L’HOROSCOPE IMPERIAL DE
LOVYS QVATORZE DIEV DONNÉ.

Predit par l’Oracle François & Michel Nostradamus.

Quiconque verra la Figure de cette Natiuité,
verra la conuenence qu’il y a auec les Propheties

-- 14 --

de nostre Oracle. Premierement le Soleil estant
dans la dixiéme Maison Royale, esleue d’ordinaire
les personnes aux plus grandes dignités, quand
mesme vne personne seroit née de pauures parens,
ils les esleuent aux plus grãdes dignitez, à plus forte
raison sa Majesté qui estant dans la Royauté, il
faut par consequent qu’elle paruienne à vne dignité
plus releuée que la Royauté, c’est à dire à l’Empire
Romain, ainsi que nostre Oracle a remarqué
cy-dessus, Centurie cinquiéme, Quatrain 6. quand
il a dit, De Roy viendra Empereur pacifique, Mercure
y estant aussi placé, ne luy nuira point, parce qu’il
luy donnera toute sorte de bons conseils pour paruenir
à l’Empire, & le rendra propre en toutes
Sciences, il n’y a que le Quadrat de Mars qui le regarde
d’vn Molin aspect, lequel luy donnera vn
peu de peine, non pas dans la promotion de l’Empire,
mais en d’autres occasions, & immediatement
apres son mariage.

 

Quand à la Lune & Venus qui sont dans la maison
du Soleil, luy augmenteront l’esprit, & le rendront
aymable des Dames, & comme Venus se
trouue maistresse de la septiéme Maison, Maison
de mariage, estant dans la dixiéme au signe du
Lyon, signe intercepte, lequel tient plus de la dix
que de la neufiesme, à cause que le signe de Cancer
Maison de la Lune occupe tout à fait la neufiéme,
luy promet & fait esperer vne femme fort honorable,
par le moyen de laquelle il paruiendra à vne

-- 15 --

autre grande dignité, & tout ainsi que nostre Oracle
a remarqué dans la onziéme Centurie sixain 58.

 

 

Sangsuë en peu de temps mourra,
Sa mort bons signe nous doura
Pour l’accroissement de la France
Alliances se trouueront
Deux grands Royaumes se joindront
François aura sur eux puissance.

 

Par ce sixain nostre Oracle fait voir les grands
aduantages que Venus luy promet par le moyen du
mariage qui le doit faire entre sa Majesté, & la fille
d’Espagne, immediatement apres la mort du Roy
d’Espagne, qu’il faut entendre par ces mots, Sangsuë
en peu de temps mourra, De ce que les Roys d’Espagne
ont succé de leurs voisins la plus grande partie
des terres & principautez qu’ils occupent : Pour
le surplus dudit sixain, il est assez intelligible, de
maniere que par le moyen de ce mariage le Roy
possedera l’Espagne, & augmentera de dignité.

Cette Alliance nous est encore asseuree par la
Centurie 4. Quatrain 2. où il est dit.

 

Par mort la France prendra voyage à faire
Classe par mer, marcher monts Pyrennées,
Espagne en trouble, marcher gens militaire,
Des plus grands Dames en France emmenées.

 

Le Roy d’Espagne estant mort, ses Sujets seront
en grand trouble & fascherie, qu’il faut entendre
par ces mots, Espagne en trouble, la mort du Roy
d’Espagne estant arriuée, obligera le Roy de France

-- 16 --

de faire deux armées, l’vne par terre & l’autre par
mer, à cause de l’intelligence qu’il aura auec la fille
d’Espagne, laquelle sera portée de pareille affectiõ,
pour estre mariée auec sa Majesté, pour cét effet
elle contribuera de son costé pour estre emmenée
en France, qu’il faut entendre par ces mots, Des
plus grands Dames en France emmenée. C’est vne chose
merueilleuse de voir comme nostre Oracle François
a preuenu cette Alliance, ou pour moins dire
ce mariage, mais encores plus la disposition des
Planettes, ainsi qu’elles le treuuent placés dans
cette Natiuité Imperialle.

 

Premierement le Soleil & Mercure sont dans
la dixiéme Maison Royale, Venus maistresse de la
septiéme Maison, de mariage, & Iupiter dans l’ascendant,
lequel en ce lieu promet vne longue vie,
bonne fortune dans les balances, Maison de Venus
dans le Lyon jointe à la Lune, esleue les personnes
en grande dignité par le moyen du mariage
par la faueur des femmes.

Or tout cecy a esté preuenu par nostre Oracle
même, ladite Alliance ou mariage, c’est par la onzieme
Centurie sixain 49. lors qu’il a dit.

 

Venus & Sol Iupiter & Mercure
Augmenteront le genre de nature
Grande alliance en France se fera,
Et du midy la sangsuë de mesme
Le feu estaint par ce remede extreme
En terre ferme oliuier plantera.

