PROMPT
ET
SALVTAIRE
ADVIS
VIVE IESVS CHRIST.
VIVE LE ROY ET LE PARLEMENT
& tous ses bons sujets.

IL ne faut point tant de discours les playes sont trop
saignantes & fumantes en ce pays, les Lettres des prouinces
escriptes auec les larmes & le sang, & dont la lecture
fait dresser les cheueux en teste, tant d’escripts d’honnestes
gens, tant de predications de vrays Apostres & non
pas d’Apostats, comme ont esté aucuns de pieux Curez
& des interessez Pasteurs ; ne sont-ce par des aduertisimens
assez puissans par lesquels Dieu veut esueiller son
peuple, afin qu’il ne perisse pas par les charmes desquels
on ensorcelle son mal pour le rendre insensible.

Peuples vous n’estes que trop asseurez que tous ces mal
heurs, si vous ny prenez garde, ne sont que des auant coureurs
d’vne perte irreparable de la pureté de la Religion
du Roy, de son Estat & de ses bons sujets, quoy que
tous innocens ; fa Majesté par son aage, les autres par la
sincerité de leur intention & simplicité de leur obeyssance,
qui est taxée de mutinerie pour ne vouloir en tout obtemperer

-- 4 --

à l’ambition & insatiable auarice d’vn estranger,
ennemy naturel de la nation Françoise & de ses supposts,
la plus grande partie pareillement estrangers, horsmis
quelques vns qui sont autant de viperes, qui donnent
la mort à leur propre mere.

 

Le Sainct Esprit asseure par les Prophetes que Dieu n’a
renuersé les Couronnes d’Antigonus, de Balthazard &
d’autres, & particulierement n’a ruyné le Royaume de Iuda
& de Solé, la populeuse Ierusalem, que lors que l’on a
prophané la Religion que les Publicains où Maltotiers
ont esté en vogue ; les Iuges ont neglige la cause publique,
& les princes du peuple n’ont esteint le feu de leur ambition.

Que de prophanations lesquelles la plume n’ose escrire
des choses les plus sacrées, de l’Estre de Dieu mesme & de
sa representation reelle dans la Sacro-saincte Eucharistie,
que de blasphemes execrables & superbes insupportables
de ces canailles de Maltotiers, engressez du sang du peuple
& de la propre subsistance des pauures, & non pas des
superfluitez des riches, comme de certains flateurs à gages
nous veulent faire croire dans quelques Chaires de la verité
mesme, que de vols, de viols, de saccagemens, Barbaries
cent fois plus cruelles que celles des anciens Tyrans,
Turcs & Sauuages : Que de crucifiemens, escartellemens
de toutes sortes de personnes & tirées mesme des plus
qualifiez sont malicieusement tolerées & cruellement
commandez.

Mais quoy perdre le temps à parler, vn plus grand mal
& plus general presse ; peuple de Paris François gardez la
surprise Mazarine, ces armées passées d’Allemagne & de

-- 5 --

Suede que l’on fait demeurer aux aproches ce n’est pas
tant pour choquer l’Espagne, qu’elle mine que l’on fasse
qui n’est pas mesme beaucoup apparente, encore moins
conuaincante que pour ruyner la France.

 

Ceste force ouuerte n’est pas la plus à craindre, les pratiques
& intelligences secrettes sont les plus dangereuses,
la partie se lie plus fortement de iour en iour au milieu de
vous mesmes pour tous vous joüer en vn coup de dé, on
recule pour mieux sauter, l’on vous tourne comme de
pauures perdrix pour vous massacrer plus adroitement,
sans neantmoins que ces traistres cruels perdent le temps
dans les Prouinces qu’ils desolent ; rompez au plustost
toutes ces brigues, secoüez toute paresse, où vous estes
perdus, le plus prompt aduis en attendant de plus amples
est celuy-cy.

Peuple de Paris courez en foule de iour à autre au Palais,
faites qu’au plustost Messieurs du Parlement, j’entends
ceux qui sont reconnus pour veritables Francois, s’assemblent,
qu’ils appellent des Deputez de chascun Parlement
de France, gens de bien & bons compatriotes,
Que sans s’amuser à certains ordres soubçonnez, qui sous
pretexte de police estouffent les meilleurs desseins, chascun
quartier depute quelques bons habitans pour s’assembler
en vne Chambre du palais & aduiser à ce qu’on
voira bon estre, & ainsi dans les autres Communautez
du Royaume qui auront leurs Deputez en celle-cy, gens
reconnus de nulle mauuaise intrigue & de probité.

Que toute la populace & pauures contraignent les
bien faisans qu’on reconnoistra qui se sont donnez à
Dieu & au secours du prochain, de s’assembler en vne

-- 6 --

Chambre du Palais pour pouruoir aux necessitez d’vn
chascun sur le bien qu’on designera estre propre pour cét
effet, ce qui profitera aussi à l’aduenir, tant pour toute
sortes de personnes incommodez que nommément
pour les pauures soldats estropiez ou non & leurs familles,
qui auront seruy le Roy & l’Estat.

