Mengau, Jacques [1652], L’HOROSCOPE IMPERIAL DE LOVIS XIV. DIEV-DONNÉ. Predit par l’Oracle François & Michel Nostradamus. , français, latinRéférence RIM : M0_1667. Cote locale : B_2_27.
SubSect précédent(e)

SubSect suivant(e)

L’HOROSCOPE IMPERIAL DE
LOVYS QVATORZE DIEV DONNÉ.

Predit par l’Oracle François & Michel Nostradamus.

LES Historiens ont remarqué du temps
de l’Empire Romain, que Iule Cesar
a esté le premier qui fut mis au rang
des Diuinités, ainsi que Dion raporte
dans ses Ocuures page 55. Primus autem Iulius Cæsar
infuere diuus appellatus est, Et Lucan au septiéme de
son Liure dit que les anciens Romains pour témoigner
la grandeur de leurs Roys, l’honneur & le
respect qu’ils leur portoient faisoient prendre leurs
Images dans les Temples leurs testes entourées de
rayons de feu d’Estoilles, en voicy les propres
termes.

 


Fulminibus manes radijsque ornabit & astris
Inque Deum Templis iurauit Roma per vmbras.

 

Si entre les Monarques Romains Iule Cesar a
esté mis au rang des Diuinités à cause de sa vertu
& magnanimité, peuple idolatre en ce temps-là,
qui n’auoit point la connoissance d’vn Dieu viuant

-- 4 --

& immortel comme nous, pourquoy ne porterons
nous pas pareil honneur & mesme respect
à nostre jeune Monarque Loüis XIV. que Dieu
nous a donné, ainsi que nostre Oracle François a
remarqué dans ses Propheties Centurie quatriéme
Quatrain 93. lors qu’il dit.

 

 


Vn Serpent veu proche du lict Royal
Sera par Dame nuict chien n’abayeront
Lors mettra en France vn Prince tant Royal
Du Ciel venu tous les Princes verront.

 

Il est constant qu’à mesme temps que sa Majesté
vint au monde, il fut veu vn petit serpenteau
proche le lict de la Reyne, & comme la Reyne
auoit demeuré vingt-huict ans dans le mariage
sans auoir des enfãs, on fit plusieurs vœux & prieres
à Dieu pour en auoir, si bien que par de bonnes
prieres Dieu nous donna par Miracle sa Majesté,
ainsi que nostre Oracle a remarqué cy-dessus, lors
qu’il dit. Du Ciel venu tous les Princes verront, pour plus
grãde preuue que sa Majesté nous a esté dõné comme
par miracle, les hõmes inspirés de Dieu le nommerent
à mesme temps qu’il vint au monde Dieu
donné. Ce n’est pas donc en vain que sa Majesté
nous a esté donnée de Dieu, ainsi que plusieurs
Saints Peres ont remarqué auec nostre Oracle
François, d’autant qu’il nous a esté donné pour
renouueller la France de nouuelles constitutions,
corriger le vice & les abus qui s’y commettent pour
extirper les Heresies, & subjuguer les Infidelles,

-- 5 --

à celle fin aussi que la Foy Chrestienne soit libre
par tout l’Vniuers, elle nous a esté donné pour renouueller
la France par de nouuelles constitutions,
témoin nostre Oracle François, Centurie ; Quatrains
15. lors qu’il dit ;

 

 


Cœur, vigueur, gloire, le Regne changera,
De tous poincts, contre ayant son aduersaire,
Lors France ou enfance par mort subjuguera
Le grand Regent sera lors plus contraire.

