M. L. [signé] [1650], LETTRE OV EXHORTATION d’vn Particulier A MONSIEVR LE MARESCHAL DE TVRENNE, Pour l’obliger à mettre bas les armes. , françaisRéférence RIM : M0_2249. Cote locale : D_2_38.
Section précédent(e)

LETTRE
OV
EXHORTATION
d’vn Particulier
A MONSIEVR
LE MARESCHAL
DE TVRENNE,
Pour l’obliger à mettre bas les armes.

A PARIS,
Chez SEBASTIEN MARTIN, ruë S. Iacques, à l’Enseigne
S. Iean l’Euangeliste, deuant les Mathurins.

M. DC. L.

-- 3 --

-- 4 --

LETTRE
OV
EXHORTATION d’vn Particulier à Monsieur
le Mareschal de Turenne,
pour l’obliger à mettre bas
les armes.

MONSIEVR,

Ceux qui ne craignoient pas de se vanter
de la cognoissance des choses humaines,
& qui croyoient outre la conduite de
leurs familles particulieres entendre encores
quelque chose au gouuernement de
l’Estat, auoient persuadé par l’apparente force de leurs belles
raisons, qu’apres la prise du Prince de Condé nous deuions
esperer vne tranquilité publique aussi longue & aussi
entiere que sa detention le seroit. Ils nous auoient fait conceuoir
les douces esperances qui flattoient le peuple Romain à
la mort du cruel Neron : & apres la Prison de ce Prince à qui

-- 5 --

le peuple irrité auoit donné ce nom plein d’infamie, ils n’auoient
pas oublié de nous dire la même chose que dit dedans
le Capitole cette corneille qui par la vn peu auant la mort de
Domitian, TOVT IRA BIEN. Et certes, de si bonnes
nouuelles n’auoient pas manqué de faire leurs douces impressions
dessus nos esprits, & comme il ne se trouue gueres
personne qui ne se porte à croire facilement ce qu’il souhaitte,
cette tranquilité estant generalement souhaittée les promesses
qu’on nous en faisoit estoient vniuersellement receuës.
Les apparences ne manquoient pas d’augmenter nostre
credulité, & outre que nous deferions beaucoup au
sentiment des entendus & des sages, nous-mesmes nous fortifions
cette croyance par les certitudes que nos pensées nous
en donnoient.

 

Nous disions que le Prince de Condé auoit formé vn party
contre l’Estat, ou ne l’auoit pas fait. Que s’il ne l’auoit pas formé,
nous n’auions doncques rien à craindre, que quand mesme
il l’auroit fait dans sa liberté, sa detention le dissipperoit ;
& qu’ainsi de tous les costez la tranquilité estoit apparente.
Que le vent estant abattu nous ne deuions plus paslir de la
tempeste, & que le bois de Vincennes estant comme la peau
de Bœuf dans lequel nostre Vlisse tenoit les aquilons renfermez,
nous allions dessous sa conduite voguer sans peril de
naufrage.

Mais quoy ! nous experimentons auiourd’huy qu’il ny a
rien dedans le monde de plus incertain que ce qui nous fait
voir le plus de certitude. Le iugement de l’homme ce trompe
quasi en toutes sortes de rencontres, & les plus subtiles
preuoyances de l’esprit ne sont que comme ces fausses imaginations
qui representent à nos yeux des phantosmes blancs
dedans l’horreur des tenebres. Ce que nous croyons auoir
vû dedans l’aduenir, est de la nature de que nos yeux y
croyent voir dedans le present, nous pensons que c’est quelque
chose & ce n’est rien ; & apres que nous nous persuadons
d’auoir bien vû, d’auoir bien raisonné, nous recognoissons
aussi-tost nostre obscurité & nostre ignorance. Car, enfin,

-- 6 --

Monsieur, nous croyons estre en paix, & vous nous faites la
guerre. Nous pensions qu’apres la cheute du chef il ny auroit
plus de membre qui pûst rien entreprendre pour sa deffence,
& cependant, vous que l’on n’eust pas mesme creu estre de ce
Corps, vous faites des efforts pour en releuer la teste abatuë.
Certes, Monsieur, la nouuelle de vostre resolution m’afflige
pour le moins autant comme elle m’estonne ; & quand ie
considere & vos interests qui me sont chers, & ceux du public
qui me le doiuent estre encores dauantage, vos armes qui me
donnent beaucoup de terreur ne me font gueres moins de
pitié. Ie voy bien d’vn costé que vous pouuez en quelque
maniere porter du trouble & de l’esmotion dans le repos &
dans la tranquilité publique. Mais aussi ie ne considere pas
peu que vous allez ietter de l’obscurité dans l’esclat de vostre
renommée, & que vous deuenez tout à la fois ennemy de
vous-mesmes & de vostre païs. Ces grands déreglemens,
Monsieur, si contraires à vostre prudence ne peuuent estre
les mouuemens * naturels de vostre genie : il faut qu’il y ait
de l’inspiration du mauuais esprit dans vostre dessein. Il faut
que vous soyez poussé par cét Ange noir qui preside aux
troubles, & qui ne peut viure en repos (s’il m’est permis de
m’exprimer en ces termes) que dans la confusion & dans le
desordre de toute l’Vniuers. Ie cherche pour l’amour de
vous, & ie fouille dans tous les replis de ma raison pour
en trouuer quelqu’vne qui vous soit fauorable : Ie solicite
tout ce que i’ay de plus ingenieux pour mettre vostre dessein
dans vn beau iour, & tout ce i’ay de plus hardy pour le monstrer
aux hommes en quelque perspectiue qui vous soit auantageuse ;
Mais en vain, mon amitié me rend-elle de vostre
party, puis que maraison me deffend de le suiure, & dans le
soin qu’elle a de moy condamne ceux que i’ay pour vous.
Quoy qu’elle fasse toutefois, Monsieur, elle ne m’empeschera
pas de vous tesmoigner combien sans elle ie serois
vostre, & combien si vous estiez d’accord auec vostre vertu
vous disposeriez absolument de mon affection. Ie veux mesmes
vous seruir dedans ce rencontre, & porté par la force

-- 7 --

de mon inclination, si ie ne puis iustifier vos intentions, faire
mes efforts pour vous en distraire en les condamnant,
puis qu’aussi bien ie serois coupable de les approuuer.

 

Qui donc vous a mis les armes à la main sans les ordres
de vostre Prince ? ne sçauez vous pas bien que vous ne les
pouuez receuoir que de luy ? que celles que vous prenez
auiourd’huy sont estrangeres, puis qu’il ne vous les a pas
données, & que vous en seruant sans son congé vous vous
rendez l’ennemy de l’Estat. Ne me dittes pas que c’est la
cause publique qui vous arme, les armes que vous portez
ne sont point publiques, elles sont particulieres puis qu’elles
ne viennent pas de la main du Roy. Aussi le public vous
desaduouë, & par son esclattant & son solemnel desadueu,
vostre audace confonduë ne vous va laisser que la honte,
l’opprobre, & peut-estre encores le supplice pour fruicts
de ces illegitimes projets. Qui vous fait mesler de vouloir
estre le senseur dans cette Monarchie, & de reformer vn
Estat duquel vous n’estes que simple Sujet ? Quelle sorte
de gratification nous voulez vous faire, & quel bien deuons
nous attendre de l’imprudence de vos conseils, si
mesmes pour arrhes de la douceur de vos promesses vous
commancez par la ruine de nos freres, & par la desolation
de nos voisins ? Ie ne pense donc pas que vous voulussiez
me nommer la cause publique pour le veritable objet de
vostre armement. Qu’est-ce donc qui en est la cause ? est-ce
quelque interest particulier qui vous pousse ? puis qu’il
est trop seur que vous nous estes plus contraire que fauoble,
est-ce pour vous seul que vous entreprenez ? voulez-vous
butiner dans le trouble & dans le desordre que vous
voulez faire, & vostre souleuement est-il le dessein d’vn
cœur auare & ambitieux.

Si c’est là vostre but, ie vous plains d’auoir de si vaines
visées & de vous flatter d’vn si foible espoir. Pensez-vous
seul executer vos entreprises, ou vous imaginez-vous qu’au
gré de vostre phantaisie les hommes deuiennent vos esclauent
& vous seruent aueuglement ? c’est vne ridicule manie,

-- 8 --

que les Grands s’imaginent des Peuples, qu’ils sont le
joüet de leur caprice, & comme vn instrument mort dans
leurs mains, duquel ils disposent sans empeschement. Comme
leur orgueil les abaisse infiniment, ils s’imaginent qu’ils
doiuent s’abaisser de mesme, & comme des Cieux, les superieurs
entraisnent les inferieurs sans resistance, ne considerans
pas que tout le mouuement vient du premier mobile ;
sans auoir receu puissance du Souuerain ils s’imaginent
que tout les doit suiure. Mais ne sçauez vous pas, Monsieur,
combien cette imagination est fausse, & combien de fois
les plus grands hommes ont esprouué que ce peuple n’est pas
vne puissante morte, qu’elle est viuante : & que mesme souuant
elle a de tres-opiniastres & de tres-dangereuses volontez ?

