ENSEMBLE LA LISTE DE
tous les Officiers de son Armée.

LE Mercredy dix-septiesme Mars, on
apprit que le sieur de Sandouuille alloit
loger à Harfleur ville considerable
pour ses fossez, & pour estre vn
passage necessaire pour les aproches du Haure
tant à cause de sa situation sur la riuiere de Seine
du costé du Midy, de Montiuillier au septentrion
de Roüen au leuant, & du Haure au couchant,
du gouuernement duquel ledit Harfleur
despend.

Le sieur de Sandouuille auoit quarante a cinquante
cheuaux, le gouuerneur du Haure donna
ordre que la Compagnie du sieur du Parc
allast se ietter dans Harfleur assisté des sieurs
de Lisle & Preboys Lieutenant & Enseigne, &

des nommez Lespine & des Sauoyrs Sergents.
On croyoit que les Bourgeois de Harfleur soustiendroient
& empescheroient l’entrée dusieur
de Sandouuille que Monsieur de Longueuille
enuoyoit, mais on ne sçauoit pas que les
sieurs du Bocault & de Saint Vallery venoient
auec deux mille hommes pour se saisir de ce
poste auancé & considerable pour la ville du
Haure :

Le Samedy vingtiesme le sieur Boilefevre
Capitaine du Regiment d’infanterie du sieur
du Bocault, fit sommer Harfleur de receuoir
leurs troupes, autrement qu’il ne leur dõneroit
aucun quartier, les habitans capitulerent & cependant
enuoyerent au haure aduertir de ce
qui se passoit.

On tint conseil de guerre, & on iugea à propos
d’enuoyer du secours parce qu’il seroit
honteux qu’vne ville despendante du gouuernement
du Haure, & à la portée du canon de sa
Citadelle fut prise sans du moins tesmoigner
qu’on estoit en estat de ne rien craindre.

On tira donc de la ville & Citadelle deux
cents cinquante hommes sous la conduite des
sieurs de Beauplan, Iassac Capitaines, & les
sieurs Beauregard, & la Guillotiere Lieutenãts,

mais estans proches de Harfleur ayant descouuert
quelque Caualerie, l’espouuante les saisit,
& se ietterent dans le Marets auec telle confusion
& desordre qu’ils ne peurent se retirer au
Haure qu’à dix heures du soir, il est vray que la
garnison n’estant entretenuë comme du temps
du deffunct Cardinal, les Officiers qui y commandent
sont plutost retirez dans ce lieu pour
profiter de la vente du sel que pour se mettre en
estat de seruir.

Le mesme iour sur les cinq heures du soir la
compagnie du sieur du Parc se rendit à discretion,
les soldats au nombre de hoctante furent
menez au Chasteau de Tancaruille, & les Officiers
à Roüen.

En suite les compagnies de l’armée de Monseigneur
de Longueuille furent mises dans le
voisinage de Montiuiller, dont le sieur de Breteui
le Fresquiennes, Gentilhomme de Monseigneur
de Longueuille, & Commissaire general
de ses troupes en ayant pris quelques vnes, alla
assieger le Chasteau du sieur de Fontaines Martel
sur Bollebec dans lequel il prit cinq pieces de
Campagne lesquelles il fit conduire à Roüen le
Mercredy vingt-quatriesme du Courant.

Le Mercredy la nuict qu’il est sorty quatre

mille hõmes de Roüen par la porte Cauchaise,
on apprendra auec le temps ce qu’ils auront entrepris
Le mesme iour on fit reueüe des troupes
qui sont aux Faux-bourgs de Roüen, dont les effectifs
se trouuent monter à cinq mille hommés
sans comprendre ceux qui sont sortis.