NOS AMEZ ET FEAVX, Ayant esgard
aux diuerses Instances qui nous ont esté
faictes pour nostre retour en nostre bonne
Ville de Paris, & voyans à present
que les affaires qui nous auoient donné
sujet de nous aduancer vers nostre Frontiere
de Picardie, ne requierent plus nostre presence par
deça ; nos Armées de Flandres ayaus passe la Riuiere de
l’Escault, à la veuë de celle des ennemis commandée par
l’Arçhiduc en personne, quelles ont obligé de se retirer
auec perte & confusion, & ayans fait de nostre part toutes
les choses necessaires pour reprendre la Conference
du Traicté de la Paix, entre cette Couronne & celle d’Espagne
que les Espagnols auoient rompuë à Munster en
faisant retirer le principal Plenipotentiaire du Roy Catholique,
Nous auons estimé auec l’aduis de la Reyne
Regente nostre tres-honorée Dame & Mere que
rien ne pouuoit plus retarder nostre retour à Paris,
& nous aurions resolu de nous y rendre l’vn des
iours de la semaine prochaine, ce que nous auons
bien voulu vous faire sçauoir par ceste Lettre, comme
vne chose de laquelle nous auons bien iugé que

vous receurez beaucoup de joye, vous asseurant
tousiours de nostre affection pour vostre Compagnie,
& la presente n’estant pour autre fin, nous ne vous
la ferons plus longue. Donné à Compiegne le onziesme
iour d’Aoust mil six cens quarante-neuf.
Signé, LOVYS Et plus bas. LE TELLIER.

Et sur la souscription est escrit.

A nos Amez & Feaux Conseillers les gens tenans nostre
Cour des Aydes à Paris.