 

Ie voy bien que vous prendrez de specieux pretextes.
Que vous caresserez cette beste furieuse ; que vous prierez
ceux que vous ne pouuez contraindre, & que vous tascherez
d’esblouyr de promesses ceux que vous sçauriez assuiettir
aux commandemens Mais pensez vous que le monde soit
borgne, ou plustost aueugle & ne voye goute ; & que le voile
que vous luy mettrez sur les yeux soit si espais qu’il ne puisse
pas descouurir la honte & le crime de vos desseins ? Il vous en
arriuera la mesme chose qu’à ces indiscrets cajoleurs, qui
donnent pour l’honneur d’vne femme mille sermens & de
belles paroles, & qui ne gagnent rien que des refus. Faites
tout ce que vous pourrez ; dites les plus belles choses du
monde, l’ameçon paroist sous l’apas & le piege proche de
l’amorce, & vostre voix sera tousiours redoutée, comme l’est
celle d’vne hiene qui n’appelle que pour deuorer. Chacun
se ressouuient encor & craint les maux qu’ont enduré nos peres,
& cette crainte est si soubçonneuse & si fine, qu’elle en est
clair-voyante & penetre tout. Comme les experiences se
multiplient tous les iours, les cognoissances se perfectionnent ;
tel à dix ans est plus raffiné auiourd’huy, qu’à trente on
ne l’estoit autrefois. C’est où ie voy certainement, Monsieur,
que vostre credulité sera trompée ; elle ne croit auoir a piper

-- 9 --

qu’vne populace ignorante & grossiere, mais elle la trouuera
toute des gens politiques & desniaisez. Ce siecle a inuenté
les lunettes d’approche, chacun s’en sçait seruir, & tout le
monde voit de loing.

 

CE BIEN PVBLIC, CETTE PVBLIQVE LIBER
TÉ, CE REPOS DE L’ESTAT, CE SOVLAGEMENT
DV PAVVRE PEVPLE, tout cela sont des refreins si vieux
qu’on s’en ennuye, le chant de la cigale n’est pas plus rude
aux oreilles des Moissonneurs. On voit bien qu’il y a de faux
tons & de faux accords dans cette musique : & cette perspectiue
n’est pas si parfaitement acheuée, qu’on n’en recognoisse
biẽ l’adresse, & qu’on ne prenne pour peinture & pour artifice
ce Ciel qu’on veust faire passer pour naturel. Vous auez à faire
à des gens, ou qui ont veu flotter, ou qui ont eux-mesme
si long temps flotté sur cette mer, où vous les voulez mettre,
qu’ils en cognoissent les vrays phares du premier regard, &
qu’ils voyent bien que les fausses lumieres que vous leur
monstrez les meneroient briser dans des escueils, & les exposeroient
aux pyrates. Ils sçauent trop que comme papillons
l’ardeur du flambeau que vous allumez leur seroit funeste,
quant mesme son esclat leur seroit agreable ; & que plustost
que de suiure & de se brusler au feu de vostre ambition, il
vaut bien mieux qu’ils demeurent à celuy de leurs foyers.

Que pensez vous donc faire, Monsieur, en cette conjoncture,
où vous auez à esbranler des gens si fermes, & à tromper
l’experience de ces rafinez. Vous exposez vostre gloire &
vostre bon-heur d’vne estrange sorte ; vos projets ont du desespoir
& point de raison. Si vous reüssissez mal vous estes perdu,
parce qu’ayant mal entrepris vous estes coupable, & ie
voy contre vous assez de maux qui se preparent, mais point
de biens pour vous. Vos pensees toutefois ne sont pas les
miennes, vous auez plus de hardiesse que ie n’ay de cõpassion,
ces fondemens que ie ruine, ie sçay que vous les soustenez.
Vous ne croyez pas, comme ie le dis, que le peuple soit si
grand philosophe ; vous pensez l’attacher à vous auec des
chaisnes si desliées qu’il n’aura point d’yeux pour les voir.

-- 10 --

Vous sçauez ce que disoit Phocion de celuy d’Athenes qu’il
luy auoit souuent conseillé de bonnes choses & que iamais
il n’en auoit voulu rien faire : vous vous imaginez que puis
qu’il ne suit pas les bons conseils, les mauuais auront plus de
force, & qu’au pis aller vn peu de sucre luy fera aualer ce
venin.

 

A vous dire ce que i’en pense, le peuple n’est pas inuincible,
ces vertus ne sont pas heroïques, & il ne pourroit pas
tousiours se defendre des adresses d’vn bon esprit : quoy
qu’il ait esuité ou qu’il ait souffert, il n’est pas fort dans ses
experiences ; & comme sa teste & son courage sont composez
d’vne infinité de differens courages & de differentes testes,
cette multitude l’affoiblist. A force de contraires sentimens
ses resolutions sont tousiours branlantes, & quant
quelque genie vigoureux entre dans la foule de ces esprits
foibles il en entraisne beaucoup apres luy.

Il y a encores vn autre defaut dans le peuple qui le rend
facile a desbaucher. C’est son inconstance naturelle, ce vice
detestable & dangereux tout ensemble, qui le precipite aux
nouueautez auec si peu de peine, & qui luy fait changer de
party sans repugnance. Ie ne doute point qu’il ne puisse
faire tout, quant il est sur la pente de ce vice, il n’a peur ny
respect de iustice ny de puissance, il va sans conscience ny
sans honte où tendent ces legers desirs. Aussi les sages gouuerneurs
n’ignorans pas sont libertinage, ny le danger de le
luy souffrir, ont fait ce qu’ils ont peu pour l’arrester. Les Roys
d’Egypte dans la paix craignans l’oisiueté de leurs peuples,
& pour diuertir leurs nouueaux desirs qu’elle eust peu
enfin engendrer, les employoient aux pyramides & à bastir
ces grands ouurages qui nous ont descouuert en se cachans
dedans les nuës iusques où l’architecture pouuoit monter.
Numa Pompilius amusa ses nouueaux Romains à de continuelles
ceremonies, & l’excellent legislateur Licurgue, apres
auoir sousmis les Spartiates à des loix austeres craignant que
leur changement ne les abolist, leur fit faire d’horribles sermens,
que s’ils y vouloient changer quelque chose ils attendissent

-- 11 --

le retour d’vn voyage qu’il vouloit faire en Delphes,
pour sacrifier à Appollo. Il y fust, mais ils attendirent long-temps,
& il ne retourna iamais, aimant mieux, & trouuant
plus seur de mourir que de leur rendre leur parole, & donner
liberté à leur inconstance. Ainsi les gouuerneurs de Tigres
& de Lyons se defient tousiours de leur humeur furieuse ;
parce qu’ils sçauent bien que la fureur naturelle se corrige,
mais qu’elle ne s’oste point entierement. La maxime des
prudens politiques est de craindre l’humeur legere du peuple,
& d’estre tousiours en estat de luy resister par la force, ou
bien de l’arrester par la douceur. Car d’attendre de la correction
du temps d’vn defaut qui se traduist de siecle en siecle,
ce seroit attendre vn miracle qu’on ne verra point. Il estoit
renfermé dans l’arche, Noé le sauua auec sa famille, il l’a
transferé à toute la terre, & comme il est eschapé du deluge,
il ne craint plus que le dernier embrasement. Voulez-vous
que ie vous fauorise encores dauantage, & que ie vous donne
dans ce lieu les raisons de cette instabilité eternelle, sur
laquelle est vostre fondement ?

 

Toutes choses naturellement tendent à leur perfection ;
c’est l’ardeur & l’amour des plus grands & des plus petits
estres, il n’y en a pas vn qui n’en soit espris ; & qui pour en
iouïr ne soit dans vne perpetuelle action. Si tost que la semence
est dans la matrice elle ambitionne la figure du corps
humain ; & ce corps n’est pas plustost organisé qu’il ne respire
apres de nouueaux tresors : qu’il ne souhaitte & qu’il
ne demande son ame. Lembrion est-il riche de sa forme
Celeste, il s’ennuie des-ja, il se lasse des tenebres qui l’enseuelissent,
il cherche iour & nuict le chemin du iour. Mais
le voila qui entre au monde, comment saluë-t’il la lumiere ?
par des cris qui semblent tesmoigner de la douleur, & de
la douleur d’estre encor enfant. Le reste de sa vie courte ou
longue, est tout semblable à sa naissance, & depuis le moment
qu’il est né iusques à celuy de sa mort, ses desirs &
ses esperances ne meurent point. Dans cet amour de perfection
commun à tous les autres estres, mais encores bien

-- 12 --

plus allumé dans le cœur de l’homme, il fait sans fin de
nouueaux projets. Et comme il cognoist imparfaitement
cette perfection, qu’il poursuit sans relasche, qu’il en prend
de fausses pour la veritable, se trouuant à tous coups trompé,
à tout moment il recommance de nouueaux desseins ;
& ainsi que l’estat où il se trouue, ou soit heureux, ou soit
miserable, parce qu’il ne rencontre iamais icy bas de veritable
bon-heur qui est la perfection qu’il recherche ; il tasche
tousiours de passer à vn autre estat, ou moins miserable
ou plus heureux. Voila d’où vient l’inconstance des
hommes, & la legereté du peuple, qui n’est qu’vn corps
d’hommes differens, & d’inconstans diuers.

 

En voulez-vous encor plus que celà, & diray-je en vostre
faueur quelque chose de plus fort & de plus doux, & dont
la flatterie & le chatoüillement vous soit plus sensible. Non
seulement, la legereté des peuples est estrange ; le vent
& les nuës si vous le voulez, ne change pas dauange, mais
encores les François le sont au de là de tous ceux de l’Vniuers.
Les Gaulois auant eux estoient coupable de ce mesme
deffaut. Ils ont trouué le vice dans la terre où ils demeurent,
& sous le Ciel où ils habitent ; c’est vne vieille
tache dans leur maison. Ce n’est pas moy, toutesfois, qui
fais ce reproche à ma Patrie, vne infinité de Modernes &
d’Anciens Autheurs l’ont escrit premier que ie l’eusse pensé.
Les Nations qui sont autour de nous n’ont rien autre
chose pour nous faire honte ; & nous-mesmes nous ne
craignons pas en publians nos autres vertus, de nous conuaincre
de ce deffaut là. Mais apres tout celà, Monsieur,
que pensez vous faire ? croyez-vous que tout le monde
vous doiue suiure, & qu’il n’y ait pas mesme vne ame ferme
parmy la foule de ses esprits legers ? Les Torrans les
plus rapides & les plus violens n’entraisnent toutesfois auec
eux que les menuës pierres & le sable, & il se trouue des rochers
& des arbres qui resistent à leur impetuosité. Le Soleil
attire bien des exalaisons & des vapeurs, foibles excremens
des eaux & de la terre, mais il ne peut enleuer les

-- 13 --

montagnes ny les riuieres, & il faut qu’il laisse la terre &
la mer. Ou la vertu, & la haine de vos desseins, ou la terreur,
& la crainte des supplices en retiendront tousiours
assez pour vous resister.

