AV ROY

SIRE,

Voicy l’Image d’vn Souuerain, que Dieu a
pris plaisir de tracer luy-mesme à sa fantaisie. Si
Vostre Majesté se donne la peine de la considerer
exactement, elle y verra des desseins, d’où elle pourra
tirer de belles leçons, pour se former au gré de
son Sauueur, & pour se maintenir en ses graces.
Vostre Majesté y trouuera pareillement des exemples,
où elle se pourra instruire des moyens qu’il
faut tenir pour se faire aimer de ses Sujets, &
pour se rendre redoutable à toutes les Nations de
la Terre. Elle y verra la dignité Royale en sa
plus haute splendeur, & l’ancienne institution des
Roys en son plus beau lustre. Elle y verra par
qui est-ce que les Souuerains ont esté eleus, & à

-- 6 --

quelle fin ils furent créez dans vne dignité si eminente.
Vostre Majesté y verra encore SIRE,
iusques où se peut estendre le legitime pouuoir que
Dieu vous a donné sur tous vos Sujets : & finalement
vous y pourrez apprendre s’il est permis
aux Peuples de iuger de vos actions, & de quelle
reuerence ils doiuent vser en parlant de vostre sacrée
personne. Ouy, SIRE, c’est vn Recueil que
i’ay fait de tout ce que l’Histoire Saincte a de plus
excellent en faueur des Princes. Le sujet est de soy
si noble, que sa seule recommandation suffit pour
le rendre tres-considerable à tous les siecles. Si Dieu
me fait la grace de pouuoir remettre ce petit Traité
en vn plus gros volume, comme ie l’espere vn
iour, moyennant son assistance, ie tascheray de le
rendre si charmant aux esprits les plus delicats,
que Vostre Majesté aura raison de croire, que ie
suis, & veut estre toute ma vie.

 

SIRE,

De Vostre Majesté,

Le tres-humble, tres-obeïssant, & tres-fidele
seruiteur & Sujet P. B. E.

-- 7 --