Les Medecins & les Naturalistes iugent de la santé ou
de la maladie de la personne, par sa langue : & nos paroles
sont les vrais indices des qualitez de nos ames. Par tes paroles
tu seras iustifié, & par tes paroles tu receuras vne condamnation

sans appel quelconque. La bouche du iuste meditera la Sapience,
& sa langue fera son iugement dans l’eternité des siecles.
Si quelqu’vn ne peche point en paroles, c’est vn homme
de Dieu, & ie trouue qu’il a toutes les vertus les plus excellentes.
Gardez vous donc bien de perseuerer dans l’enormité
de ces crimes ; car le souuerain Scrutateur des
cœurs, vous fera rendre compte de la moindre de vos pensées.
Les traits que vous lancez par vne langue veneneuse,
donnent la mort eternelle à celuy qui s’en sert, & le rendent
plus malheureux que tous les Demons ensemble.
Comme la mort temporelle s’empara de toute la posterité
des hommes, par la desobeïssance de nostre premier pere,
ainsi la mort eternelle s’emparera de tous les médisans, par
le mépris qu’ils font des Commandemens du Sauueur du
monde. Celuy qui penetre iusques au fonds de nos ames,
nous apprend que de l’abondance du cœur la bouche parle.
Le diuin Apostre sainct Paul, ne veut pas seulement que
l’on nomme les choses indecentes & folles ; Parce, dit-il,
qu’il n’est rien qui corrompe tant les bonnes mœurs, que les mauuaises
paroles. Et nos nouueaux Politiques ne se contentent
pas de les inuenter & de les dire, mais encore ils prennent
plaisir à s’estudier d’en faire le debit de bonne grace. Ainsi
plus vn mauuais discours est embelly de toutes les graces
les plus affectées de l’eloquence, plus il penetre dans le
cœur, & plus il surprend l’esprit de l’homme.