LEÇON II.

La seconde Leçon contient l’obeïssance que l’on doit
au Roy, non pas aueugle, mais conformément aux Loix de
Dieu, aux Regles de l’Euangile & de l’Eglise Catholique,
Apostolique & Romaine. Car comme les Rois sont des
Lieutenants de Dieu pour la conduite des hommes, c’est
de luy & non pas d’eux mesmes qu’ils doiuent prendre les
Loix & les Ordonnances necessaires pour leur conseruation.
Et comme l’ame est plus precieuse que le corps, &
l’interest du salut preferable à celuy de la fortune, les maximes
de la Religion doiuent estre les regles de celle de la
Politique ; si bien que tant que les Rois commandent des
choses qui ne choquent pas le salut, les Sujets sont tenus
d’obeyr : mais deslors qu’ils passent les bornes, Saint Pierre
nous apprend la response que nous deuons faire, Qu’il n’y a
point à apparence de rendre de l’obeissance aux hommes au preiudice
de celle que nous deuons à Dieu : D’où resulte que vous auez
tort d’appeller les Peuples de Paris desobeïssants, puis
qu’il a tousiours obey au Roy selon les ordres de la saincte
Escriture.