Liste des Empereurs & des Roys
qui ont perdu la vie en leurs
Royaumes par la malice de
leurs fauoris & de leurs Ministres
d’Estat.

LA Nature dont l’amour est la fidelle
compagne, a planté en l’ame d’vn
chacun des mortels vne volonté fer
me, où plutost vne iuste inclination
de seruir ceux a qui l’õ se trouue redeuable,
ainsi les enfans sont naturellement portez
à venger les outrages qui sont faits à leurs parens,
les seruiteurs à soustenir leurs maistres, les Citoyens
à combattre courageusement pour leur patrie, les
peuples à espouser la querelle de leurs Souuerains,
& les fauoris & maistres des Princes à leur estre fidel.
Ce glorieux & iuste desir est bien souuẽt changé
& peruerty en des funestes & mal-heureuses
conceptions, qui produisent des effets pleins d’horreur
& d’effroy, dont l’antiquité nous fournit des
prodigieux exemples.

-- 4 --

Adramelech & Sarracher ont coupé la gorge à
leur pere Sennacherib Roy des Assiriens, Ninus tua
sa mere Senmiramis, Bimelech esgorgea ses septente
trois Freres, Monime Reyne de Pont fut
massacree par le commendement de Mithriadate
son mary, Amilcar Capitaine des Carthaginois,
fust assassiné par vn de ses domestiques, Aurelian
fut traitté de mesme dans la guerre des Olleriens,
Iules Maximin perdit sa vie par ses gendarmes, Rome
a esté despeuplee par son Triumuirat, Constantinople
a esté ruinee par les plus apparants subiets
d’Hirennee, Et Rhodes par vn de ses traitre Citoiẽs,
Alexandre aussi bien que Viriacus ont esté empoisonnees
par leurs fauoris, Sardanapale fut contraint
de se brusler auec toutes ses richesses pour
n’auoir pas le déplaisir de voir regner à sa place le
chef de son Conseil, & Astiages a perdu l’Empire
des Medes par la perfidie d’Harpagus son ministre
d’Estat, Galba Heliogabale, Macrin & Seuere
sont morts par la main de leurs plus chers soldats,
& Pertinax par le chef de ses Gardes,
Oroculus, Roy des Arnianiens à la sollicitation de
son Ministre, fut lapidé par son Peuple, par la mesme
voye. Luccius Siccius fut tué dans la guerre des
Sabins par ses soldats, ainsi Amon & Ioas Roys de
Iuda perirent par la rage de leurs subiets : Le grand
Timothee & Domitian par celle des maistres de
leurs domestiques. Plusieurs autres qui ont esté
traittez de la sorte chez les Grecs & chez les Romains,
monstrent assez que les dangers & malheurs

-- 5 --

que courrent les Grands, sont fomentez par
la malice de leurs fauoris & Ministres. Athleta Roy
d’Epire & Hieronime Roy de Siracuse, ont experimenté
ses semblables cruautez, ne plus ne
moins que Ioseph de Fer & Menfoy, Roy de la
Poüille, de tant d’exemples, ie n’en trouue point
de plus remarquable ny de plus estrange que celuy
que recite Orose de Rouerol le dernier Roy d’Arles,
qui à la sollicitation d vn de ses plus intimes, &
par la sedition de son Peuple, laissa la teste sur vn
eschafaut, pour auoir donné seulement vn soufflet
à vn Euesque, vn de ses petits fils auiourd’huy est
containt dans Paris de gaigner sa vie, comme autresfois
Homere chez les Grecs. Ie ne puis point
passer sous silence, encore comme Agamennon,
apres auoir subiugué Troye, fut assassiné par Egiste
son fauory, & celuy de sa femme Clitemnestre.
Candolus Roy de Lydie, par Giges son courtisan,
Chilperic neufiesme Roy de France, par Landry.
Et Xerces, apres auoir mené trois millions d’hommes
contre la Grece fut assassiné par son confident
Attrabanus dessus son Throsne. Plusieurs autres
grands Princes n’ont pas esprouué vn malheur d’estre
les Empereurs Tacite, Constantin, fils d’Heraclius,
Othon Emiliam, Florin, Syluanus, & Marius
peu de temps apres qu’ils ont esté couronnez,
ont perdu miserablement la vie, par la perfidie de
leurs plus grands Familiers. Enfin Edoüard cinquiesme,
Roy d’Angleterre perdit la vie & sa couronne,
par la cruauté de son Oncle Richard, & le

