A MONSEIGNEVR
LE MARESCHAL
DE LA
MOTHE-HOVDANCOVR.

MONSEIGNEVR,

La condition dans laquelle ie suis estably ne m’a
laissé que deux moyens pour tesmoigner que ie suis
François ; Le premier, en me faisant prendre les armes
pour conseruer l’authorité Royale par celle de son
Parlement ; Le second, en me donnant les mouuemens
de publier les auantages que la France a tirez de vostre
valeur. Ie rends à sa Majesté le deuoir d’vn fidelle
sujet dans le premier point : Ie fais au second ce que
la iustice demande d’vn homme qui sçait donner à la

-- 4 --

vertu l’estime & le prix qu’elle peut auoir. Si ie ne satisfais
plainement à la gloire que vous meritez, ce ne
sera que par vn deffaut de suffisance ou de memoires
plus auantageux ; si mon petit effort vous contente, ie
ne plaindray pas mon trauail. Vostre modestie me fait
croire qu’vne exageration plus flateuse n’auroit pas
esté bien receuë de vous ; vostre generosité m’asseure
que vous ferez vn fauorable accueil à des veritez qui
sont connuës de toute l’Europe ; Ie veux dire, que vous
verrez de bon œil le discours de vostre vie, où i’ay cherché
des beautez sans fard, ce que vous n’eussiez peut-estre
pas fait, si ie l’eusse estably sur vne eloquence plus
recherchée. Quoy qu’il en soit, ie ne me suis proposé que
l’honneur de vostre seruice, & le desir de faire sçauoir
à toute la France le détail de vos glorieuses actions, que
la pluspart de ses peuples n’ont appris que par des voix
mal asseurées ; cela me fait croire que vous aggréerez
mes intentions, & que vous me permettrez de prendre
la qualité de

 

MONSEIGNEVR,

Vostre tres-humble, & tresobeïssant
seruiteur

D. VV.

-- 5 --