 

Au reste, croyez-vous que les Ministres de cet Estat
soient de si mauuais & de si foibles Politiques, qu’ils ne
soient pas fortifiez contre l’inconstance du peuple, & qu’ils
n’ayent ny resnes ; ny mors pour cet animal furieux ? quand
mesmes ils luy lascheroient la bride. Il est si las & si fatigué,
& ses dompteurs l’ont tellement mis hors d’haleine,
qu’il ne peut quasi respirer. Quel secours esperez-vous donc
de ses lassitudes & de ses foiblesses ? & quel appuy vous
pourroit-il est s’il a de la peine à se soustenir.

Peut-estre que vous pretendez qu’aussi bien qu’inconstant
il est infatigable, & que les François ont vn grand courage
auec vne grande instabilité. Peut-estre en croyez vous
comme de la palme, qui plus elle est chargée & plus elle se
soustient ; & comme de la nature des contraires qui deuiennent
plus vigoureux par l’attaque de leurs ennemis. Et bien,
donnons à nostre Nation vn cœur qui ne se lasse point des
trauaux & des peines ; aduoüons que comme le feu elle redouble
sa vertu par la resistance, & que iamais elle n’est plus
à craindre que lors qu’elle est plus oppressée & qu’elle semble
plus abatuë. Si son peuple prend les armes pour vostre
deffence & pour la sienne ; si vous en formez vn corps d’armée
considerable ; si vous en attirez la plus grande partie de
vostre costé, vous imaginez-vous estre inuinsible ? pensez-vous
que des lasches qui pourront abandonner leur Prince
legitime puissent auoir pour vous tant de fermeté ? & bien,
vous en pourrez gagner quelques-vns, vous en pourrez mesme
attirer vn grand nombre ; nous sçauons qu’il n’est point
de corps où il ne se trouue des humeurs peccantes ; nous sçauons
que les mauuaises corrompent ordinairement les bonnes :
mais quoy ; la corruption qui vous peut seruir ne peut-elle
pas aussi vous ruiner ?

Les chefs legitimes, ou les Princes naturels des peuples

-- 14 --

ont toutes sortes de peines à les gouuerner. Cette marque
& ce charactere d’authorité que le Ciel a mis dans leurs
grandes charges, tout plein de veneration & de maiesté, est
bien souuent si peu considerable à leur manie, qu’elle ne luy
garde pas le moindre respect. Ces capricieux inconstans
foulent souuent dessous leurs pieds ceux qui deuroient marcher
sur leur testes : & nous auons tant d’exemples de leur
fureur, tant de tesmoignages de leur barbarie, qu’il faut estre
bien desesperé pour la mespriser. Vous pouuez les charmer
& leur plaire, ie n’en fais pas de doute, mais de dire que vous
puissiez changer leur naturel sauuage, ie ne le croy point.

 

Toutes choses nouuelles sont agreables, & comme la diuersité
plaist à l’esprit, vos commandemens peuuent estre beaux
au gré de vos troupes, vos soldats vous beniront pour les premiers
iours : mais vous auez tousiours leur changement à redouter.
Si les succez ne respondent pas à leurs esperances : si
vous ne les esblouyssez pas tousiours de miracles : s’ils sont
pressez : s’ils sont battus : si l’on prend leurs villes de force : s’ils
voyent piller leurs maisons & violer leurs femmes, ils maudiront
celuy qui les aura perdus. Ne pouuans se vanger contre
leurs vainqueurs leur rage se deschargera sur leurs Capitaines ;
& vous aurez bien du bon-heur dans vostre infortune
si vous esuitez leur ressentiment. Si d’vn autre costé le
sort les fauorise, s’ils deuiennent riches ils deuiendront
insolens. La prosperité leur donnera autant d’orgueil que
le mal-heur leur donnera de rage : vous aurez des seruiteurs
qui feront les maistres, & vainqueur, vous serez plus à
plaindre que vaincu. Et de fait, quel desespoir n’a point
vn homme de courage qui est reduit à flatter par crainte
ceux ausquels il doit commander par authorité. Qu’elle honte
à vn homme de naissance d’estre continuellement obligé
à de nouuelles ruses & à de nouuelles defferences, pour ce
defendre d’vne troupes de mutins ; si vous y manquez, fussiez
vous Alexandre seuere, vous ne pouuez esuiter la mort.

Encores n’est-ce pas la tout ce qui est à craindre de leur
inconstance. Les pratiques des ennemis vous metront à toute

-- 15 --

heure au danger de perdre vos inconstans amis. Il y à cent
moyens pour vous arracher vn si mauuais secours. Les remonstrances
de leur deuoir & les exhortations de leur fidelité
leurs peuuent donner de iustes remors de leurs crimes, & de
iustes desseins de retourner sous les enseignes de leur Roy.
Vn general oubly de leur faute leur fera perdre la crainte du
supplice. Des promesses auantageuses les gagneront aussi
bien du costé de leur Souuerain qu’elles les auront gagnez
du vostre ; & enfin, quand elles vous considereront sans
tiltre legitime dans vos entreprises, declaré criminel de leze-Majesté
& perturbateur de la tranquilité publique, ils auront
horreur de vous voir, & vous haïront autant qu’il vous
auront aimé. Vous sçauez qu’on ne craint pas de trahir les
rebelles, & que l’on ne fait point de conscience d’estre infidelle
à l’infidelité. Leur ayant monstré le chemin de la
perfidie il vous feront voir à vostre propre ruine, combien
ils auront profité de vos leçons, & enfin, puis que vous
qui plus qu’eux deuez estre, & magnanime & fidelle,
pouuez renoncer en temeraire à vostre deuoir ; que deuez-vous
attendre de ces ames mercenaires & corrompuës,
qu’vne inconstance indubitable qui vous menasse d’vn indubitable
malheur ?

 

En vain doncques, ou plustost malheureusement vostre
ambition vous flatte & vous solicite ; il y a trop de peril à
la croire pour l’escouter, & ce qu’elle vous propose est trop
difficile pour vous y resoudre. Elle est de la nature de ces
Dipsas, ces serpens d’Affrique, dont les picqueures alterent
iusques à la mort. Les poinctes qu’elle vous feroit sentir &
la soif des grandeurs qu’elle vous causeroit ne se pourroit
guerir que par la perte de la vie. Il vaut mieux, si vous
m’en croyez, rejetter les conseils qu’elle vous donne & prendre
ceux de la raison qu’elle rejette. Il vaut mieux estouffer
ce monstre dans sa naissance & nourrir tendrement ces
enfans si bien néz, les sages & les raisonnables mouuemens
de la vertu.

Mais vous me respondrez asseurement que ce n’est point

-- 16 --

ambition qui vous transporte, que vos mouuemens sont
plus glorieux, & que vos desseins sont plus legitimes. Quoy
donc, voudriez-vous dire que vous auez des droits à pretendre ?
quelque partie de ce Royaume est-elle à vous ? en
auez-vous esté depossedé, & prenez-vous les armes pour
vous y remettre ? chacun sçait assez pour Sedan quelle recompence
Monsieur le Duc de Boüillon a receuës, & que
vous ne deuez plus auoir des desirs inutilles pour ce
qu’on vous a si bien achepté. Si vous auez les pretentions de
quelques autres joüissances, ignorez-vous qu’en cet Estat la
Iustice regne pour rendre à chacun ce qui luy est deub. Est-ce
qu’il y auroit de la honte & de la bassesse en vne supplication
genereuse, & vous imaginez-vous qu’il y ait plus d’esclat
& de gloire à oster ce qu’on peut obtenir ? estes-vous deuenu
du naturel des corbeaux & des milans, vous qui des
genereux lions auez surpassé ie courage, que vous trouuiez
plus doux de rauir ce que l’on vous pourroit accorder ?
ne sçauez-vous pas bien qu’on iuge tousiours mal des
actions des rauisseurs, & qu’on ne veut pas se persuader
que les choses soient de droit, à ceux qui les enleuent auec
tant de force. Vous pourrez m’objecter qu’il y a beaucoup
de hazard de se commettre à la Iustice, que les voyes en
sont trop meslées ; que les longueurs sont ennuyeuses,
& qu’enfin, les Arrests en sont si douteux, qu’apres auoir
beaucoup trauaillé & beaucoup attendu, la fin est bien
souuent le pire & le comble des maux qu’il y faut souffrir.
Mais, Monsieur, que cette raison seroit foible pour vn esprit
de la force du vostre ! à ce compte il faudroit abolir,
& personne ne deuroit plus se soûmettre à cette Iustice,
qui nous donne à craindre & les difficultez, & le succez.
Il faudroit oster cette grande & cette forte barriere qui separe
les hommes les vns d’auec les autres, & sans laquelle
pires & plus furieux que les animaux les plus farouches, ils
se dechireroient sans humanité & sans compassion. Voyez
à quelle extremité de mal-heur le renuersement de cette
Iustice porteroit bien tost toute la terre. Si peu mesme que

-- 17 --

vous ayez mesprisé sa puissance sacrée : considerez le desordre
qui se prepare, & qui mesme desia regne tout autour de
vous. Les Payens qui ont formé des religions au gré de leur
melancholie, quelques ignorans qu’ils fussent en beaucoup
de choses, & quelques tenebres qui regnassent dedans leurs
erreurs ; ont recognu la puissance de cette Iustice, si necessaire
à la perfection & à l’ordre des choses les plus sublimes,
qu’ils n’ont pas creu que le Ciel mesmes où ils auoient logé
toutes leurs ridicules diuinitez, peut estre digne de leur
Majesté, si elle n’y regnoit. Iupiter en estoit le chef souuerain,
& dans l’assemblée de ces faux Dieux, quand il faloit
decider quelques differens, c’est luy qui prononçoit les Arrests.
Nous-mesmes qui viuons dedans les lumieres du Christianisme,
n’establissons nous pas la Iustice dedans l’essence
du vray Dieu ; & ne le disons nous pas infiniment iuste ? si
doncques elle regne par tout, & s’il faut qu’elle soit dans le
Ciel aussi bien que dessus la terre. Pourquoy voudriez vous
ne pas recognoistre son necessaire & son grand pouuoir.

