NOVS esperions auec beaucoup de raison, que
de la liberté de Messieurs les Princes la France
ne pouuoit attendre que toute sorte de felicité,
& que de cét heureux moment dépendoit entierement
le soulagement des peuples, le repos de l’Estat,
le restablissement de l’authorité royale, l’affermissement
de la Couronne, & la paix generale
de toute la Chrestienté ; Mais la faction des partisans
de celuy, que cét eslargissement chassoit auec
ignominie du Royaume, a si bien empesché en
taschant de faire rentrer leur Maistre dans l’administration
des affaires, que nous n’ayons jouy auec
delice des fruicts des sollicitations de ces illustres
innocens, que par la diuision de la Maison royale
ils en ont retardé la production, en precipitant
à grands pas la Monarchie dans le mesme abisme,
où le Card. M. I’auoit laissée, auec plus de peril
que ce Sicilien n’auoit encores fait : puis que si

nous auons connu que depuis peu de temps les
guerres ciuiles ont deschiré nos Prouinces de toutes
parts, par la necessité que leurs Chefs auoient
d’esuiter la persecution d’vn Tyran estranger, on
n’auoit pourtant pas encores veu qu’il eut contraint
les Princes du sang à se retirer dans leurs
Gouuernemens, (quoy qu’il se fust porté à cette
insolence de les arrester injustement,) pour y armer
tout ce qu’ils y ont d’amis & de bons François,
afin de s’opposer aux violences de ceux, qui
par cette maniere d’agir veulent hazarder l’Estat
pour esleuer leur fortune par le restablissement
de celle de nostre ennemy mortel, qui est l’extremité
la plus dangereuse pour la subsistance d’vne
Monarchie telle que celle de France ; Ce qui est
encores de plus pernicieux, est qu’ayant obsedé
l’esprit du Roy, ils le font trauailler à sa propre
ruine, se seruants impunement du sacré nom de
sa Majesté pour authoriser les mauuais desseins
qu’ils ont contre ses subjets, contre son pouuoir
absolu, & contre tout ce qu’il y a de plus sain, &
de mieux intentionné pour le salut de son Estat, &
le repos de ses peuples : n’ayans d’autre pensée que
d’establir leur maistre par les desordres, ou de rendre
Monsieur le Prince (qui s’oppose à ce dessein)
odieux, parce qu’il a pris (disent-ils) ou qu’il veut
prendre les armes contre son Souuerain pour ses
interests particuliers. Mais quand ces dangereux
personnages verront si bien les intentions de ce
Heros, & qu’elles seront si bien connuës & approuuées

d’vn chacun, qu’ils ne pourront plus les
déguiser, ie ne puis conceuoir quelle contenance
ces factieux pourront tenir à l’aspect de tant de
bons desseins, pour nous persuader par leurs grimasse,
que leurs intentions soient plus iustes,
& qu’elles doiuent estre mieux suiuies, que celles
de Monsieur le Prince, de quel front pourront-ils
enuisager la gloire que ce conquerant va s’acquerir
dans le restablissement de l’authorité de
son Souuerain, par le soulagement des peuples,
l’expulsion de tout ce qu’il y a de seditieux aupres
du Roy, par la perte des restes du Mazarin, & par
l’vnion du Roy auec ses suiets ? mais affin que par
le passé l’on connoisse l’aduenir, & que les plus
d’esinteressez en iugent selon leur propre sentiment,
ie m’accorderay le mieux qu’il me sera possible
à la portée de la connoissance des moins esclairez
dans toute la suite de la reflexion que ie
viens de faire sur les desseins des vns & des autres
depuis la liberté de Messieurs les Princes iusques
à present, sans rien adiouster à ce que tout le monde
en a peu connoistre, affin que de ce qui nous
a paru, nous puissions iuger de la sincerité de leur
interieur.