PROTESTATION CONTRE LA
premiere demission

-- 1 --

NOVS CESAR DVC DE VENDOSME, Gouuerneur
& Lieutenant general pour le Roy en Bretagne,
auec tous droits & pouuoir d’Admirauté audit pays,
reconnoissons & declarons que bien que le iour d’hier
19. de ce present mois de Decembre, ie me sois desmis
par escrit & par Acte passe pardeuant du Chesne & Taçonnet Notaires
au Chastelet de Paris, ce neantmoins ce que i’en ay fait n’a
esté que par force, ce qui se peut aysement croire, si l’on considere
que ladite demission a esté faite dans la prison du Donjon du Bois
de Vincennes où ie suis encor à present retenu : où depuis pres de
cinq ans qu’il y a que i’y ay esté mis, i’ay souffert tous les tourments
& violences imaginables, & desquelles l’on m’a fait dire que ie ne
pouuois me garantir & obtenir ma liberté, qu au prealable ie
n’eusse baillé madite demission : contre laquelle ie proteste de me
pouruoir en temps & lieu & lors que le Roy sera hors de l’obcession
de Monsieur le Cardinal de Richelieu, seul autheur de mon iniuste
prison & de la ruine presque entiere de ma maison, l’authorité duquel
m’a forcé à faire ladite demission & à faire cette protestation
simplement de ma main, ne l’osant confier à nul Notaire, ny faire
reconnoistre à ceux qui ont passé ladite demission, de peur qu’ils
ne conneussent mon dessein, qui estant sçeu me priueroit & de la
liberté & me continuëroit dans ma misere, comme aussi dans l’infaillible
ruine de ma maison, de ma femme & de mes enfans :
c’est ce qui m’empescha dés hier de faire la presente, ioint que ie
desirois d’auoir des Notaires soubs signez, par deuant lesquels i’ay
fait faire la reconnoissance cy dessous transcripte & si iointe, pour
me seruir du tout moy & les miens selon ce que nous verrons bon
estre en foy dequoy i’ay escrit & signé la presente protestation &
declaration de ma main que i’ay voulu estre certifiée & approuuée
par ma femme. Fait au Donjon au Chasteau du Bois de Vincennes
ce vingtiesme Decembre de l’an mil six cens trente entre dix &

-- 39 --

vnze heures du matin. Ainsi signé CESAR DE VENDOSME.

 

Nous Françoise de Lorraine, Duchesse de Vendosme, certifions
à tous ceux qu’il appartiendra, que Monsieur mon mary
a escrit & signé de sa main le present papier, contenant la veritable
declaration de sa volonté & de la mienne sur l’affaire de laquelle
il traitte, laquelle en tout & par tout nous approuuons, en
foy dequoy nons auons escrit & signé de nostre main le present.
Fait au Donjon du Bois de Vincennes ce 20. Decembre 1630. Ainsi
signé Françoise de Lorraine.

Aviourd huy est comparu pardeuant moy Gardenotte du Roy
nostre Sire au Chastelet de Paris soubs-signez, Monseigneur
Cesar de Vendosme, Duc dudit Vendosme, de present estant au
Donion du Chasteau du Bois de Vincennes, lequel a declaré & recogneu
auoir escrit & signé ce iourd’huy l’escrit cy-deuant, & de
l’autre part, contenaut deux feüillers, celuy compris, & que le contenu
en iceluy escrit en son intention & volonté, qu’il veut & entend
sortir son plein & entier effet : ce fait du consentement & approbation
de Madame Françoise de Lorraine, Duchesse de Vendosme
son espouse, de luy authorisée pour l’effet des presentes, laquelle
a aussi declaré & declate qu’elle a escrit & signé la reconnoissance
par elle faite de l’autre part, promettans, obligeans &
respectiuement renonçans. Fait & passé audit Donion de Vincennes,
presens Gabriel de Longueual Escuyer, & Escuyer de Monseigneur,
de Pierre Forget son valet de chambre, & de François
Iutet Praticien à Paris, le Vendredy auant midy 20. Decembre mil
six cens trente. Et ont signé Cesar de Vendosme, Françoise de
Lorraine, de Longueual, Forget, Iutet Praticien & Iutet Notaire.

-- 40 --