-- 6 --

dernier Roy de ce Peuple ces iours passez, est mort
par la trahison de Fairfax son fauori, qui plus inhumain
que Golo, luy a serui de bourreau. l’Histoire
Moderne est plus remplie de ces exemples
que l’ancienne : mais mon dessein n’est pas d’escrire
ce que nous voyons tous les iours, ie me contente
de faire voir dans la vie de ces deplorables Princes,
combien preiudiciable est aux Grands, l’eslection
des fauoris & de Ministres d’Estat, dou vient
que Traian & Henry le Grand se sont rendus recommandables
à la posterité, par l’horreur qu’ils
ont euë de telles sensuës : En effet ces esprits sont
ordinairement plus domageables à l’Estat que la
peste dans vne Republique, si nous considerons
ces hommes dissimulez, nous trouuerons qu’ils
sont des Cameleons à toutes couleurs, des Girouettes
à tous vents, des protes à tous visages, des matieres
à toutes formes, & des toilles à toute sorte de
posture, chez eux, le stupide est sage, l’auaritieux
mesnager, le ioueur, homme d’esprit, l’hipocrite
deuot, l’vsurpateur conquerant, le colere magnanime,
& le prodigue magnifique. Comme les supreficies
& les lignes qui ne peuuent d’elles mesme
se courber ny se mouuoir, ny s’estendre se remuent
aisement auec les corps, dont elles sont les accidents :
Ainsi les fauoris & les Ministres d’Estat,
bien qu’ils ne peuuent point d’eux mesmes, s’estendre
ny s’agrandir, neantmoins ils l’vnissent tellement
à la dignité Royale, qu’il est impossible que
leurs Princes acquierent de la gloire, qu’ils n’en

-- 7 --

soient faits participats, bien dauantage : Comme
les accidens nous empeschent de voir l’esclat de la
substance, pour nous porter à les admirer auec plus
de passion, ainsi les fauoris cachent le merite de leur
Maistres, afin de manifester plus insolemment leur
vaine gloire, qui les oblige le plus souuent a faire
vne fin aussi funeste que mal-heureuse. Cleander
estoit grand Ministre de l’Empereur Commode,
les Romains l’obligent à luy faire couper la teste.
Alexandre a fait mouuoir Clites, Philotas & Parmenion
qu’il auoit tendrement aymez. Tibere
fit perir de moit violante. Drusus Pison & Germanicus
ses adulateurs : Onze de sa suite, entre autres
Quidemon & Trebbon, quoy qu’il eut tesmoigné
par amour ou par addresse qu’ils luy estoient
tous fort considerables. Caligule qui aymoit passionnement
Ptolomee, ne laisse pas de le faire
mourir, Neron obligea Corbulon qu’il appelloit
son pere & son bien faicteur, de se passer l’espee au
trauers du corps. Et Soliman fit mourir Hibraim
Bassa son grand amy, bien qu’il luy eust promis la
vie. Plusieurs fauoris de nos Roys ont miserablement
fini leurs iours. Comme Pierre de la Bresche,
Anguerrant & Iacques de Beaune, le seul grand
Cardinal de Richelieu, par la Diuinité de son esprit,
& par sa vertu extraordinaire, sous le regne
de Louis treize, a glorieusement fini ses iours,
ayant diminué le cours de sa vie pour agrandir l’Estat,
& maintenir la grandeur de son Prince, si le

-- 8 --

Ministre d’Estat du Roy & de la Reyne Regente
auoit ses perfections, la France dans son sein iouiroit
d’vne douce tranquillité. Mais

 

 

Ie crois que la comparaison
Du grand Armand & du sieur Iules,
Seroit bien aussi ridicule
Que d’vn Aigle auec vn Oyson.
Ou d’vn barbe auec vne mulle.