 

Ie veux que cette puissance que l’on nomme iuste, pour
vous faire iniustice, eust cessé de l’estre, encores ne deuiez
vous pas si visiblement vous en deffier. Alors au moins vos
desseins auroient eu quelque excuse, vous auriez esté criminel
auec plus de raison, & vostre droit se seroit peu poursuiure
auec plus d’apparence de vertu. En tout cas vn bon politique
en auroit vsé de la sorte, & par le refus qu’on luy auroit
fait de luy rendre ce qu’il luy est deub, il auroit esmeu la compassion
de ceux desquels il auroit pretendu la defense : &
comme Brute & Collatin animerent les Romains à leur vengeance
en leur montrant Lucresse violée, il auroit esmeu
ses deffenseurs en leur faisant voir son droit violé.

Mais, enfin, les suiets quoy que puissent tous ces artifices
de viosence, arrachent bien moins par force de leurs Souuerains
qu’ils n’en obtiennent par douceur. Si le refus & l’iniustice
est à craindre d’vn costé, la rebellion & la perfidie l’est
bien dauantage de l’autre. Dieu fauorise tousiours la cause
des Roys, & confond la temerité des felons. Ils sont dedans

-- 18 --

le monde ses viuantes images, quand on viole l’honneur & le
respect qu’on leur doit, il venge sa puissance mesprisée par le
mespris qu’on fait de ces mortelles Diuinitez. Les geans orgueilleux
qui s’attaquent à Iupiter, sont tenuersez à coups de
foudre, & nous voyons tousiours tomber par terre les Sujets
rebelles par la puissance des Souuerains. Les Roys ne manquent
pas d’Ibis non plus que l’Egypte, de ces oyseaux conseruateurs
du païs, & les mortels ennemis des serpens volans
qui le veulent desoler. Leur establissement estant d’authorité
Diuine, les hommes font de foibles desseins contre leur
grandeur, & s’ils regnent de la part de Dieu, comme il est dit
dans le Prouerbe, nous ne pouuons sans vn punissable crime
nous soustraire de leur authorité. Il l’a faut recognoistre & ne
point faire les mal satisfaits & les mal comptans, si leur grandeur
ne s’abaisse pas tousiours iusqu’à nos bassesses. Quand
nous auons quelques pretentions legitimes dedans l’estenduë
de leur Empire, les requestes & les supplications sont les
armes qu’il faut employer pour les obtenir. Il est aussi seant
à vn Sujet de prier son Roy, qu’il est infame à vn maistre
de s’humilier deuant son esclaue. Nous auons nos actions
toutes reglées, & nous ne deuons point renuerser le bel
ordre que la nature & que la Iustice ont establis. Mais quelqu’vn
me dira que les Roys feignent bien souuent de ne pas
entendre ce qu’on leur demande, & que les supplications
quelquefois estant enuers eux de vaines & de friuoles coustumes ;
il est bien permis de prendre les armes, d’vser de la
violence & d’enleuer par force ce qu’on ne peut obtenir par
la douceur. Il vaut bien mieux toutefois que le refus de nos
Souuerains esprouue nostre patience que nostre colere. Et
quoy, pource que le Ciel n’accorde pas nos premieres requestes
faut-il que nous taschions de luy rauir ce que nous
luy auons vainement demandé ? Que sçauons-nous quelle
est l’intention de celuy qui nous refuse, & s’il ne veust point
recognoistre de nostre constance, si nous meritons ce que
nous voulons obtenir de luy. Le iour se diuise en vne infinité
de momens qui ne nous sont pas tous heureux, mais attendons

-- 19 --

celuy qui nous le doit estre, & ne contraignons point
la nature des choses à changer pour l’amour de nous.

 

Doutez vous, Monsieur, de l’amour naturel que nous deuons
à nos Monarques, & n’auez vous iamais senty quelle
est l’ardeur de cette flâme que le Ciel allume en nos cœurs
pour eux. Les Egyptiens les premiers sçauans & les premiers
sages de la terre, estoient si bien touchez de ce beau feu, que
quand les leurs mouroient ils faisoient vn deüil bien digne
de leur grande perte : mais encor bien plus digne de leur affection
extreme. Septante deux iours tous entiers, ils n’auoient
autre chose que la tristesse dans les actions, dans les yeux,
dans la bouche, & dans l’ame ; leur commerce, leur iustice &
leur deuotion mêmes, estoient affligées ; ils n’auoient de cœur,
de paroles ny de larmes que pour la perte qu’ils auoient faite :
Ils dechiroient leurs vestemens, ils soüilloient leur teste de
poussiere, ils s’attachoient deux & trois cens ensemble allentour
du corps, & d’vn air tout lugubre & trop digne de
compassion ils se promenoient ainsi vnis, comme si joignans
leurs corps abatus, ils eussent essayé d’vnir leurs ames affligée,
& de ne faire de toutes leurs douleurs qu’vne seule douleur,
mais augmentée, mais multipliée, & capable de faire
souffrir à chacun en particulier ce qu’ils enduroient tous
ensemble. Il y a eu d’autres Nations qui en ont encor donné
de plus grandes preuues, & quelqu’vns d’entr’eux aimoient
si passionnement leurs Souuerains qu’ils s’enseuelissoient
dans leurs tombeaux, qu’ils se precipitoient dans
les flâmes des buchers où l’on les brusloit, & qu’ils ne pouuoient
apres leur mort conseruer vn moment la vie. Encores
auiourd’huy leur trespas frappe d’vne generale consternation
tout le monde, & si nostre douleur n’a pas tant de
montre & tant d’ostentation que celle de ces antiques
Payens, elle est sans doute plus chrestienne, plus interieure
& plus violente. C’est cet amour qui a tousiours donné & qui
donne encores aux hommes ce grand respect que chacun
leur porte. C’est luy qui fait que certains peuples des Indes
Occidentales ne s’approchent iamais de leur Roy que mal

-- 20 --

vestus, pour luy laisser toute la gloire iusques à celle des habits ;
& que ceux de Thrace cedoient à leurs Souuerains vne
religion & vn Dieu à part qu’ils n’osoient adorer, & souffroient
sans murmure qu’ils mesprisassent & ne fissent point
d’estime de ceux qu’ils adoroient. C’est luy que nous deuons
sentir si nous ne voulons estre sans raison & sans humanité,
& viure coupables du second des deux plus grands
crimes qui puissent noircir nos actions. Comme le premier
amour des choses Celestes, Spirituelles, & Diuines, est celuy
de Dieu ; Celuy que nous deuons au Roy est le premier aussi
des choses corporelles sensibles & humaines : & comme de
ces deux il est le second, & que la haine qui s’oppose au premier
est le plus grand de tous les pechez ; Ie nomme, & ne
m’en desdis pas, celle qui luy est opposé le second des crimes.

 

Il est donc iuste si nous ne voulons estre infiniment coupables,
que nous ayons pour nos Roys cet amour inferieur &
cadet, mais Frere, de cette grande flâme qui doit brusler nos
cœurs pour nostre vnique & nostre immortel Souuerain.
Ceux qui se sentent dans cette passion glorieuse, sont comme
ces Amans respectueux qui n’attendent les moindres
plaisirs que des graces de leurs Maistresses : & qui sçauent
qu’vn moment de peu de respect est capable de ruiner dans
leurs esprits plusieurs années de seruice. Ils font vne cour
continuelle aupres de leur Prince, & tiennent que comme
les Astres qui n’ont d’autre lumiere que du Soleil, ne la rauissent
pas mais la reçoiuent parce qu’ils l’attendent, de mesme,
ceux qui pretendent à ses faueurs ne doiuent pas les esperer
de la force, mais plustost de la patience. Dans ces sentimens
humiliez, mais genereux, il deferent toutes choses
au Prince dont ils les esperent, sans excepter mesmes le
temps de ses liberalitez & de sa Iustice, que c’est à eux de luy
demander, mais que ce n’est pas à eux de luy prescrire. Il ne
sont pas faschez que son pouuoir paroisse dans ces refus, &
que mesmes à leur despens il fasse voir qu’il luy est tousiours
libre de receuoir ou de rejetter nos prieres. Et de fait, certes,

-- 21 --

nous ne pouuons sans vne audace insupportable blasmer
dedans nos Souuerains ce libre vsage de leur puissance.
S’il nous accordoient tous ce que nous leur demandons, outre
que nous les accablerions de demandes, la coustume de
tout receuoir nous feroit croire qu’ils seroient obligez de
nous tout donner ; & enfin, on les verroit deuenir nos esclaues,
parce que les croyans asseruis à cette necessité, nous
vserions de commandemens & n’aurions plus besoin de requestes.
Puis qu’ils sont Souuerains il faut que leurs actions
sentent la Souueraineté, & qu’elles s’esloignent infiniment
de la seruitude. Tellement que quiconque est refusé quoy
qu’il puisse auoir de pretentions ne doit pas le trouuer estrange.
Concluons, Monsieur, que si leur bonté ne respond pas
à nos premiers vœux, il ne sensuit pas que nous deuions nous
mettre en colere, & vser de la force & de la violence, ou la
douceur n’a pas esté heureuse.

