Anonyme [1650], TRIOLETS pour le temps present. , françaisRéférence RIM : M0_3861. Cote locale : D_2_43.
TRIOLETS pour le temps present. A PARIS,
LA belle rafle qu’on a fait : De Condé, Conty, Longueville, Le triumvirat est defait ; La belle rafle qu’on a fait, Du preux, du fin, du contrefait, Plus fin qu’eux n’est pas mal habile, La belle rafle qu’on a fait, De Condé, Conty, Longueuille.
O Dieu ! le ioly triolet, Que la Reine a fait dans Vincennes, Qu’il est hardy qu’il est complet, O Dieu ; le ioly triolet Si le quadrain estoit parfait, Nous serions deliurez de peines, O Dieu ; le ioly triolet, Que la Reine a fait dans Vincennes.
On a veu passer le Suichet, Vn Ours, vn Regnard, & vn Singe Qui furent pris au trebuchet, On a veu passer le Suichet, La troupe que l’on denichoit, Par Guitaut, Miossans & Cominge, On a veu passer le Suichet, Vn ours ; vn regnard, & vn singe.
Tous les François en sont ioyeux, Vn chacun reprendra courage, Aucun ne se trouue pour eux, Tous les François en sont ioyeux, On ne s’en trouuera que mieux, En deussent-ils creuer de rage, Tous les François en sont ioyeux, Vn chacun reprendra courage.
Prince le plus grand des rusez, Vous auez fait vne besueuë, Prenant le lieu des accusez
Vous vous estes deux fois mespris : Certainement c’est grand vergogne, Prendre Charenton pour Paris, Vous vous estes deux fois mespris, Certainement vous estes pris. Croyant de tenir la Bourgogne, Vous vous estes deux fois mespris Croyant de tenir la Bourgogne.
Braue Condé ie vous promets, Qu’on veut gratifier vos peines, Et que vous aurez à iamais Braue Condé ie vous promets, Où vous reposer desormais Ce plaisant Chasteau de Vincennes, Braue Condé ie vous promets Qu’on veut gratifier vos peines.
On voit la fronde avoir gagné Par les soins de son Eminence, Sa prudence a tout espargné, On voit la fronde auoir gagné, Que iamais on l’eust deuiné, Ie suis esbahy quand i’y pense, On void la fronde auoir gagné Par les soins de son Eminence.
Beaufort & Condé n’ont qu’vn sort Ils sont logez à la pareille, L’vn entre au lieu de l’autre sort, Beaufort & Condé n’ont qu’vn sort La fortune n’a point de tort, Nous faisant voir cette merueille,
Cette année de Iubilé Est tres heureuse pour la France Le grand flatteur est exilé Cette année de Iubilé, Et sera beaucoup exalté Le chapeau de son Eminence, Cette année de Iubilé, Et tres-heureuse pour la France,
En ce temps sans faire grand froid, On a veu la Riuiere prise Et se loger plus à l’estroit, En ce temps sans faire grand froid, On feroit bien si l’on chassoit Cet habille homme sans remise ; En ce temps sans faire grand froid, On a veu la Riuiere prise
Que voicy d’estranges succés Les plus puissans sont en mal aise, Hors de Cour entrant en procés, Que voicy d’estranges succées Le mal pour n’estre dans l’excez Est puny ne leur en desplaise Que voicy d’estranges succés Les plus puissans sont en mal aise
Viue Louys viue Beaufort, Viue Mazarin & la fronde Nous n’aurons plus peur de la mort, Viue Louys, viue Beaufort, Les traistres ne feront point tort, A l’entour d’eux on fait la ronde, Viue Louys, viue Beaufort, Viue Mazarin & la Fronde
FIN. | |||
| Section précédent(e)
|