 

Quoy que ce quatrain soit assez intelligible de
soy, neantmoins nous en donnerons l’explication
en faueur des esprits delicats, la France sera renouuellée
de tous points par nostre jeune Monarque,
mais ce sera par l’intermise du Cardinal Mazarin,
lequel apres auoir esté la ruine de la France,
retournera auec grande gloire poussé d’ardeur &
de vigueur, qu’il faut entendre par ces mots, cœur
vigueur, gloire, le Regne changera de tous points, le
grand Regent sera lors plus contraire ; C’est vne chose
en effet bien contraire de croire qu’vne personne
qui sera contraire à la France fasse de nouuelles
constitutions pour le bien d’icelle, c’est
vn secret de Dieu que les hommes ne connoissent
point, c’est pourquoy il en faut demeurer là, apres
cela ie vous prie de considerer s’il y a nulle aparence
qu’il se détache du gouuernement des affaires de
France, ny de la vindication. Enfin Paris est tellement
> menacé de sa ruine, que j’en suis au bout de
mon roulet, & ne sçay par quels moyens vous desaueugler,

-- 6 --

veu tant de fourberies qu’on inuente
tous les iours, pour vous faire trebuscher dans
l’abysme de perdition, La Paix s’aproche d’vn costé,
& la Guerre onques ne fut la poursuite si grande ; Et
de fait nostre Oracle nous descouure la fourberie
qui se fera immediatement que la paix sera concluë
auec l’Espagne, sans toucher à celle de nos
Seigneurs les Princes : Voicy ce qu’en dit nostre
Oracle Centurie 9. Quatrain 86. lequel vous a
esté desia cité dans la premiere partie.

 

 


Du Bourg la Reyne paruiendront droit à Chartres,
Et feront près du Pont Antony pause
Sept pour la paix, Canteleux comme martres
Feront entrée d’armée à Paris clause.

 

Il est constant que les abus qui se commettent
dans Patis ne sçauroient iamais estre reformez que
par sa desolation & entiere ruine, parce que les
surueillants ny donnent point du remede que lors
que leur interest s’y treuue, quand nos premiers
Peres abuserent de la Loy de Nature, Dieu renouuella
toute la terre par vn deluge general, & n’en
resta que Noé & sa famille, il en doit arriuer quasi
le mesme à Paris, nõ pas par deluge d’eau seulemẽt,
quoy qu’il en soit menacé l’année qui vient, mais
par vn deluge de sang, ainsi que nostre Oracle a
remarqué dans la Centurie onziéme, sixain trente-deux,
lors qu’il dit.

 


Vin à foison tres bons pour les Gendarmes,
Pleurs & souspirs, plaintes, cris & alarmes,

-- 7 --


Le Ciel fera ses tonnerres pleuuoir,
Feu, eau & sang, le tout meslé ensemble
Le Ciel de Sol fremit & en tremble,
Viuant n’a veu ce qu’il pourra bien voir.

 

Cette desolation sera si grande que peu en rechapera
dit nostre Oracle, notamment quand il
parle de Messieurs du Parlement, Centurie neufiéme
Quatrain cinquante & vn.

 


Contre les rouges sectes le banderont
Feu, eau fer, corde par paix se minera,
Au point mourir ceux qui machineront
Fors vn que monde sur tout ruinera.

 

Il faudroit auoir l’esprit & le don de Prophetie
pour deuiner celuy duquel nostre Oracle parle,
quand il dit, Fors vn que monde sur tout ruinera : Toutesfois
si ie l’osois dire, il me semble que i’en aprocherois
de bien prés, si on a remarqué dans mes
precedens aduertissements, ie crois l’auoir assez
nommé, & en auoir dit mon sentiment. Enfin
Paris doit estre attaqué par toute sorte de deluges
d’eau & de feu : Pour celuy de l’eau on ne le sçauroit
éuiter, mais pour celuy de feu & de fer il se
peut si on veut, il n’y a que la nonchalance qui sera
la cause de ses debordemens, viue l’vnion & la concorde,
car le Dieu de Paix & de Misericorde ne
vous delaissera iamais, ou bien comme dit la Sapience,
Menti bone Deus occurrit, Dieu est tousiours
fauorable aux gens de bonne volonté, mais ou
sont-ils ses gens de bien, il faudroit vn second

-- 8 --

Diogenes pour les découurir auec vne Lanterne
en plain midy.

