Quoy que ie sçache tres-bien que les deuoirs de
l’amitié requierent que l’on se rejoüisse du bon-heur & felicitez
de ses amis, & que l’on prenne part dans toutes leurs
bonnes fortunes ; neantmoins, sans pecher contre les regles
de l’Apostre qui veut que la charité ne soit point enuieuse ;
vous me permettrez de vous dire, que peu s’en faut que ie ne
vous enuie le repos de vostre solitude, & vostre éloignement
de Paris en cette conjoncture si estrange. Ce n’est pas que
la face de cette Ville, soit si horrible que le bruit commun
pourroit la vous dépeindre, mais pour ne vous point mentir,
ie ne serois pas marry si par quelque heureux sort ie pouuois
me trouuer vn peu à l’escart de Paris pour quelque temps,
quand ce ne seroit que pour ne me voir pas exposé aux occasions
d’entendre tous les iours les gemissemens des pauures
Villageois, les saccagemens de leurs Villages, les incendies
des maisons, les profanations des Eglises, les violemens des
femmes & des filles, sans épargner mesme les Religieuses,

les vols, meurtres, pillages, massacres, & autres semblables
hostilitez, que les nations barbares, ie veux dire les Allemans
& Polonois, que le Sicilien a fait venir, excercent
aux enuirons de Paris : Quis talia fando temperet lachrymis,
de maniere, que nous aurions icy assez de sujet de reciter ce
Pseaume, lors que l’Eglise Iudaïque considerant les rauages
& desordres qu’elle souffroit par l’insolence des Caldeens
ses ennemis, disoit, se plaignant à Dieu.