La Mère de Dieu, Pierre de (dit Bertius, Abraham) [1647], LES VERTVS ROYALES D’VN IEVNE PRINCE. , français, latinRéférence RIM : Mx. Cote locale : B_1_1.
SubSect précédent(e)

SubSect suivant(e)

AV ROY.

SIRE,

Si les Royales Vertus
sont hereditaires
en France, comme le
Sceptre, & la Couronne,

-- 4 --

il faut dire que
VOSTRE MAIESTÉ les possede
toutes dés sa naissance ;
puis qu’elle a le
bon-heur de descendre
des plus Augustes,
& des plus Vertueux
Monarques de
l’Vniuers : Si les signes
visibles sont les marques
des inuisibles, &
si des choses corporelles
nous tirons vn

-- 5 --

iugement certain des
spirituelles ; Dieu ayãt
fait present à V. MAIESTÉ
d’vn corps tres-accompli,
& dont les regards
iettent l’amour,
& le respect dans les
cœurs de ses subiects :
il faut encore dire que
la Diuine Sagesse n’aura
pas manqué d’acheuer
son ouurage, en
luy donnant vne ame

-- 6 --

toute Royale, & disposée
au gouuernement
des peuples.

 

Il peut arriuer,
SIRE, que les Princes
ne succedent
point au courage de
leurs Ayeuls cõme ils
heritent de leurs Sceptres,
& les enfans des
Roys peuuent degenerer
des vertus de
leurs Peres ; puis qu’elles

-- 7 --

sont toutes personnelles,
communiquées
d’en-haut, ou
acquises par le trauail
des Souuerains : Mais
pour V. MAIESTÉ, il semble
qu’elle soit née
auec la capacité que
les autres ne peuuent
acquerir qu’auec peine,
que le iugement
luy soit venu auec la
parole, & que son esprit

-- 8 --

ait meuri, sans attendre
le secours des
temps, ny le trauail de
l’estude ; la nature luy
ayant liberalement
accordé, ce que les
peuples luy souhaittent
auec passion, &
ce qu’elle merite de
posseder par succession,
& par naissance.

 

I’imite donc les peintres,
qui nous font

-- 9 --

voir dans leurs tableaux,
les éminentes
perfections de la Sacrée
Personne de V.
MAIESTÉ, & mettant au
iour les Royales Vertus
d’vn ieune Prince,
il m’est aduis que ie la
represente, & que c’est
de sa Religion que ie
traitte, que c’est de sa
Iustice, de sa Clemence,
de sa Douceur, de

-- 10 --

sa Generosité que ie
tire les lineamens : &
que toutes les vertus
crayonnées dans cet
ouurage, sont placées
dans son cœur, pour
en produire vn iour
les veritables efféts.

 

Ie prie donc V. MAIESTÉ
d’agreer ce tableau racourcy
des Royales
Vertus d’vn ieune
Prince, & de regarder

-- 11 --

d’vn œil fauorable,
cette trouppe des maistresses
perfections de
grace, & de nature,
qui frappent à son Palais,
& font presse
pour entrer, & pour se
placer dans son cœur,
où elles ont estably
leur Thrône : & ie m’asseure
qu’elles y continueront
leur seiour
ordinaire, à l’hõneur,

-- 12 --

& à la gloire de la Monarchie
de France. Ce
sont les veritables souhaits
de celuy, qui employe
ses vœux, ses
prieres, & ses sacrifices,
pour la prosperité
de sa Sacrée Personne,
& qui s’estime
heureux d’estre toute
sa vie,

 

SIRE,

DE VOSTRE MAIESTÉ.

Le tres-humble, tres-fidele, &
tres-obeissant suiet, & seruiteur.

FR. PIERRE DE LA MERE DE DIEV,
Carme Deschaussé dit BERTIVS.

De nostre Conuent de S. Ioseph. de Paris ce premier. Ianuier. 1647.

-- 13 --

SubSect précédent(e)

SubSect suivant(e)


La Mère de Dieu, Pierre de (dit Bertius, Abraham) [1647], LES VERTVS ROYALES D’VN IEVNE PRINCE. , français, latinRéférence RIM : Mx. Cote locale : B_1_1.