 

Ce n’estoit pas mon dessein de parler si auant
de la ruine de Paris, parce que j’en ay assez parlé
dans mes precedents aduertissemens, mais bien
des aduantages glorieux que le Ciel nous fait esperer
pour nostre jeune Monarque, toutesfois par
la conduite du Cardinal Mazarin ie suis contraint
malgré moy d’en parler, quoy qu’il soit l’erreur
de toute la France, duquel on verra vn grand
changement, ainsi que nostre Oracle a remarqué
dans la Centurie sixiéme quatrain 70.

 


Au chef du monde le grand Chyren sera
Plus outre apres aymé, craint, redouté
Son bruit & los les Cieux surpassera,
Et du seul titre victeur fort contenté.

 

De maniere que par ce Quatrain nostre Oracle
nous fait esperer vne grande Metamorphose du
Cardinal Mazarin, soit en sa condition, puis qu’il
doit estre le premier entre tous les Monarques du
monde, quant à ces faits ils surpasseront les Cieux,
c’est à dire la pẽsée des plus iudicieux, ce qui est fort
difficile à croire le voyant à present dans la hayne
presque de tout le monde, de maniere que sa renommée
passera si auãt qu’elle penetrera les Cieux,
puisque aussi il doit paruenir dans la sacrée Monarchie,
& pour lors il demeurera satisfait & tres-content :
Finalement la hayne qu’on a à present
contre luy se changera, parce que par ses faits il

-- 9 --

fera aymer & craindre tout ensemble, c’est pourquoy
nous pouuons dire qu’on le choque en vain :
cela estant, il faut croire que la nature l’a mis au
monde pour vn plus grand bien que les hommes
ne peuuent penetrer.

 

Ie sçay bien que les esloges que nostre Oracle
attribuë audit Cardinal, fascheront la pluspart des
esprits irritez ; mais si cela doit estre, il le faudra
souffrir, parce que toutes choses y contribuëront,
qui est en effet vn effect de la preuoyance de Dieu,
ce qui se preuue en ce que la pluspart des Messieurs
du Parlement ont tourne casaque, & contredit
ce qu’ils auoient declamé par vn Arrest, l’ont
aboly par vn autre, ce n’est pas sans cause si nostre
Oracle a dit dans la Centurie dixiéme Quatrain
90. Tout le Senat sera dessous sa main, c’est à dire,
la plus grande partie.

Il m’est impossible de pouuoir parler des aduantages
glorieux que les Cieux nous font esperer pour
nostre jeune Monarque, sans y mesler le Cardinal
Mazarin, la raison est qu’il n’abandonnera iamais
le Roy, ainsi que nostre Oracle a remarqué en
plusieurs endroits, premierement nostre Oracle
dit dans la Centurie troisiéme, Quatrain 93.

 


Dans Auignon tout le Chef de l’Empire
Fera Arrest pour Paris desolé,
Tricast tiendra l’annibalique Ire,
Lyon par change sera mal consolé.

 

L’on voit par ce Quatrain comme Paris sera desolé,

-- 10 --

& comme toute la Cour s’en ira en Auignon,
à cause de sa desolation, il se voit comme le Cardinal
y est nommé par ces mots, Tricast tiendra Lannibalique
Ire, Il faut entendre par le mot de Tricast
les Prouenceaux, à cause d’vne riuiere qui passe en
Prouence qu’on appelle la Duren, laquelle anciennement
on appelloit Tricast, de ce qu’elle passe ou
prẽd son origine d’vn Vilage qui se nomme Tricast,
& par ces mots tiendra Lannibalique Ire, les Prouenceaux
seront ennemis mortels du Cardinal,
par cette Metaphore de ce que les Romains estoiẽt
ennemis mortels d’Hannibal, le Cardinal estãt Romain,
tient le lieu d’Hannibal.

 

Le Roy, le Cardinal, & toute la Cour ayant
fait sejour quelque temps en Auignon s’en iront
en Italie, parce qu’il y arriuera de nouuelles affaires,
ainsi que nostre Oracle a remarqué dans la
Centurie 8. Quatrain 9. lors qu’il dit.