 

Et afin qu’on aye plus de facilité à faire ceste juste contrainte,
voicy les adresses de quelques vns.

Le feu sieur Baron de Ranty ne pouuant ayder si ce
n’est par ses prieres profitera beaucoup si on va chez luy
s’enquester de ceux qui estoient de sa pieuse intelligence,
tant dans ceste ville que dans les Prouinces pour le
soulagement des pauures, principallement honteux : sa
maison est en la Parroisse Sainct Paul, ruë Beaurreillic,
proche l’Arcenac, Monsieur l’Euesque du Belley.

Le sieur Regnard pres les filles Sainct Thomas, pres le
Faux bourg Mont martre.

Les sieurs de Chaumuel, le sieur Abbe de Matha & autres
aux Incurables.

Le sieur Abbé Normand, pres la porte Sainct Michel,
le sieur de Couttayes vers la Pitié, joygnant l’Image
Sainct Louys.

Les sieurs Curez de Sainct Germain de l’Auxerrois,
Sainct Merry, de Sainct Nicolas du Chardronnet & autres
zelez pour les pauures, entre lesquels ie ne nomme
point leur Chef, Monsieur le Coadjuteur de Paris qui
estendra ses soins aussi bien sur les pauures que sur le reste
du public.

Le sieur Camus, Faux bourg Sainct Iacques aux Carmelites,
& ceux que feront cognoistre les charitables &

-- 7 --

nullement bigottes habitudes, comme en sont de certains
à la mode, qui d’vn costé adorent le Veau d’Or de la
Cour & ses diaboliques maximes, & de l’autre veulent
couurir leur hypocrisie de quelque apparence de bien, ou
pensent s’absoudre de leurs brigandages par quelques
aumosnes d’vn bien qui ne leur appartient pas, & en laschant
5. sols, croyẽt pouuoir en retenir douze mille. Cain
offrit aussi bien qu’Abel vn Sacrifice, mais celuy-là attira
le feu de la collere de Dieu, & celuy cy fut remply de son
Esprit parce qu’il auoit le cœur net, à quoy Dieu regarde
premierement pour approuuer ou reprouuer les dons
qu’on luy fait.

 

Il ne faut se soucier des grands honneurs & moyens,
seulement de la pureté d’intention, & Dieu confond par
la priere d’vn homme de bien & sa simplicité les conseils
des prudens du siecle : ce qui me fait nommer ensuitte le
bon pauure, le Coutelier, ruë de la Coutelerie à la Roze
blanche, le Mercier, Fiere Michel vis à vis Sainct Paul,
outre qu’entre ces personnages cy-dessus designez qui
n’ont pas moins de jugement & de qualité que de pieté,
il s’en trouuera que la charité fera agir en ce que le
soubçon d’ambition leur feroit fuir.

Il faut demander pleine liberté d’escrire ou faire Imprimer
de bons aduis, ou autres choses profitables au public,
sauf à estre discutées, & l’on verra en consequence que
l’Estat sera en asseurance, les insendies, les vols, les sacrileges
& autres crimes & desseins énormes seront supprimez,
vn Ordre certain empeschera la confusion que l’incertitude
d’vn mal aussi certain, si on y pouruois, qu’est la
mort naturelle fortifie, les honnestes Bourgeois riches ne

-- 8 --

seront apauuris, les mediocres ne seront reduits au neant,
ny les pauures au desespoir, comme les pernicieux conseils
pretendent ; n’est ce pas vne chose estrange, que des
atheismes, des mensonges execrables des flateries & autres,
telles dangereuses pratiques peuuent estre ouuertement
Imprimez, & qu’on n’ose parler d’vn bon aduis, de dire
qu’en bien faisant & publiant choses Chrestiennes &
profitables au public, on apprehende les ministres de la
Iustice, qui forcez par la verité auoient justement condamné
ce qu’ils ont par apres indignement approuué,
sauf l’honneur des bons, partie par vne pusillaminité honteuse,
partie par vne correspondance criminelle deuant
Dieu & deuant les hommes, leur iniuste acquiescemens
ayant remis où plustost entretenu dans ces monstres impitoyables,
la fureur & la rage pour l’exercer plus audacieusement.

 

Courage peuple, si vne lasche complaisance porte d’abord
quelques Magistrats à vouloir empescher ce bon
dessein, la pluspart sera bien aise d’auoir pour excuse l’impossibilité
d’vne force causée par vostre multitude, & les
autres, s’il y en a de si desnaturez creueront en leur malice.