 

Cette force reüssit encores bien moins que cette douceur.
Ordinairement les armes nous coupent les mains, que nous
prenons auec tant d’iniustice, & le flambeau que nostre despit
allume contre nos Monarques, ne sert rien qu’à nous consumer.
Combien cette verité nous a telle fait voir d’experience,
& combien de rebelles sont tombez sous leur rebellion ?
ie serois infiny si des Assiriens, des Perses, des Parthes,
des Romains, des Grecs, & des François, mesmes i’en voulois
tirer, & vous faire voir des exemples que tous les siecles passez
ont veus, & qui dans le nostre mesme n’ont esté que trop
ordinaires & trop frequans. La plus puissante rebellion est
comme vn tison allumé que l’on iette dans vne riuiere, il
fait du premier choc qu’il donne à l’eau, vn peu de bruit &
vn peu de fumée, mais la rapidité des ondes l’engloutist,
l’entraisne & l’esteint aussi tost qu’il y est entré. La fureur des
Roys irritez n’est pas moins terrible que celle des vagues esmeuës,
& il ne faut pas estre moins imprudent & moins furieux,
pour pretendre de luy resister que l’estoient ces anciens
& ces barbares Gaulois, qui ne pouuoient voir de tempestes
sans se precipiter l’espée à la main dans les ondes escumantes

-- 22 --

pour les combattre & pour les surmonter. C’est vne ridicule
& vne desesperée manie que celle des suiets qui s’en
prennent à leurs Souuerains, & ie ne comprens pas ny ne
souhaïtte de comprendre, iusques à quel comble de rage &
de temerité sont montez de si mal-heureux esprits. Il y a
certes, vn aueuglement estrange dans leur audace, & s’ils
voyoient bien ce que sont ceux contre lesquels ils s’osent
desclarer, ie ne pense pas que soit par amour, ou soit par terreur,
ils n’estouffassent leur crime dedans leur pensée, & que
ne les aymans pas il ne les craignissent pour le moins. Les
Roys qui sont les plus releuez des hommes, sont comme ie
feu qui est le plus sublime des elemens ; tant que leurs subjets
laissent reposer leur pouuoir, ils iouyssent auec elle du
repos duquel il iouyst ; mais quand leur desobeyssance esmeut
leur iustice, & enflâme leur colere, alors laschans la bride
à leur puissance, ils destruisent leurs rebelles inferieurs ;
Tout de mesme que si le feu reflechissoit l’actiuité de son ardeur
sur les choses inferieures, il ny auroit rien qu’il ne deuorast.

 

Vous sçauez ces choses, Monsieur, & vous ne pouuez
ignorer iusqu où s’estant la puissance de ces hommes extraordinaires,
qui sont appellez Dieux dans les saintes Lettres,
& que le diuin Homere nomme ordinairement Les
ENFANS ET LES NOVRRISSONS DE IVPITER. Vous
ne pouuez donc pas estre en doute que ceux qui en veulent
obtenir quelque chose, quand il se seruent de la force ne
s’arment moins pour fauoriser leurs desseins que pour les
ruiner. Vous voyez bien que les requestes & les prieres
leur sont deuës, & que puis que la Loy descend il faut que
l’obeïssance monte. Les Ethiopiens autrefois l’esprouuerent
heureusement & malheureusement tout ensemble. Ayans
voulu en leuer l’Egypte aux Romains, qui peu s’en faloit alors,
estoient les maistres de toute la terre ; ils perdirent tout ce
qu’ils auoient conquis, & les armes Romaines passans de là
iusqu’en leur contrée les despoüillerent encores de leur ancien
patrimoine, & ils se virent ainsi priuez, & de ce qu’ils

-- 23 --

auoient, & de ce qu’ils auoient voulu rauir. Dans cet estat
malheureux il falut aller faire la cour à Auguste : il les receut
& leur pardonna, ils obtindrent de luy tout ce qu’ils luy demanderent,
& ils esprouuerent que la force est bien mal-heureuse
de nous vouloir conquerir ce que nous pouuons acquerir
par l’humilité. Herodes cet adroit & ce rusé Politique,
qui cognoissoit combien l’abaissement est puissant sur la puissance
mesme, ne demanda iamais rien aux Romains qu’il ne
l’obtint. Il sçauoit qu’à plus grands que soy, il vaut bien
souuent mieux faire pitié qu’enuie, & donner de la compassion,
que du courroux ; & la pratique de sa science luy fut si
heureuse, qu’il conserua tousiours de son costé la grandeur
Romaine, & la rendit funeste à ses ennemis. Ie ne veux pas
penser que cette vraye science des Courtisans vous soit incognuë,
il ny a pas d’apparence que vous fussiez estranger de
la Cour iusques à ce poinct. Il faut donc que vos armes
ayent vne autre cause, il ne se peut pas qu’auec vos cognoissances
vous puissiez commettre vne si grande erreur.

 

Est-ce point qu’encores que le succez de vos desseins
vous paroisse de cette sorte impossible, vous voulez montrer
vn exceds de courage dans cette impossibilité ? Si cela est,
Monsieur, arrestez là l’impetuosité de ce grand cœur, vn peu
trop ambitieux de gloire, puis qu’en ayant acquis de si legitime,
il en poursuit de si criminelle. Prenez garde que celle-là
que vous recherchez, ne soit vne meurtriere qui fasse mourir
celle qui est en vostre possession ; & ne faites pas comme
ces Marchands qui riches de leurs voyages d’Holande
& d’Angleterre, ambitieux d’aller iusqu’aux Indes, perdent
en vn moment par vn triste naufrage tout ce que leur vie
entiere leur auoit acquis. Ie vous aduouë que la vraye &
la plus lumineuse gloire est celle qui couste plus de peine
& qui se trouue aux plus grands dangers. Il ny a point
d’honneur à acquerir dans les combats là où il ny a point de
risque à courre ; d’où vient qu’en matiere de religion, les Romains
se sont imaginez qu’il y a du merite à gagner là où il
y a beaucoup de peine à prendre. Comme le feu semble

-- 24 --

bien plus aspre quand il gelle, & comme dans l’obscurité vn
flambeau semble ietter bien plus de lumiere, la vertu paroist
bien plus forte, quant il luy faut rendre vn plus grand combat.
Le pilote qui vient au port malgré la tempeste, monstre
bien plus d’experience & de courage, que celuy qui n’aborde
qu’en tranquilité. Qui ne fait rien que de commun ne vaut
qu’vne estime commune, & ce qui est tres bas de soy-mesme
n’a garde de nous eleuer. Ie sçay que les petits desseins
ne sicsent point aux grands courages, & que l’on n’en merite
pas le titre par de faciles actions. Hercule pour paroistre
fort, porte le monde sur la teste, & autrefois vn Sculpteur
pour s’eterniser par vn digne ouurage, voulut tailler le mont
Athos en statuë d’Alexandre, & luy faire porter dans vne
main vne ville assez grande pour dix mille hommes, & luy
mettre en l’autre vn vaisseau dont il sortist vne riuiere. Archimedes
ne proposoit rien de plus petit que de faire vne
machine à remüer le monde ; Et nous voyons encor des esprits
qui n’entreprennent rien de moins, que de quadraturer
le Cercle, & qui s’efforçans à faire de l’or, n’aspirent pas à
moins d’esclat qu’à celuy du Soleil, encores qu’il soit le Prince
des Astres.

 

Ce sont, ie le sçay bien, de ces grands efforts, & de ces
grands ouurages que viennent les grandes reputations. Alexandre
n’auroit pas esté surnommé le GRAND s’il n’auoit fait
que de petites choses, & si auec vne poignée de Grecs il n’auoit
vaincu souuent des millions de Barbares. Et tous les autres
Heros de l’antiquité, ou fabuleuse ou veritable ne porteroient
pas auiourd’huy le nom d’Heros s’ils n’auoient pas
plus fait que de simples hommes. Enfin qui veust emporter vn
grand nom, & vne reputation aduantageuse, doit luy-mesmes
se desnommer par ses actions esclattantes, parce qu’on
qualifie ordinairement les choses selon qu’elles se decouurent
& qu’elle paroissent, & qu’on ne nomme iamais grande
vne ame, qui ne paroist que petite. Il faut donc s’illustrer
soy-mesme, premier que d’emporter le nom d’Illustre, & c’est
peut-estre, Monsieur, à quoy vous tendez.

-- 25 --

Mais quoy, vous estes si glorieux, & les belles actions que
vous auez faites, iettent de si viue lumiere, que vous estes
bien aueugle si vous ne la voyez. Se pourroit-il que vous
vous estimassiez pauure dans vostre abondance, & que le
reste du monde cogneust mieux que vous combien vous
valez, ou plustost que vostre vertu n’a point de prix. Certes,
les grandes choses que vous auez faites vous ont acquis vne
reputation si haute, qu’il est bien mal-aisé que vous la releuiez
plus qu’elle est. Vous ferez des efforts, vous vous elancerez ;
mais au lieu de monter plus haut, vous vous ietterez de ce
sommet dans ce precipice, & vous apprendrez à vos despens,
qu’il est des bornes & des barrieres au delà, desquelles la
gloire des hommes ne peut pas aller. Vous imaginez-vous
que le souhait d’vn autre monde que faisoit Alexandre, ne
fut pas plustost vne marque de son imprudence que de son
grand cœur, & qu’ayant porté, & son courage & son bonheur
iusques où il deuoit aller, ses desseins infinis ne tesmoignassent
pas plustost sa foiblesse que sa force, & ne fussent
pas plustost des mouuemens de sa vanité que de sa raison. Les
Grecs qui par le refus de passer outre dans les Indes, donnerent
des bornes à ses conquestes, furent à mon aduis plus sages
que luy. Et la mort qui l’osta ieune du monde, asseure
bien mieux sa gloire & la grandeur de sa renommée, qu’il ne
l’eust pas fait s’il eust vescu. Il alloit peut-estre enseuelir dans
le fonds des Indes ce grand bruict qu’il auoit acquis, &
quand tout l’Orient eust flechy sous ces armes triomphantes,
il y auoit encores en Occident vn peuple vainqueur qui
eust peut-estre vaincu ce victorieux.

