ALMANACH
DE LA COVR,
POVR L’AN M. DC. XLIX.
par Maistre François le Verittier,
grand Speculateur des choses
presentes.

IANVIER. Ianus.

 

Ianuier du C... represente l’image,
L’vn est dissimulé, l’autre a double visage,
Et du nouueau Soleil tous deux guindent
le cours :
A la guerre tous deux tiennent la porte ouuerte,
L’vn rit du mauuais temps, l’autre de nostre perte ;
Ce qui fait souhaiter qu’on abrege leurs iours.

 

-- 4 --

FEVRIER.

 

G... a de ce mois l’inégale froidure,
Il se fasche tantost, & tantost il endure,
Selon qu’il est de peur ou d’espoir agité,
Les voisins de ce mois luy ostent deux iournées,
Mars 3. &c... 4. par subtiles menées,
Retranchent à ce Duc de son authorité.

 

MARS.

 

C... ce ieune Mars que tout heur accompagne,
Qui ne bronche iamais qu’aux portes de l’Espagne,
Et qui a tout vaincu horsmis le Parlement,
Tesmoigne par ses faits qu’il veut suiure la trace,
Et la fougue imiter de ce grand Dieu de Trace,
Luy qui a plus de cœur qu’il n’a de iugement.

 

AVRIL.

 

C... ce beau Prelat, dans l’Auril de son âge
Croit estant Cardinal deuenir aussi sage
Que son Parrain defunct qui a fait tant de bruict,
Pour porter le Rochet il a l’espaule forte,
Mais ie crains qu’à la fin tout ce dessein n’auorte,
Comme ce mois produit des fleurs sans aucun fruict.

 

-- 5 --

MAY.

 

Le ioly mois de May L... figure,
L’vn a de la vigueur, l’autre a de la verdure,
Tous deux promettent plus qu’ils ne peuuent tenir,
Nostre espoir tousiours veut languir apres ce Prince,
Pendant que les Soldats rauagent la Prouince,
Que son authorité ne sçauroit maintenir.

 

IVIN.

 

En vain Princes Lorrains vous taschez à reprendre
Le rang que vos ayeuls à la Cour sçeurent prendre,
Gaston dans sa chaleur vous a tous ramassez,
Mais il se refroidit, adieu vostre esperance,
Les oyseaux de ce mois qui s’acheminent en France,
Attirez par le chaud, par le froid sont chassez.

 

IVILLET.

 

Indigne C... saiseur de fausses bulles,
Vallet iadis d’Armand & à present de Iulles,
Au parrain de ce mois tu es bien assorty,
Dans les lieux les plus saints sa femme souloit faire
Ce que la tienne fait ton E. faux frere,
Fut Tyran du Senat dont il estoit sorty.

 

-- 6 --

AOVST.

 

M... Financier, la goutte & l’auarice,
Causent plus de douleur à ta noire malice,
Qu’il n’est d’espics grillez par l’ardeur de ce mois,
Lassé de moissonner auec le cimeterre,
Aux bourses maintenant tu veux faire la guerre,
Et ta plume fait pis que ton glaiue autrefois.

 

SEPTEMBRE. Libra.

 

Ce basque, ce mattois, qui depuis sa défaite,
Eut du dernier combat l’honneur dans la Gazette.
De Septembre retient la deuise pour but,
Il balance l’esprit de l’vn & l’autre Maistre,
Vnissant les esprits de Condé & du Prestre,
Si bien qu’il n’a sujet de craindre le debut.

 

OCTOBRE. Scorpio.

 

En tous biens V... comme Octobre foisonne,
Mais de son nourrisson l’esprit il empoisonne
Par d’estranges leçons selon l’ordre receu,
Afin que ce venin plus auant ne penetre,
Il faut dessus la playe écraser sans remettre,
Comme le Scorpion celuy qui l’a conceu.

 

-- 7 --

NOVEMBRE. Sagitarius.

 

En vain l’on fait signer le T... Secretaire,
En vain l’on tire au blanc comme le Sagitaire,
Il n’est rien de si froid que le quartier d’Hyuer,
Les Estappes sont bas comme la Subsistance,
Mais des Prouinciaux la lasche resistance,
N’empesche le Soldat de nous venir brauer.

 

DECEMBRE.

 

Il ne faut oublier l’Abbé de la Riuiere,
S’il n’a tout ce qu’il veut, il ne tardera guere,
Vn Prince dessus luy meritoit bien le choix,
Pour estre le dernier qu’il ne se desespere,
Decembre moins que tous a de chemin à faire
Pour paruenir au rang du premier de nos mois.

 

FIN.

-- 8 --