AV LECTEVR.

IE ne veux plus retenir dans la sollitude
d’vne Chambre deserte, vn Rieur public,
puis que ces sentimens & son courage le
portent sur le theatre du monde, pour y
souffrir la censure, apres l’auoir genereusement faite
des plus rafinez Courtisans du siecle, il s’offre en bute
à la Satyre & n’en redoute pas les attaintes, par ce que
son indifference est preparée à tous les euenemens, &
n’affectant que sa satisfaction il la rend independente
du murmure & de la bijarrerie de toutes sortes des personnes,
& comme il trouue en luy seul son ambition &
sa gloire, il deffie le reste du monde d’empescher sa felicité
ny d’interrompre son ris & alterer sa complaisance,
prenez tel sentiment qu’il vous plaira de son Genie
il n’en sera ny plus ny moins iudicieux, & vous pour
estre seuere n’en deuiendrez pas plus raisonnable, si
vous errez dans vos delicatesses, j’auoüe que ie n’entre
prens pas de guerir les incurables, ie me contente
de me mocquer des ridicules, s’il y a de l’audace, il s’y
trouuera aussi de la seureté pour mon contentement
ie ne rends pas les jnterests de mon esprit tributaires
de l’incertitude, ie fais trop de cas de la realité pour la
vouloir hazarder apres vne illusion, aussi peu considerable
à ma pensée, que vos sentimens sur le sujet de

-- 6 --

mes trauaux, parlez-en à vostre fantaisie, la mienne
ne s’en inquietera nullement, ie pardonne l’ignorence,
& ne demande pour mes œuures ny grace ny iustice,
leur reputation ne me touche pas, i’escris sans
dessein, & ne me porte à cét employ que comme à la
promenade pour me diuertir, ie me satisfais à ma mode,
ma plume console mes maux, fortifie les resolutions
de mes souffrances & soulage mon cœur dans ses peines
n’a iamais esté coupable de lascheté ny de satyre,
apres cela si vous estes fascheux il ny aura de trouble
que pour vous, vous ferez le reformateur à vostre
aise, & moy la satisfaicte de tous les euenemens, si
vous n’appellez pas de vostre partage, mon humeur
vous en signera le titre.

 

-- 7 --