Anonyme [1649], VNION DE LA NOBLESSE DE FRANCE, Touchant leurs Préminences. , françaisRéférence RIM : M0_3906. Cote locale : C_10_56.
SubSect précédent(e)

VNION
DE
LA NOBLESSE
DE FRANCE,

Touchant leurs Préminences.

NOVS SOVS-SIGNEZ,
Pour obuier aux diuisions qui
pourroient naistre la marque
d’honneur extraordinaire
qu’on tesmoigne vouloir accorder à quelques
Gentils-hommes & Maisons particulieres,
au prejudece de toute la Noblesse de
ce Royaume, & notamment de plusieurs des
plus signalez de cet Ordre, lequel pour estre
le vray & plus ferme appuy de cette Monarchie,
doit estre par tous moyens conserué
dans vne parfaite Vnion, sans qu’on laisse
establir aucune difference des Maisons,
AVONS declaré par ces Escrit, juré & promis
vnanimement sur nostre foy & nostre

-- 4 --

honneur, qu’apres auoir fait nos tres-humbles
Remonstrances à Sa Majesté, à son Altesse
Royalle, & à Nosseigneurs les Princes
du Sang ; Et au cas qu’elles ne soient suiuies
de l’effet que nous esperons de leur Iustice,
Nous tascherons par toutes sortes de voyes
& de ressentimens justes, honnestes & genereux,
& qui n’iront point contre le seruice
du Roy, que semblables distinctions n’ayent
lieu : Consentans que celuy de nous qui s’esloignera
de la presente Vnion, soit reputé
homme sans foy & sans honneur, & ne soit
point tenu pour Gentilhomme parmy nous.
Seront suppliez de nostre part tous les Gentilshommes
du Royaume absents de s’vnir
auec Nous par Deputez, pour maintenir l’Interest
general de toute la Nobleste, & joindre
leurs tres-humbles Supplications aux nostres.
Le present Escrit a esté signé sans distinction
ny difference du Rang & Maisons,
afin que personne n’y peust trouuer à redire.
DE PLVS, promettons que si quelqu’vn
des Sous-signez & Interessez est troublé &
attaqué en quelque sorte que ce soit dans la
suitte de cet Affaire, Nous prendrons ses interests,
comme communs à tous en general
& en particulier, sans nous en pouuoir se parer

-- 5 --

par aucune consideration : Et sera declaré
infame & sans honneur celuy qui en vseroit
autrement. En expliquant ce dernier article,
sur le sujet de l’Affaire dont il s’agist, & pour
lequel nous nous sommes assemblez, qu’aucun
de ceux qui se sont vnis, soit par mauuais
office ou autrement, tombe dans le malheur
d’estre attaqué en sa personne, sa liberté
ou ses biens, tous les autres s’obligent, sur
peine d’vne honte publique & perte de leur
reputation, de faire toutes les choses necessaires,
pour le tirer de l’estat auquel il se seroit
mis pour l’interest de leur cause commune,
jusques à perir plustost qu’il restast opprimé.

 

S’ENGAGENT non seulement sous les
mesmes conditions de leur honneur, de s’opposer
dans l’occasion presente, pour empescher
que nul n’obtienne les priuileges des
Princes, qui n’aura pas cet aduantage par la
naissance : Mais encores promettent de former
à l’aduenir les mesmes oppositions, afin
qu’aucun sous quelque qualité, ou sous
quelque pretexte que ce puisse estre, n’estant
pas né Prince, ne paruienne à vne semblable
prérogatiue, qui seroit vne distinction injurieuse
à la Noblesse, principalement entre des

-- 6 --

personnes dont les conditions ont tousiours
esté egales, & de qui les Predecesseurs ont
tenu le mesme rang & veseu sans se deferer
les vns aux autres, ni dans la Cour, ni dans
les Prouinces.

 

PROTESTENT aussi & s’engagent sous
leur mesme parole & sur leur honneur, de ne
se point retirer de la foy qu’ils se sont donnée
les vns aux autres, & pour cet effet d’alleguer
aucunes excuses, pretextes ni raisons qui les
puisse directement ou indirectement separer
de l’association generalle & particuliere que
porte cét Escrit, qu’ils ont signe pour le
maintenir inuiolable dans toutes les articles
qu’il contient, & courir tous la mesme fortune.

PROMETTENT pareillement de ne se
point desister de la poursuitte qu’ils ont entreprise
qu’ils n’ayent receu la satisfaction
qu’ils doiuent legitimement esperer de la
bonté & de la Iustice de Leurs Majestez, ou
exemples & constitutions de ce Royaume,
ne s’escluans point de se pouruoir où ils jugeront
bon estre par lés moyens que l’Assemblée
trouuera justes & raisonnables.

Et ont signé, Orual, Saint-Simon, la Vieu-ville,

-- 7 --

Vassé, Vardes, Lenville, Montresor,
Orual, Cœuures, Brancas, Pontenac, Clermont,
le Cheualier de Cadroux, Beauxoncles,
Ligny, Tunes, Spineal, Tounerre, Argenteuil,
Louis de Mornay, Villarceau, la
Vieuville, Montmorency, Roussillon, Sauignac,
de Bethune, Humieres, Hautefort,
Cheauuieux, de Vienne, la Vieuville, Saint-Simon
Commandeur de Cauion, de Rouxel,
Demédaui, de Lhospital, de Crauant, Seguier,
le Cheualier de la Vieuville, de Ragimost,
Dalluye, Marginoit, Fontan, Montignac,
de Hautefort, Daspremont, Vandy,
de la Chapelle, Argenteuil, Tiboust, de
Bourg, Longy, Morel, le Vigny, Rouillé,
Saint-Simon le Commandeur, Daubray, Moreuil,
Marel, le Commandeur de Leuigné,
Saugeon, Longis, de Clermont, Monglas,
Canaples, Surgille, Mauleurier, Gost, d’Albret.

 

-- 8 --

SubSect précédent(e)


Anonyme [1649], VNION DE LA NOBLESSE DE FRANCE, Touchant leurs Préminences. , françaisRéférence RIM : M0_3906. Cote locale : C_10_56.