Anonyme [1649], L’HOROSCOPE DE IVLES MAZARIN, Naisuement & fidellement expliquée de Centuries de M. Nostradamus, tant du passé, present qu’aduenir. Ensemble des Epithetes & Thesme Celeste sur toutes les Lettres de son Nom & sur-nom. LE POVRTRAICT DE SON PERE. , françaisRéférence RIM : M0_1665. Cote locale : A_3_82.
SubSect précédent(e)

L’HOROSCOPE
DE
IVLES MAZARIN,
Extraicte & naifuement expliquee des Centuries
de M. Nostradamus.

QVOY que l’espée n’empesche la lecture
des Liures traictans des sciences
Astrologiques, l’occurrence du temps
present m’a faict venir en memoire d’auoir
leu autresfois vn liure imprimé à
Lyon, intitulé les Centuries de M. Nostradamus, la
curiosité me fit entrer dans mon estude afin d’y parcourir
ce liure pour voir si ie n’y trouuerois point quelque
chose de remarque qui se peut adopter & approprier
aux affaires du temps, lequel ayant attentiuement leu
& releu, enfin i’y trouuay deux Centuries principalles
à ce subject, qui predisent naifuement & entierement
l’Horoscope de Iules Mazarin indigne Cardinal, comme
pareillement les causes des troubles, dans lesquels
la France se trouue maintenant embarassée, non que
ie vueille attribuer iceux troubles prouenir de la fatalité

-- 4 --

des Astres, mais seulement de la puissance du Createur.

 

L’explication de ces deux Centuries est si claire &
si facile, que les moins sçauans n’auront point de peine
à les resoudre n’y à les expliquer, neantmoings pour
contenter vn chacun, i’en donneray l’explication succinte
& abregée telle que s’ensuit.

CENTVRIE QVARANTE-DEVX.

 


Quant Innocent tiendra le lieu de Pierre,
Le Nirazam Cicilien (se verra
En grands honneurs) mais apres il cherra,
Dans le bourbier d’vne Ciuille guerre.

 

Pour la parfaite intelligence de cette Centurie, il est
necessaire d’expliquer chaque vers en son particulier.

Quant Innocent tiendra le lieu de Pierre,

Ce premier vers nous signifie le temps present désnotté
par le Pontificat du Pape Innocent X. à present
seant au Siege Apostolique, duquel S. Pierre a esté le
premier.

Le Nirazam Cicilien...

Ce deuxiesme vers nous donne la cognoissance du
surnom & du pays du Iules, car tournant à rebours ce
mot de Nirazam, vous trouuerez Mazarin sans addition
ny diminution d’aucune lettre, Cicilien n’a besoin
d’explication, nous apprenant le lieu de sa naissance.

-- 5 --

(se verra
En grands honneurs)

Les mots qui sont enclos dans cette parenthese, donnent
à cognoistre la puissance qu’il a euë iusques à present
auprés du Roy, de toute la Cour, & pareillement
sur tout le Royaume, ayant tout boulleuersé à sa faitaisie
pour regir tout auec plus d’authorité.

Mais apres il cherra
dans le bourbier d’vne Ciuille guerre.

La conclusion de cette Centurie nous faict cognoistre
sa cheute toute éuidente par la guerre qu’il a luy
mesme allumée parmy le Peuple François, mais Dieu
permettra enfin qu’il demeurera dans le bourbier, sans
s’en pouuoir retirer qu’à sa honte & confusion, à la
gloire du Roy, à l’honneur du Parlement, & au profit
de toute la France.

Voilà donc l’explication entiere de la premiere Centurie,
reste maintenant à expliquer & resoudre celle
d’apres qui commence.

Lutece en Mars, Senateurs en credit.

Dautant que plusieurs qui ignorent le Latin ne sçauroient
qu’entendre par ce mot de Lutece, il est besoin
qu’ils sçachent que c’est l’ancien nom de Paris, que l’on
nomme encore Lutetia en Latin, qui signifie lieu bourbeux,
où est scituée cette superbe Cité, où les plus hauts
& plus illustres Senateurs, qui sont nos Seigneurs du
Parlement, font admirer leur sage conduitte en des affaires
si pressantes. Ce mot de Mars signifiant les armes

-- 6 --

que les habitans de Paris ont prises contre le party
d’vn si pernicieux Ministre.

 

Par vne nuict Gaule sera troublée.