Quantité de Seigneurs & braue Noblesse sera rauie de
voir iour à la iuste vengeance qu’ils doiuent prendre des
viols faits aux personnes de leurs Dames & Damoiselles,
des pillages & ruynes de leurs Chasteaux, des indignes
supplices dont on a bourelé les plus qualifiez des barbaries
assouuies sur leurs suiets des bouluersemens de leurs
Eglises, des hachemens comme chair à paté de leurs Prestres
& Curez.

-- 9 --

Il y aura des Princes, sans parler du bon & genereux naturel,
de Monsieur le Duc de beaufort, que Dieu garde
d’alteration, & la Reyne mesme pouuant reprendre le premier
Esprit de sa bonté, qui voyant l’Estendard de Dieu
de la vertu & de ses maximes haultement leué & hardiment
porté, comme celuy du Diable, du vice & des Machiauelistes,
se tiendront heureux de combattre sous
iceluy, & pour oster tout soubçon de trahyson, que les
Princes sont aduertis & suppliez de ne donner, ne suiuront
autres aduis que de ceux que l’on iugera les plus
zelez pour Iesus Christ, le Roy, l’Estat, le peuple, & les
pauures.

C’est par ce moyen que seront en credit les voyes
que doit tenir vn Roy tres-Chrestien, lesquelles seruiront
d’instruction à sa Majesté lors qu’elle sera en aage,
& par ainsi on empeschera qu’elle ne soit obsedée de
ces iniques & diaboliques façons de tyranniser dont on
vse maintenant si ces cruels ne le font plustost perir que
regner, au lieu qu’estant imbu des contraires il sera
nommé en sa Maiorité Dieu couronné, comme Dieu
à sa Natiuité.

La bonne intelligence qu’il y aura par le moyen des
Deputez de chascune Prouince, gens de bien & de nulles
mauuaises impressions terminera bien-tost ce differend,
s’establira vn Ordre certain. Chascun viura en asseurance,
les iustes droits du Roy se payeront sans exaction,
ses coffres se trouueront pleins sans vuider les bourses
des payeurs, le menu peuple sera soulagé tant des Tailles
que des autres impots du peu de la diminution desquels
on ne se sent pas, n’estant pas mesme assurée non

-- 10 --

plus que toute autre chose par le desordre que causent
des harpies qui ne veulent souffrir qu’on fouille les gouffres
où ils ont englouty la substance du peuple, & qu’on
les empesche de le deuorer continuellement, aymant
mieux tout troubler & que tout perisse, ainsi qu’vn pericle
mit toute la Republique d’Athenes en combustion
pour s’exempter de rendre les Finances qu’il auoit volé, &
pour encore pescher en eau trouble.

 

Il ne faut s’amuser à parler & à crier, peuple de Paris
donnez par vn prompt & genereux effet le dementy à
ces fanfarons qui vous taxent de badauderie, & toute
la France d’vne bestialle souffrance, le temps n’en est plus,
il presse trop aussi bien que le mal, agissez fortement &
serieusement, & ne desmordez point de ce premier aduis
qu’elles belles promesses qu’on vous fasse en attendant
d’autres en consequence d’iceluy, vous n’experimentez
que trop que ces fourbes Barbares n’ont de
foy non plus que de loy, si leur conseil & leur cabales ne
sont renuersées ils viendront à bout de leur dessein qui
est de tout perdre, donner en proye à leurs Bourreaux,
vos femmes, vos enfans, vos biens & vos vies où s’il ne
se peut vous faire perir de faim & vous enseuelir tous sous
de mesmes cendres.

Ne vous espouuentez pas, c’est la cause de Dieu aussi
bien que du public, & s’il prend la qualité de Dieu de Paix
il se nomme aussi le Dieu des armées, rentrez en vous,
considerez & esprouuez vostre force & vous verrez que
ces grands phantosmes de puissance ne peuuent donner
de la terreur qu’à ceux qui ont peur & lascheront bientost
le pied s’ils voyent que vous les teniez ferme : Enfin ce

-- 11 --

seront de veritables Goliats qui seront vaincus par des petits
Dauids, c’est à dire gens qui suiuront les maximes de
Dieu qui est, qui a esté & sera à jamais plus fort que le
Diable qu’il confondra auec tous ses adherans.

 

Peuple vous voyez desia roder à douze quinze lieuës
de vous, les auant courreurs de vostre mal heur, le retardement
de la publication de cét aduis ne prouient pas de
la negligence de l’Autheur, mais du delay de l’impression.
L’on tient pour certain qu’on fait couler dans Paris des
gens de guerre qui se grossissent tous les iours pour fauoriser
au premier signal la pernicieuse entreprise, il n’y a
point de temps à perdre, pousuiuez l’execution de cét aduis,
& faites faire serment solemnel en la grande Salle du
palais sur le Sainct Euangile deuant le tres-Auguste Sacrement
à ceux qui sont cy dessus designez, afin que chacun
se sente plus estroitement obligé de se comporter
sincerement & fidellement en son employ.

FIN.

-- 12 --