 


Pendant que l’Aigle & le Coq à Sauonne
Seront vnis, mer leuant & Hongrie,
L’armée à Naples, Palerme marque d’Ancone,
Rome, Venise, par barbe orrible crie.

 

Il semble par ce Quatrain, que le Turc doiue
attaquer Rome, mais auparauant cela l’Empire
sera vni à la France, qu’il faut entendre par ces
mots, Pendant que l’Aigle & le Coq à Sauonne seront
vnis : Il faut entendre par le Coq la France, & par
l’Aigle l’Empire, pour le surplus il se voit comme
le Turc doit attaquer Rome ; estant attaquée, les

-- 11 --

Romains prieront le Roy de France pour leur donner
du secours, ayant esté nommé à l’Empire auparauant,
ainsi que nostre Oracle a remarqué dans
la Centurie 50. Quatrain 6. lors qu’il dit.

 

 


Au Roy Langur sur le chef la main mettre,
Viendra prier pour la Paix Italique,
A la main gauche viendra changer le Sceptre,
De Roy viendra Empereur pacifique.

 

Quiconque aura esté à la Cour du Roy pendant
qu’il estoit en bas âge, on auroit veu qu’il n’auoit pas
demeuré tãt soit peu de temps en quelque lieu qu’il
s’y ennuyoit ; Et de fait estant vn iour à S. Germain
en Laye, vn iour de Dimanche, le feu Roy & la
Reyne estant à Vespres, & sa Majesté aussi, les Vespres
ne furent pas cõmencées qu’il vouloit sortir de
l’Eglise, & pour obliger sa mere Nourrice de le sortir
hors de l’Eglise, il disoit, ie me jetteray par terre,
c’est pour vous dire qu’en sa jeunesse il se languisoit
de temps en temps, c’est pourquoy l’Oracle le nomme
le Roy Langur.

Ce n’est pas par ces deux Quatrains seulement que
nostre Oracle a preueu comme sa Majesté doit paruenir
à l’Empire Romain, il y en a bien d’autres
que le Lecteur pourra voir particulierement le 81.
de la 8. Centurie, le 86. de la quatriéme Centurie,
le 68. de la sixiéme Centurie, mais plus particulierement
le 67. de la sixiéme Centurie, & auquel
nous nous arresterons par ce qu’il en apporte tout
à fait la piece, en voicy les propres termes de ce

-- 12 --

que nostre Oracle nous asseure.

 

 


Au grand Empire paruiendra tost vn autre
Bonté distant plus de felicité,
Regi par vn issu non loin du Peautre,
Corruer Regnes grande infelicité.

 

Pour entendre ce Quatrain, il faut sçauoir premierement
comme l’Empire Romain a esté le plus
grand Empire du monde, qu’il faut enẽdre par ces
mots ; Au grãd Empire paruiendra tost vn autre, c’est à dire
qu’vn autre sera bien-tost fait Empereur apres la
mort de celuy de present ; Bonté distant plus de felicité :
Celuy qui paruiendra au grand Empire ne
sera pas si bon que celuy de present, mais aussi il
sera plus heureux & plus fortuné, Regi par vn issu
non loin du Peautre, Ce sera celui-là qui sera gouuerné
par vne personne qui sera sourtie proche
du peautre : Or est-il que le Peautre est vne terre
d’Italie qui confronte la Calabre & la Sicile,
qu’on appelloit anciennement Beaucesia, de maniere
que le Pere du Cardinal Mazarin est Sicilien
duquel il est sorty, & Monsieur le Cardinal
Mazarin estant le principal Gouuerneur du Roy
& de son Estat, il faut delà conclurre comme le
Roy sera Empereur des Romains, puis qu’il est
gouuerné par ledit Cardinal Mazarin.

-- 13 --

SubSect précédent(e)

SubSect suivant(e)


Mengau, Jacques [1652], L’HOROSCOPE IMPERIAL DE LOVIS XIV. DIEV-DONNÉ. Predit par l’Oracle François & Michel Nostradamus. , français, latinRéférence RIM : M0_1667. Cote locale : B_2_27.