Ie croy, Monsieur, que vous m’entendez bien, sans que ie
m’explique, vous faites assez la conclusion de ce discours
vous-mesmes sans que ie la fasse. Vous voyez bien que ie
veux dire que le courage cesse d’estre ce qu’il est, quand il
cesse d’estre sage, & qu’il doit suiure les regles de la prudence
à moins que d’estre dereglé. Il faut qu’il se limite aux entreprises
raisonnables, sans se porter aux impossibles. Il faut
qu’il se contente, & qu’il se sçache retenir comme il doit se

-- 26 --

sçauoir pousser. Estre courageux, c’est mespriser le danger
quand il se presente & qu’il est necessaire de le vaincre, & non
pas le chercher sans necessité, & brauer toutes sortes de perils
esgalement ; comme l’vn est le deuoir du genereux, l’autre est
la manie du temeraire, & il y a vne si grande difference entre
ces actions, que les dernieres n’establissent pas moins le
vice que les premiers establissent la vertu. A ces marques,
Monsieur, les Anciens distinguoient tres bien les vaillans
hommes d’auec les temeraires, & ils sçauoient par ce moyen
distribuer le prix & la peine à ceux qui les meritoient. Cet
Horatius Cocles, ce braue Borgne, ce Romain inuincible, cet
appuy de la liberté tombante, ce Mars de Rome ; que diray-je
dauantage qui ne soit tousiours moindre que fa gloire ? en se
l’acquerant, ne fit-il pas vne action qui sembloit plus la temerité
que la valeur. Luy seul soustenir l’effort d’vne armée, &
d’vne armée victorieuse qui estoit aux portes de Rome ; luy
seul l’arrester sur vn pont pendant qu’on le rompoit par derriere ;
luy seul s’opposer à tant d’ennemis, & n’auoir d’autre
espoir que celuy que luy donne la riuiere, dans laquelle
voyant le pont rompu il se jette, & se sauuant chargé de ses
armes, sauue Rome auec luy de la puissance des Latins ; tout
cela n’est-ce pas estre plustost desesperé, que vaillant ? d’abord
ce grand exploit montre vn mauuais visage : Il semble qu’il y
ait bien de la fureur & de la rage dans cette resolution : mais
appliquons y nos regles & nous verrons qu’elle estoit toute
pure de grandeur de courage, & de force de vertu. Ce n’estoit
point vne occasion que le braue Cocles eust cherchée, il
eust esté furieux de si precipiter. C’estoit vne rencontre de
la fortune. Quand il auoit pris les armes ce n’auoit pas esté
pour vn si grand dessein. Mais estant armé, se trouuant dans
la necessité de se defendre, & de defendre sa patrie, & voyant
qu’il ny auoit pas moyen de s’en dédire, & que son grand
courage l’auoit porté le plus prés des ennemis, il falloit y
vaincre ou y mourir ; Ce courage digne d’vn Romain,
se surmonta soy-mesme pour vaincre. Ne s’estant donc
point precipité dans ce rencontre, & y ayant de la necessité

-- 27 --

à s’y tenir ferme puis qu’il s’y trouuoit, nous pouuons
luy donner encores auiourd’huy les glorieuses aprobations
qu’il merita dés lors de sa patrie : de laquelle il fut aimé, de
laquelle il fut estimé, & laquelle luy fit dresser vne statuë
pour monument eternel de sa valeur prodigieuse. En vn autre
occasion, le fils de Manlius Torquatus, ayant combatu
contre sa defense defit les ennemis, & remporta vne victoire
assez brillante, pour esblouyr d’autres yeux que ceux de
ces vieux sages, qui en matiere de generosité & de bonnes
actions ne faisoient iamais de beueuës. Quelque esclattante,
toutefois que fust cette action desobeyssante, ils
sceurent bien iuger que l’ardeur qui l’auoit causée n’estoit
pas si courageuse qu’elle estoit temeraire. Elle auoit esté
moins entreprise par iugement que par legereté, & veritablement
elle sentoit plus la folle audace que la necessité presente.
Il valoit mieux ne combatre pas & obeïr, que de desobeïr
& de vaincre, en se mettant au risque de tout perdre.
Aussi le propre pere de ce temeraire glorieux, cognoissant
bien la faute que son fils auoit faite ; sçachant qu’il n’auoit
vaincu que par hazard, & que d’autres qui voudroient se regler
à sa temerité desobeïssante pourroient ruiner la Republique,
ne voulant pas escouter la nature ny pardonner à son
sang criminel ; il le condamna à la mort, & l’enuoya au supplice
sans misericorde.

 

Les Grecs ne distinguoient pas moins la temerité de la
vraye valeur, & comme ils donnoient des Couronnes aux
genereux vainqueurs, ils ne manquoient pas de punir les temeraires.
Il y en a diuers exemples dans l’histoire Grecque, &
ie me souuiens d’vn ieune Grec lequel dormant en son lit, fut
esueillé par le bruit que faisoient ses Citoyens, qui crioyent
aux armes, & s’efforçoient de repousser leurs ennemis, qui
par surprise estoient entrez dedans leur ville. A ce cry il saute
hors du lict, il prend vne espée, & sans songer à d’autres
armes il court aux ennemis, il combat tout nud, il
les rechasse, il les met en fuite, & par des miracles incroyables
de force & de valeur, ou apparente ou veritable, il sauue

-- 28 --

ses Citoyens & sa ville. Cette action estoit belle en apparence,
iamais autre n’eut vn plus beau dehors. Cependant
elle fut iugée temeraire, & comme vainqueur ayant este
couronné, comme fol & desesperé, il fut en mesme temps
puny. Car, de fait, s’il vouloit soustenir le danger qui se presentoit
à luy, que ne prenoit-il des armes, quelle necessité
l’obligeoit à combatre tout nud ? estoit-il en estat de bien
seruir sa Patrie, & comme son imprudence l’auoit voulu perdre
ne fust-ce pas le hazard tout seul qui le sauua ? Il se fait
quelquefois des miracles de cette nature, mais ce n’est pas
estre bien courageux que de ne pretendre de victoire que des
miracles. Il faut que nostre prudence les emporte par le secours
qu’elle donne à nostre valeur. Si tous les grands hommes
de l’antiquité dont les noms sont encor venerables à nos
esprits auoient agy, par l’autre maxime, nous n’aurions auiourd’huy
de memoires que de leurs dérouttes, & ils ne seroient
fameux tout au plus que par leurs malheurs. Mais ils
sçauoient trop pour s’y confier quels fruicts naissent de la
fole audace. Que la vraye valeur n’est pas tousiours impetueuse,
& qu’elle lasche le pied quelquefois aussi vtilement
que vigoureusement d’ordinaire elle le fait lascher. Fabius,
ce sage Romain, qui fust surnommé le TEMPORISEVR, &
qui fatigua tant Hanibal par ses remises, luy fit bien cognoistre
& fit bien comprendre à Rome, que la valeur est quelquesfois
si modeste qu’elle en semble timide, mais que quelque
douce qu’elle nous paroisse elle ne laisse pas d’en estre
aussi redoutable que si elle se montroit furieuse ; Et le pauure
Marcellus aussi temeraire que vaillant, estant tombé dans
les pieges de son ennemy, laissa à la posterité par l’exemple
de sa mort deplorable, cette maxime trop verifiée ; que le
grand courage n’est pas celuy qui est fol ny insensé, mais plustost
que c’est celuy qui vnist à vne fermeté inesbranlable, vne
prudence clairuoyante, & qui ne se hazarde iamais sans necessité.
Tel estoit celuy de Pelopidas quand estant aduerty
qu’Alexandre Tyran de Pheres, venoit contre luy auec
grand nombre de soldats, il respondit genereusement, tant

-- 29 --

mieux, car nous en defferons dauantage. Il ne s’espouuante
non plus qu’il se prostituë, & quant il faut ou vaincre ou
mourir, il sçait faire ou l’vn ou bien l’autre, mais quand
il voit que sans espoir de vaincre il y a danger de perir,
il se sauue s’il peut, & conserue sa vie pour vne meilleure
rencontre, & ne veut point ioüer le personnage d’vn desesperé.

 

La coustume des Scythes estoit de combatre en fuyant, &
de ne faire iamais pied ferme, parce que cette façon leur
estoit auantageuse, & parce encores que ne logeans que sous
des tentes, & n’ayans ny ville ny maisons à deffendre, tous
les lieux leur estoient indifferens. Quand Darius fut pour
les conquerir, il se faschoit de cette coustume, & dans le
transport de sa colere il enuoyoit dire des injures & appeller
lasche Indathyrses, le Roy de ses fugitifs, mais inuincibles
ennemis. C’EST LA FAÇON DE MARCHER DE MA
NATION (luy respondit-il) ; MAIS VIENS IVSQVES
AVX SEPVLCHRES DE NOS PERES ET TV TROVVERAS
A QVI PARLER. Que cette responce est noble
pour vn barbare, & qu’elle sent la veritable grandeur de courage ;
qu’elle est pleine de prudence & de generosité ! quelque
fol se fut mis en colere de ces reproches, & peut-estre se
fust perdu pour s’en vanger. Mais la magnanimité mesprise
les paroles, & quand elle fait de bonnes actions, elle ne s’esmeut
pas pour des discours. Tu m’appelles lasche, desesperé
Darius : mais ie n’en rompray point ma discipline, & ie n’en
deuiendray point temeraire. Ie ne t’attendray point icy,
car il n’est pas besoin que ie le fasse ; Mais vient à nos tombeaux,
& là tu verras que ma nation ne fuit pas par crainte,
& qu’elle sçait defendre iusques à la mort la seule chose
qu’elle doit conseruer.