Ce fut par vne nuict veritablement que la France a
esté troublée, puisque celle de la veille des Roys Iules
Mazarin enleua le Roy hors de son Palais ordinaire,
sans seulement en donner la cognoissance à ceux qui
doiuent estre tousiours auprés de sa personne.

 


Du grand Crœsus l’Horoscope predit,
Par Saturnus sa puissance exillée.

 

Il peut à bon droit estre appellé Crœsus, puis que
par ses violences a extorqué & enuahy toutes les richesses
du Royaume, en ayant fait à son propre ; mais estant
menassé par Saturne, qui suiuant les Philosophes Cabalistes,
suiuant l’Analogie qu’ils font des sept Planettes
aux sept metaux, appellant l’or Soleil, l’argent Lune,
le cuiure Venus, l’estain Iupiter, le fer Mars, l’argent-vif
> Mercure, & le plomb Saturne, il se versa enfin que
le plomb pris pour Saturne, poussé par la violence &
force du feu, rendra sa puissance exillée, chassant au
loin celuy qui par Arrest du Parlement a esté declaré
perturbateur de l’Estat & du repos du peuple, qui ne
respire qu’à viure paisiblement sous l’authorité du Roy,
suiuant les Loix diuines & humaines, bannissant de
cét Estat la cause des maux & des miseres qu’il nous a
fait souffrir.

Voila l’explication de la derniere Centurie, laquelle
iointe au sens de la premiere, vous y trouuerez l’euenement
des affaires de ce temps.

-- 7 --

Les Arrests que le premier & le plus auguste Parlement
de France vient de decerner contre ledit Mazarin,
& les peuples qu’il a ruinez qui marchent tous vnanimément
à sa perte, tant de sa vie que de ses biens qui
vont estre mis à lancan, preuuent hautement la verité
qui est contenuë & cachée agreablement dans ce peu
que vous pouuez lire. Cependant il faut que l’on aduoüe
qu’il n’y eut iamais de verité qui fut plus funeste
à ce Royaume ; & il est tres-certain que sa vie est en
danger euident, puis qu’il n’y a aucun lieu sur la terre
où il puisse trouuer quelque retraite. Si les hommes
ne se vangent pas de ses violences, il faut croire que
Dieu se seruira des demons pour en estre les bourreaux.
Les enfans dans le berceau, demandent au Ciel
qu’il vange leur innocence que cet oppresseur,
comme vn nouuel Herode, veut exposer à toutes
sortes de barbaries. Pour moy i’ay tousiours creu
que ce perfide n’auoit rien de l’humain que l’apparence,
& que c’est vn loup deuorant couuert de la
peau d’vne brebis, mais ie croy que ce loup tombera
à la fin en la puissance de tous les honnestes gens qui
n’épargneront point cet infame. Toutes les influences,
& toutes les apparences humaines nous font esperer
vne meilleur conioncture d’affaires par le changement
qui doit arriuer en peu de iours, Ce sont les vœux
continuels que l’on fait sans sesse à Dieu, & ie pense
qu’il les exaura, Cette priere est trop iuste pour n’estre
pas escouté du Ciel, de qui nous attendons des prosperitez
que nous auons perdues en la mort de nostre dernier
Monarque, dont la pieté reuit en son successeur.
Nous en auons des apparances, & tout le monde fait

-- 8 --

des prieres à Dieu afin qu’il le conserue. Ce ieune Prince
sera vn modelle de vertus pour tous les autres, &
Dieu benira sa pieté, qui sera l’exemple qu’il faudra
suiure pour bien faire, il ternira la gloire des Heros que
les Histoires nous vantent, & c’est que nous vous promettons
auec iuste raison par toutes les marques qu’il
nous donne de mille belle qualitez qu’il possede.

 

Addition des quatre vers de la Centurie
43. cy-dessus expliquée.

 


Lutece en Mars, Senateurs en credit,
Par vne nuict Gaule sera troublée,
Du grand Crœsus l’Horoscope predit,
Par Saturnus, sa puissance exillée.

 

SubSect précédent(e)


Anonyme [1649], L’HOROSCOPE DE IVLES MAZARIN, Naisuement & fidellement expliquée de Centuries de M. Nostradamus, tant du passé, present qu’aduenir. Ensemble des Epithetes & Thesme Celeste sur toutes les Lettres de son Nom & sur-nom. LE POVRTRAICT DE SON PERE. , françaisRéférence RIM : M0_1665. Cote locale : A_3_82.