 

-- 17 --

Si l’on vient à considerer & à exagerer de bien
prés ce sixain & la figure Imperialle cy-dessus, il
semblera que la chose a esté faite à plaisir, & que
les deux esprits se soient communiquez ensemble,
veu la conuenance qu’il y a de l’vn à l’autre, Venus
& Sol, Iupiter & Mercure. Voila les quatre Planettes
qui font le plus grand effet pour cette Natiuité,
Mercure dans son exaltation y est fort puissant, & la
partie de fortune dans les balances y est aussi forte &
puissante, mais tellement puissante & si fort attachée,
qu’elle en raporte huict degrez de force, sçauoir
quatre pour estre dans le signe des balances
maison de Venus, & quatre pour la onziéme maison,
maison des amis : de maniere que nous inferons
delà comme sa Majesté sera mariée auec la fille
d’Espagne par l’intermise d’vn amy, quand ie dirois
que ce sera par l’intermise de M. le Cardinal,
ie croy que ie ne me tromperay point, on a beau à
dire le Cardinal s’en va, il est vray il s’en va, ce n’est
pas à dire qu’il ne gouuerne tousiours, & tout ainsi
qu’il faisoit l’autrefois, son Genie estant auprés du
Roy, ie vous laisse penser qu’est-ce qu’il ne fera
pas à son aueu. Si on a bien remarqué ce que nous
auons dit dans la sixiéme Partie qui fut dediée à
son Altesse Royale pour raison d’eloignement du
Cardinal, on aura veu comme son éloignement
doit estre funeste pour Paris, & en suite pour toute
la France, ainsi que nostre Oracle a remarqué
dans la Centurie 9. Quatrain 52. lors qu’il dit.

-- 18 --

 

La Paix s’aproche d’vn costé & la Guerre,
Onques ne fut la poursuite si grande
Plaindre homme, femme, sang innocent par terre,
Et ce sera de France à toute bande.

 

On parle de la paix, voila qui va bien de croire
qu’elle soit asseurée, nostre Oracle ne l’assure point,
puis qu’il dit que la guerre ne fut iamais si grande.
Pour esperer vne veritable Paix, nostre Oracle dit
qu’il ne l’a faut point attendre que immediatement
apres le mariage du Roy auec la fille d’Espagne,
ainsi qu’il a remarqué dans la Centurie quatriéme
Quatrain 45. lors qu’il dit.

 

Croix Paix, sous vn accomply diuin terbe,
L’Espagne & Gaule seront vnis ensemble
Grand, Clade proche & combat tres-accerbe,
Cœur si hardy ne sera qui ne tremble.

 

Si cela est nous en sommes bien éloignez, &
de fait nostre Oracle nous l’assure de plus fort par
le sixain cy-dessus note pris de l’onziéme Centurie
Sixain 49. en ce qu’il a dit.

 

Le feu estant par ce remede extreme
En terre ferme Oliuier plantera.

 

Vn chacun sçait comme l’Oliuier est vn arbre
qui est tousiours verdoyant & symbologique pour
la Paix. De maniere que par le mariage du Roy
auec la sille d’Espagne, nous aurons la paix, mais
vne Paix stable & bien assurée qu’il faut entendre
par ces mots, En terre ferme Oliuier plantera. Il faut
sçauoir d’ailleurs comme l’Oliuier est vn arbre qui

-- 19 --

dure plus de trois cens ans, si Dieu nous vouloit
donner sa paix elle seroit encore de plus longue durée,
mais cõme la pluspart des hommes sont enclins
plus au mal qu’au biẽ, il ne la faut point esperer qu’aprés
vne renouation de mœurs & de Loix, ainsi
que nostre Oracle a remarqué dans la Centurie
troisiesme Quatrain 49.

 

 

Regne Gaulois tu seras bien changé,
En lieu estrange est translaté l’Empire,
En autres mœurs & Loix seras rangé,
Roüan, & Chartres te feront bien du pire.

 

Tout le déplaisir que Paris peut receuoir de
Roüan & de Chartres, ce sera à cause que les armees
empescheront le passage des viures, & feront ses
assises du costé de Chartres, qu’enfin de contre
aborderont les enuirons de Paris pour accomplir
leur malice contre Paris, & apres cela le Roy s’en
ira comme nous auons dit du costé de Prouence
ou en Auignon, ainsi que nostre Oracle a remarqué
cy-dessus, quand il dit. En lieu estrange est translaté
l’Empire ; Et delà nous pouuons conclurre comme
le Roy sera Empereur, mais encore plus par le
Quatrain 93. de la Centurie troisiesme, quand il dit,
Dans Auignõ tout le chef de l’Empire sera Arrest pour Paris
desolé. Enfin & pour toute conclusion, ie n’estime
pas que nous ayons la paix si le Roy ne vient à
Paris ; que s’il y vient, son entrée sera autant glorieuse,
qu’elle sera funeste s’il n’y vient point.

FIN.

-- 20 --