Ie vous le redis doncques encores, Monsieur, le vray courage
n’est point enragé. Il n’entreprend point au risque de
perir, ce qu’il n’est point necessaire d’entreprendre : il ne
s’espouuante iamais, mais aussi il ne se met iamais en estat d’estre
espouuanté : il est vray que quand il s’y trouue il cede à

-- 30 --

la force sans ceder à la crainte, mais il ne s’y trouue iamais par
election, & iamais il ne se precipite soy mesme, c’est le sort
& le hazard qui le precipite.

 

Faites, Monsieur, ie vous prie vne application de ces choses
à vos entreprises. Voyez si vous ne courez point legerement
à vostre perte, & si vous estes forcé de franchir cet
abysme ou d’y tomber. Certes, vous n’auez à souffrir d’autre
violence que celle que vous vous faites. On ne vous attaque
point, on ne vous presse point de vous defendre ; vous estes
libre de reuenir gouster les douceurs de la Cour : Vostre
Prince vous y rappelle ; quel demon furieux est-ce doncques
qui vous transporte ; quel esprit malin vous conseille & vous
fait agirv ? ostre resolution est infiniment temeraire, il ny a p[1 lettre ill.]e
mesme d’ombre de courage dans vostre projet. Vous allez
sans necessité faire la guerre à vostre Prince, c’est à dire donner
de la teste contre vn rocher pour le rompre, sans que personne
vous y contraigne. Que pouuez vous attendre d’vne
entreprise si ridicule, & mesme si peu digne du sens commun ?
si les temeraires reüssissent quelquesfois, si la fortune
qui est aueugle fauorise des aueugles comme elle en quelque
rencontre, il ne s’ensuit pas qu’elle les doiue tousiours fauoriser.
Ne sçauez vous pas bien que cela n’arriue que par prodige,
& comme ie vous l’ay desia dit, que c’est s’attendre aux miracles
que de s’y fier. Nous voyons ordinairement que le cœur
manque, & que le nez seigne à ceux qui passent au de là des
limites de la generosité. Cette vertu estant vn milieu entre
la lascheté & la temerité, qui sont deux extremes qu’elle modere,
si tost qu’en sortant d’elle on tombe dans l’vn ou dans
l’autre, on ne manque pas de sentir son eloignement. Et
quoy qu’il semble que les temeraires ne puissent iamais estre
lasches, ny iamais les lasches temeraires, si l’experiance nous
fait elle voir toutefois, que des deux vices on ne va iamais
dans la vertu qui les modere, mais qu’on peut bien tomber
de l’vn en l’autre. Combien de fois est il arriué à des timides,
à des lasches qui se seroient eschappez, & qui auroient fuy
s’ils auoient peu ; de prendre vne resolution desesperée se

-- 31 --

defendre, & se battre comme des lyons apres auoir tremblé
comme des poules. Il arriue le mesme changement aux temeraires ;
comme ils sont hors du courage & de la generosité,
leur feinte valeur ne manque pas de descouurir bien tost sa
foiblesse, & de deuenir tout à coup lasches apres auoir paru
furieux. Vn de ces impetueux estourdis qui estoit à la guerre
sous la conduite de Phocion, ayant quitté son rang en imprudent,
pour aller seul charger les ennemis en temeraire,
manquant dans le besoin du feu qui l’auoit poussé, ne
peust se resoudre d’attendre vn seul ennemy qui venoit à luy
pour le combatre. Il s’enfuit, & se vint cacher dans son rang
où il receut ce honteux reproche de la bouche de son general ;
Ieune estourdy, n’as-tu point de honte d’auoir ainsi deux fois
abandonné ton rang, l’vne quand tu as sorty de celuy où t’auoit
mis ton Capitaine, & l’autre quand tu as abandonné celuy
où tu t’estois mis toy mesme.

 

C’est de cette sorte que les temeraires s’esbranlent quand
on leur resiste. L’image du peril les effraye quand ils sont dedans,
& comme ils se trouuent hors des limites du courage,
& qu’ils manquent de cette grande fermeté d’ame, qui donne
mesme aux vaincus la gloire de mourir sans estre espouuentez,
leur audace indiscrette succombe sous la resistance :
Tout leur feu qui n’estoit qu’vn feu artificiel s’esteint ; vn
horrible glace le surmonte, & l’on voit, enfin, de vrais
lasches en ces faux genereux.

Si doncques, Monsieur, il faut que ie nomme vos desseins
temeraires, il faut aussi que ie les nomme malheureux. Il ne
manqueront pas de vous abandonner si vous ne les abandonnez
le premier, & le feu qui vous brule à present ne
vous eschaufera pas mesmes quand vous aurez le plus besoin
de son ardeur. Ce sont les grands perils où l’on trouue la
plus grande gloire, ie l’aduouë ; Mais encor, cette grandeur
a-t’elle de certaines bornes, & le courage le plus haut recognoist
quelques dangers qu’il ne veut point s’efforcer de
vaincre parce qu’il voit bien qu’il y a de l’impossibilité à y
reüssir, & qu’on feroit voir plus de foiblesse que de cœur à

-- 32 --

s’y precipiter. Celuy que vous voyez deuant vos yeux & auquel
vous vous abandonnez, Monsieur, est de cette nature ;
& personne qui le considere ne pourra croire que ce soit generosité
qui vous pousse, mais plustost fureur. Moy-mesme ie
ne puis me persuader que ce soit seulement le desir d’vne reputation
extraordinaire qui vous force à entreprendre l’impossible,
vous auez tousiours esté trop sage pour ne sçauoir
pas auiourd’huy distinguer la vertu d’auec le desespoir, &
pour vous mettre dans l’esprit que le chemin que vous prenez,
parce qu’il est plein d’espines, doiue enfin vous conduire
aux roses, & vous mettre apres beaucoup de peines
dans le repos.

 

Qu’est-ce donc, encores vne fois, qui vous a mis dans
cette dangereuse carriere ? si ce n’est pas ny le desir injuste &
inutile de vous agrandir, ny celuy de rentrer dans des droits
anciens, ou de vouloir obtenir iustice par force : ny celuy de
vouloir acquerir vne reputation extraordinaire en vous exposant
à d’inuincibles perils ; encores vne fois, que peut-ce
donc estre ? & où faut-ils en chercher la raison ? ie n’en puis
trouuer de bonne ny de veritable, & quoy qu’il en reste quelque
ombre, ie ne croy pas que cette ombre vous doiue tromper.

C’est peut-estre l’amitié, & la fidelité que vous auez promise
au Prince de Condé prisonnier, qui vous oblige à tout
entreprendre pour sa deffence. C’est peut-estre, cette parole
inuiolable que vous voulez tenir à quelque prix que ce puisse-estre,
& le serment fait entre ses mains, que vous ne pouuez
violer. Certes, il y a bien quelque chose de genereux &
de grand dans cette ferme fidelité, la source en est bonne
& glorieuse, mais la suite n’en peut estre que soüillée par
l’abondance des impuretez qui coulent dedans. Generalement
parlant, tenir sa parole est digne d’vn homme de cœur
& de pieté, cette vertu est diuine, morale & naturelle tout
ensemble : & le mensonge est vn ennemy public de tout
l’Vniuers. Quelqu’vn a dit fort à propos, que nous ne sommes
hommes, & nous ne tenons les vns aux autres que par la

-- 33 --

parole. Et de fait, s’il n’y auoit point de fidelité entre
nous, il n’y auroit non plus de confiance, & par consequant
point de societé, point d’vnion ; & cela n’est-ce pas
estre beste & cesser d’estre homme ; Car encores les bestes
mesmes ont quelque fidelité entr’elles, & sans parler elles
se sçauent tenir quelque sorte de parole. C’est ce qui fait
que celles de mesme espece ne sont pas farouches les vnes
aux autres, & qu’elles ont communication. Nous-mesmes
nous en appriuoisons quelques-vnes, & comme elles se fient
à nos caresses, nous portons vne mesme confiance à leur
amitié. Concluons donc que le dire d’vn certain ancien est
tres-veritable, que nous sommes mieux en la compagnie
d’vn chien que nous cognoissons, que d’vn homme duquel
la parole, & la fidelité nous est incognuë.

 

Il est donc vray qu’il n’y a rien de plus digne d’vn homme
& d’vn honneste homme que de tenir inuiolablement sa parole.
Cela toutefois, Monsieur, generalement posé, merite
bien d’estre pris en son propre sens, & vaut bien qu’on l’entende
auec des exceptions & des interpretations legitimes.
Vous imaginez-vous que les sermens qui se font contre la
loy Diuine, contre la loy Morale, contre la loy Naturelle
obligent ceux qui les ont faits ; & qu’on doiue estre scrupuleux
à rompre & à violer l’horreur de ces paroles prodigieuses
qui s’attaquent à la pieté, aux bonnes mœurs ou à l’ordre
de la Nature ? Certes, ce seroit vn renuersement estrange de
la raison de vouloir estre fidelle dans l’infidelité mesme, & de
vouloir garder encores sa conscience en l’abandonnant.
Celuy qui auroit iuré d’haïr Dieu & de tuer son pere, seroit-il
obligé à ce parricide & à cette impieté ? & ne faut-il pas
quand on parle de tenir sa parole entendre que c’est en choses
iustes & non pas dans les criminelles.

