Anonyme [1649], SIGNE PRODIGIEVX D’VNE COMMETTE apparu dans la Champagne, au grand estonnement de tout le peuple. , françaisRéférence RIM : M0_3673. Cote locale : C_10_12.
SubSect précédent(e)

SIGNE PRODIGIEVX
d’vne Commette apparu
dans la Champagne, au
grand estonnement de
tout le peuple.

LA Terre a bien occasion de trembler,
quand le Ciel qui la domine
par ses influences ce courouce & la menace.
Il est temps que les plus hardis baissent
leurs espaules, & fassent ioug à la
puissance qui leur commande. Car c’est
vn Dieu qui par ces signes effroyables parle
sans dire mot, & qui en sçait vser à propos ;
Comme il void que plus nous allons
en auant nous l’offensons dauantage, plus
redouble il ces aduertissemens par des signes

-- 4 --

prodigieux pour nous faire songer
à nostre conscience.

 

C’est donc chose estrange & prodigieuse
d’vne Comette qui a esté veuë dans
la Champagne à trois lieues de Rheims, ie
ne sçay si iamais Signe a paru de la sorte,
qui peut dauãtage apporter de la frayeur,
les habitans du lieu faisoyent la garde
pour éuiter quelques courses de soldats
dont le pays est remply à cause de la diuision,
qui regnent a present dans la France
par le conseil d’vn mauuais Ministre.
Sur les dix heures du soir, vn de la compagnie
regardant en haut, qu’est-ce cy se
prist il à dire, s’arrestant tout estonne de
ce Signe prodigieux, en suitte les autres
leuerent les yeux au Ciel auec grand
estonnement & frayeur, cette Commette
fut veuë l’espace d’vne heure de la
façon qui s’ensuit.

Premierement il paru vne grosse boulle
de feu, laquelle fut veuë l’espace d’vn
petit demy quart d’heure, puis vint à ce
fendre en deux, il paru en mesme temps

-- 5 --

vne ville, mais ce qui est a remarquer
c’est qui fut veu vn Dragon, d’vne grosseur
effroyable, lequel fit vn tour au tour
de la ville faisant mine de vouloir entrer
dedans, sur ces entrefaites il sorty de la
ville vn Caualier escorté de plusieurs personnes,
ou sut veu comme s’ils vouloient
combatre contre ce Dragon, comme en
effet il y eut combat, & sembloit voir plusieurs
morts, mais le Caualier reprenant
courage terrassa le Dragon puis disparu
petit a petit, il y a tesmoings occulaire de
personnes dignes de croyance la relation a
esté enuoyée à Paris par vn homme croyable,
ie l’airray l’explication de cette Commette
au iugement d’vn chacun, attendant
la conuersion d’vne grande Dame.

 

Comme ie faisois recit de ces choses à
vn homme versé dans l’Astrologie, l’en
tiray à plus pres le sens, me disant que cette
grosse boulle de feu representoit la
France, & venant a ce fendre en deux que
s’estoit la diuision qu’il y auoit par toutes
les Prouinces, Cette ville qui paroist c’est

-- 6 --

Paris, ce Dragon represente le siege qui
doit estre mis deuant, le tour qu’il fait au
tour, c’est pour empescher qu’il n’entre
point de viures dans la ville. Ce Caualier
qui sort de la ville escorté de plusieurs personnes :
c’est ce Grand Duc de Beaufort
auec les habitants lequel Duc de Beaufort
gagnera la victoire sans neantmoins
grande perte de plusieurs personnes lesquelles
laisserons la vie.

 

Sy donc nostre fin est si proche, & s’il
est vray que nostre ennemy doit bien tost
arriuer pour nous saccager, armons nous
premierement de prieres enuers Dieu, &
le supplions qu’il appaise son ire, & qu’il
touche le cœur de la Reine qui luy fasse
la grace de reconnoistre en quel estat est
la France, & quelle laisse ce malheureux
qui a ensorcelé la France, & qui la deuore
iusques aux entrailles. Fidelles François prenez
courage reueillées vous, donnez
ordre de bonne heure pour euiter le
desordre qui doibt arriuer. Courez apres
ce Dragon d’Italie, qui a rauy nostre bon

-- 7 --

Roy, François ou est ton cœur, ou est
ton courage, y a t’il pas asses long temps
qu’il est captif, allons le deliurer, apres
cette deliurance la France sera en vn repos
eternel, l’on ne verra plus de diuisions,
plus de mescontentemens ny de debats,
l’on ne parlera plus de miseres.

 

Ie prie Dieu qu’il nous fasse cette grace
de viure en repos, & de regarder la
France en pitié.

-- 8 --

SubSect précédent(e)


Anonyme [1649], SIGNE PRODIGIEVX D’VNE COMMETTE apparu dans la Champagne, au grand estonnement de tout le peuple. , françaisRéférence RIM : M0_3673. Cote locale : C_10_12.