Duc d’Anjou, nous
promettent faire couler nos iours dãs les delices,
parce que ces bons Astres Iupiter & le Soleil, qui
ont dominé au poinct de leur apparition, rendront
nos ieunes Princes en humeurs & mœurs si agreables,
que le Ciel en estant amoureux aymera par
consequent leurs subjets.

 

FIN.