MANIFESTE OV RAISONNEMENT
sur les affaires de Catalogne,
contre les intrigues du
Cardinal Mazarin.
Traduit d’Espagnol en François.
PVIS que la Principauté de Catalogne
est vne des Prouinces, qui auec
plus de fidelité, dépend de la Monarchie
Françoise, pour la conseruation
de laquelle, ladite Monarchie à tant
d’vtilitez & conuenances, comme il est aisé de iuger.
Il est raisonnable qu’au temps que toutes les
autres Prouinces de France, concurrent à faire parestre,
pour le seruice de sa Maiesté & bien public
la maniere fatale du gouuernement qu’en icelle
a tenu le Cardinal Mazarin, que la Catalogne
tienne aussi sa partie, qui ne sera pas de peu de
poids, pour manifester le fondement & la Polytique
que ledit Cardinal a obserué en son Ministere.
Pour ce sujet, aussi-tost que ie vis sortir en
public la verité sur ce grand Theatre de la France,
ie me resolus (inspiré d’vn mouuement superieur)
-- 5 --
de me transporter secrettement en Catalogne,
où i’ay reconnu manifestement que le dessein du
Cardinal a esté, non pas de conseruer en aucune
façon cette principauté, la considerant si vtile &
necessaire à l’exaltation & seureté de cette Monarchie.
Mais comme il ne pouuoit entreprendre manifestement
vn tel dessein, sans qu’il descouurit
la mauuaise affection qu’il auoit pour la Couronne
de France, il tascha d’introduire vne espece
de gouuernement en icelle Principauté, qui en
l’exterieur auroit des apparences d’vne grande Iustice,
& seroit conuenable pour sa conseruation :
mais qui en l’interieur seroit remply de cõfusion,
obligeant auec icelle & les effets que produiroit,
les Catalans desesperez, de retourner d’eux mesmes
à l’insupportable & tyranique joug de Castille,
affin que de cette maniere il peust obtenir sa
fin desirée, & ne peust en aucun temps estre repris
de la France.
Mais encore qu’il ait procedé auec tant d’artifice
en ce gouuernement, il n’a pû faire en sorte
que les Catalans ne luy ayent fait paroistre peu
d’amitié & de confiance, le voyant negligent à la
conseruation d’vne principauté si importante, &
que ceux qui penetrent d’auantage dans les matieres
d’Estat, n’ayent à bon droit douté de son intention,
que maintenant ils voyent puissament
deschifrée dans le gouuernement qu’il a tenu és
autres Prouinces de France.
La Catalogne a tant de fondement pour se
-- 6 --
plaindre, & faire vne anathomie des intentions
que le Cardinal a eu pour elle, que plusieurs cahiers
seroient necessaires pour les exprimer, toutefois
l’on en mettra quelques-vns des plus considerables,
qui sont ceux qui suiuent.
Anonyme [1649],
MANIFESTE OV RAISONNEMENT SVR LES AFFAIRES DE CATALOGNE, CONTRE LES INTRIGVES du Cardinal Mazarin. Traduit d’Espagnol en François. , français
Référence RIM : M0_2398. Cote locale : C_6_1.