LETTRE DE MONSIEVR LE
Duc d’Espernon à Messieurs du Parlement
de Bourdeaux, du trente-vniesme
de Mars 1649.

MESSIEVRS,

La consideration que i’ay
pour le Parlement & pour
la ville de Bourdeaux, & le desir de conseruer
la tranquilité de cette Prouince, m’oblige
(auant que de prendre autre resolution)
à vous prier de m’éclaircir de vos intentions.
Vous auez recherché des vnions
extraordinaires, & auez pris & fait prendre
les armes à Bourdeaux ; si c’est pour le seruice
du Roy & de la Reyne Regente, ces
peines sont inutiles : vous n’auez point
d’ennemis, & il n’y a personne qui soit plus
estroitement engagé dans ces interests que
ie le suis, & que ie desire y estre joint auec

-- 4 --

Vous. Si soûs pretexte du bien public on
veut choquer l’authorité de la Reyne Regente,
ces vnions ne peuuent estre que
preiudiciables au seruice du Roy & au bien
de l’Estat : Ie vous supplie, MESSIEVRS,
puis que l’affaire touche le repos de cette
Prouince, où vous n’ignorez pas l’authorité
que le Roy m’a confiée, de me faire sçauoir
par vne claire explication de vos sentimens
touchant le seruice de leurs Majestez,
si ie me dois garder de Vous, comme
de gens armez contre la Reyne Regente, ou
continuer à me dire, comme ie le desire passionnement,

 

MESSIEVRS,

Vostre bien humble seruiteur
LE DVC D’ESPERNON.

De Cadillac, ce 31. Mars 1649.

-- 5 --