PREDICTION
DE NOSTRADAMVS
SVR LA PERTE
DV CARDINAL MAZARIN
en France.

Extraite de la Centurie huitiéme, article neuf.

Voicy les termes de la Prediction.

 

A soustenir la grand’ Cape troublée,
Pour l’éclaircir les Rouges marcheront,
De mort famille sera presque troublée,
Les Rouges Rouges, le Rouge assommeront.

 

INTERPRETATION.

MAIS pour en auoir la claire intelligence,
il faut prendre chaque vers de la Centurie
à part, commençant par le premier, auquel
le Mazarin est designé par la grand’ Cape troublée,
& lequel porte en la qualité de Cardinal
vn long manteau de couleur rouge, qui luy

-- 2 --

descend iusques au dessous des talons ; mais auec
tout cela, il n’est pas sans estre agité en son esprit,
conformément à la prediction, qui dit
qu’il est troublé.

 

Le second vers, nous fait voir que son trouble
vient de ce que Nosseigneurs du Parlement
designez par ce mot de Rouges (à cause de la longue
robe rouge, dont ils sont affeublez) s’assemblent
tous les iours, & depuis trois mois ils n’ont
fait qu’aller & venir tant à sainct Germain en
Laye, qu’au Palais Royal, pour descouurir ses
desseins & maluersations de son Ministere : Car
le Vers porté que pour l’éclaircir ils marcheront.
Et de faict ils ont tant marché, qu’ils tiennent le
Loup par l’oreille.

Le troisiesme Vers nous represente qu’en suite
de ce vn Conseiller, qui opinoit dans le Parlement,
au sujet & en faueur dudit Mazarin, y
est mort si soudainement, qu’vn chacun en a esté
estonné, & sa famille toute troublée, comme
porte le Vers.

Le dernier Vers menace d’vne Catastrophe
estrange ledit Mazarin, lors qu’il l’aduertit que
les Rouges Rouges duplicatiuement pris, assommeront
le Rouge ; c’est à dire, qu’infalliblement

-- 3 --

ils le perdront. Et desia il est perdu d’honneur,
quand mesme il viuroit encore vn siecle.

 

Or ne s’en faut il pas estonner, pource que
comme Dieu a reuelé à ses Prophetes l’estat de
l’Eglise Militante, & tout ce qui luy doit arriuer
infalliblement iusques à la fin des siecles : Aussi
comme Gouuerneur de l’Vniuers, il denonce à
l’auance & quand il luy plaist par ses seruiteurs
les desordres qui doiuent arriuer dans les Gouuernemens
des Estats, dans les reuolutions &
changemens des Royaumes & des Empires,
aux fins de fermer la bouche aux Impies qui
osent dire : Non videbit Dominus, nec intelliget
Deus Iacob.

-- 4 --