Anonyme [1649], ARREST DE CONFIRMATION DE LA COVR DE PARLEMENT, du huictiesme Ianuier 1649, donné contre le cardinal Mazarin. , françaisRéférence RIM : M0_259. Cote locale : A_1_71.
SubSect précédent(e)

ARREST DE CONFIRMATION
de la Cour de Parlement, du 8. Ianuier 1649.
donné contre le Cardinal Mazarin :

SVR la Requeste verballe faite par
Messieurs les Generaux : contenant
que pour paruenir à leurs seuretez s’estant
declaré à la Cour, tant pour le
seruice du Roy, de la Compagnie & l’vniuersel
repos public, contre ledit Cardinal Mazarin, qui
prend impertinemment la qualité de premier Ministre
d’Estat ; requerant l’execution entiere dudit
Arrest, du huitiesme Ianuier dernier, iuridiquement
contre luy rendu, toutes les Chambres assemblees
& auec grande connoissance de cause :
auquel neantmoins comme refractaire il n’a satisfait
ny obey depuis ledit temps, quoy qu’il luy
soit notoire ; requerant qu’à faute de ce faire ils
desirent qu’ils leur soient permis de le faire executer
par toutes voyes deuës, & y agir comme
en pareil cas.

L’vn de Messieurs de la Cour a dit, qu’il ne s’est
iamais veu ny rencontré, mesme dans vne occasion
si pressante, des actions si loüables, aduantageuses
à la Compagnie & aux Peuples, que l’offre

-- 4 --

de Messieurs les Generaux, qui se sont volontairement
& genereusement portez & presentez
auec bien veillance au repos public au Parlemẽt,
& que ce seroit vne ingratitude irreparable de ne
pas remarquer leurs heroïques actions contre vn
homme impie, barbare, ennemy & perturbateur
du repos public, & leur vray ennemy capital &
de l’Estat, comme estant l’autheur & le motif de
l’entiere ruine du Royaume, & merite l’animaduersion
de la Cour & des Peuples, lesquels respirent
& desirent vnanimement qu’il soit tenu de
satisfaire audit Arrest, & qu’à faute de ce faire
d’en encourir les peines y portees : Tout cõsideré,
ouy sur ce les Gens du Roy. LADITE COVR
ayant esgard à ladite Requeste verballe, faicte par
Messieurs les Generaux, ont ordonné & ordonnent
que ledit Cardinal Mazarin satisfera audit
Arrest du huitiesme Ianuier dernier, autrement
& à faute de ce qu’il luy sera courrusus, comme il
est mentionné audit Arrest & sans retardation,
& cependant que le present Arrest sera enuoyé
aux sieurs Deputez d’icelle, pour y auoir esgard
& tenir la main à l’execution d’iceluy. Fait en Parlement
le 27. iour de Mars 1649.

 

SubSect précédent(e)


Anonyme [1649], ARREST DE CONFIRMATION DE LA COVR DE PARLEMENT, du huictiesme Ianuier 1649, donné contre le cardinal Mazarin. , françaisRéférence RIM : M0_259. Cote locale : A_1_71.