Cela estant, Monsieur, estes vous obligé d’estre si de le à
Monsieur le Prince, & la parole que vous pouuez luy auoir
donnée, & qui vous met la main aux armes, n’est elle pas vne
parole criminelle, puis qu’elle renuerse l’obeyssance que
vous deuez au Roy ? Ne vous ay-je pas desia dit que nostre

-- 34 --

premier amour estant deub à Dieu, le second estoit deub à
nostre Souuerain ? Il s’ensuit doncques que la premiere fidelité
que nous deuions aux hommes luy est deuë. Il s’ensuit
donc que sans vous trahir, vous ne pouuez seruir Monsieur
le Prince, puis que son seruice est contraire à celuy du vostre
legitime. Si vous considerez sans passion ce qu’est la parole
que vous pouuez luy auoir donnée, vous direz que c’est
plustost vn vain esbat de vostre gayeté & de vostre bonne
humeur, que non pas vn serieux renoncement de vostre deuoir.
Vous direz, i’estois subiet du Roy quand ie vous ay promis
d’estre le vostre. Ie ne pouuois pas disposer d’vne fidelité
que ie suis obligé de conseruer comme ma vie, puis qu’elles
sont nées toutes deux ensemble, & que i’ay auec toutes
deux de semblables ou de peu differens attachemens.

 

Nous sçauons bien que les Princes, ordinairement ne
veulent point d’amis ny de seruiteurs à demy. Ils entendent
qu’on leur donne tout le cœur & toute l’action sans reserue ;
les exceptions que l’on doit faire dans l’amitié, & dans le
deuoir ne leur plaisent pas. Mais il leur faut donc des esclaues,
& non pas des gens de merite & de qualité, pour amis
& pour seruiteurs. Il faut donc qu’ils s’acheptent des amis
mercenaires & infames, qui estiment le prix du vice plus excellent
que la vertu. Et ie ne veux pas penser, Monsieur, que
vous veilliez estre de ces infames & de ces mercenaires, ny
que vous ayez mis à vn prix si bas & si indigne, ce grand courage
qui nous a tant valu.

Ainsi quelque amitié que vous ayez promise à Monsieur
le Prince, vous l’auez bornée aux Autels & au Throsne de
vostre Roy, & vous n’auez point voulu la rendre contraire à
l’amour de Dieu & du Souuerain. I’en parle ainsi, Monsieur,
parce que vostre merite m’en asseure, & qu’il ne faut pas
auoir de moindres sentimens de vostre vertu. Laissez donc
dans son malheur vn Prince declaré coupable, puis que vous
ne pouuez l’y suiure ny l’en retirer iustement. N’escoutez
plus la voix d’vne amitié criminelle, puis qu’il y va de vostre
deuoir de la reietter ; & quoy qu’elle ait de triste & de pitoyable

-- 35 --

qui vous esmeuue. Considerez aussi ce qu’elle a de laid
& d’affreux qui nous espouuante, & qui vous doit donner
pour elle autant d’horreur que de compassion.

 

Quand mesmes il pourroit arriuer que vous peussiez encor
luy conseruer des tendresses legitimes, à quoy pretendez-vous
que luy seruẽt les armes que vous auez prises, & le trouble
duquel vous nous menassez ? Ie veux que vous aimiez le
Prince de Condé iusques à ne vouloir plus de repos dans son
infortune, que pourriez vous faire autre chose que de vous
dre, & à quoy luy pourroit seruir vostre malheur ? S’il ne
vous aime pas vous feriez bien mal conseillé de vous precipiter
pour vn ingrat qui ne vous en sçauroit point de gré, &
s’il vous aime vostre fureur luy seroit bien cruelle, & au lieu
de donner remede à ses deplaisirs, vostre perte luy en augmenteroit
bien sensiblement la violence. De quelque sorte
doncques que vous puissiez considerer le Prince de Condé,
ou comme ingrat, ou comme recognoissant, vos desseins
vous seront mal-heureux sans luy estre vtiles : Vous ferez
beaucoup contre vous & rien pour luy ; & s’il faut vous asseurer
d’vne verité bien plus grande & bien plus considerable,
vous ferez encores autant contre luy que contre vous,
& le zele qui veut le seruir vous perdra tous deux ensemble.

N’auez vous iamais leu dans Plutarque, que Cesar desirant
passionnément le nom de Roy, & en ayant tesmoigné
quelque chose au peuple, il attira l’aduersion de tout le
monde, & se fit hayr par cette ambition autant que s’il eust
vescu modeste il se fut fait aimer. Ne vous souuenez vous
point que ses amis qui luy en donnerent le tiltre, furent emprisonnez ;
& qu’Anthoine qui particulierement luy en
voulut donner les marques, & luy ceindre le Diademe, sur
la Tribune mesmes des harangues, mit en si grand colere
tout le monde, qu’il fust cause sans doute de la conspiration
de Brutus, & de la mort tragique qu’il receut par la main de
ce digne successeur des Liberateurs des Romains.

C’est ainsi qu’on nuist bien souuent à ceux que l’on pretend
seruir, & que nostre affection est quelquefois est si

-- 36 --

aueugle, qu’elle destruist son objet à force de zele ; Quelque
fois si pressente & si peu iudicieuse, que comme les singes,
elle estouffe ceux la qu’elle embrasse. Epaminondas qui sçauoit
tres-bien qu’vne trop violente ardeur est tousiours dangereuse,
quant il entreprit de sauuer son amy Pelopidas, moderoit
la sienne, & quoy qu’il fust assez puissant pour vaincre
celuy qui le tenoit prisonnier, il ne voulut pas toutefois vser
de la violẽce, & il attendit qu’on luy renuoyast de bon gré celuy
qu’il craignoit de perdre en se seruant de toute sa force.

 

Quand vous seriez, Monsieur, comme Epaminondas, assez
fort pour faire trembler ceux qui retiennent Monsieur le
Prince, vous auriez assez à trembler vous-mesme, si vous
l’aimez, & vous deuriez tousiours assez craindre qu’on ne
vengeast sur luy les desordres que vous nous feriez, en attendant
qu’on les peust venger dessus vous. Pensez-vous que la
voix publique qui crie desia si fort contre luy, s’appaisast par
vos violences, & qu’on ne redoublast pas ses grilles & ses
gardes quand on considereroit le mal qu’il est capable de faire
par celuy que feroit vn foible reste de son party dissipé.
L’amour doncques que vous pouuez luy témoigner en cette
conjoncture, a plustost des effets de haine que d’inclination,
& vous sembleriez plustost vous opposer à sa liberté que la
rechercher.

Laissez doncques ce malheureux Prince dans vne infortune
sans remede, & esperez de la clemence du Roy ce qu’il
ne doit pas attendre de vostre secours. C’est luy qui de plein
pouuoir l’ayant enuoyé à la Prison l’en peut faire retourner
par la mesme puissance. Comme il est le Chef de la famille
Royale, il est aussi le Pere des Princes ; Ne luy est-il donc
pas permis de chastier ses enfans pour les rendre sages ? & ne
peut-il pas donner à ses membres la Loy qui luy plaist sans
qu’on ait droit de s’y opposer, ny mesmes de luy en demander
la raison ? Reuenez doncques icy, Monsieur, & laissez
faire à sa volonté ce Souuerain pere de famille ; Ce Souuerain.
Chef de la Monarchie, il n’est pas iuste que vous qui l’auez si
bien seruy vous opposiez à ses desseins. Il faudroit auoir vne

-- 37 --

ame rebelle, & non pas vn esprit genereux comme est le vostre,
pour entreprendre ce que vous semblez auoit entrepris.
Nous sçauons bien, Monsieur, qu’il y a des mouuemens qui
sont hors de nostre puissance. Il n’est pas aisé de resister aux
premieres impetueuses saillies qui nous tirent de nostre raison ;
mais apres que ce coup de vent est passé, il faut rentrer
dedans la bonace, & n’exciter pas nous pourrions petit.
artificieux & pernicieux, par lesquels nous pourrions perir.
Si vous quittez les armes que vous auez prises, il y a encores
lieu de pardon, & il est encor temps de se repentir. Vn genereux
regret de vostre faute vous en fait obtenir la grace, &
chacun prendra plaisir à tout rejetter, sur l’inuincible violence
d’vne premiere & d’vne imprudente chaleur.

 

Laissez donc la, Monsieur, tout cet attirail de colere ces soldats,
ces canons, & tous ces preparatifs inhumains, de sang,
de carnage, & d’horreur. Nous allons entrer au Printemps,
la saison est plus belle à cueillir des fleurs, qu’à porter des
armes. Ne me dites point qu’on cueille des lauriers à la guerre,
ils sont verts, Monsieur, en toute saison ; mais si nous laissons
flestrir les roses & les œillets, nous ne les reuerrons
qu’vn autre année ; & puis à dire la verité, en cet incommode
exercice, on prend bien souuent les cypres pour des lauriers,
& l’on trouue encores bien moins de triomphes que
de funerailles. Si vous voulez toutefois vaincre & triompher,
faites vn choix digne de vous, pour vos victoires &
pour vos triomphes. N’auons nous pas assez d’ennemis sans
nous faire la guerre les vns aux autres, & si vostre courage demande
vn noble exercice, en peut-il trouuer de plus beau
que de seruir son Roy & sa Patrie, & d’humilier l’audace de
nos ennemis. Vous auez desia fait de si belles choses, nous
auons si bien chanté vos iustes exploits ; estes vous las de nos
applaudissemens, & trouuerez vous plus douces nos reproches ?
seriez vous de l’humeur chagrigne de cette ridicule
diuinité qui ne vouloit pas receuoir des louanges de ceux
qui l’adoroient, & qui n’en demandoit que des iniures. Desia
l’on commence à vous condamner, tout le monde murmure

-- 38 --

de vostre au dace, & si peu que la patience s’ennuie dauantage,
on esclattera contre vous sans retenuë ; toutes vos actions
passées n’auront plus de force sur les esprits ; & comme il
n’est point de blancheur que la noirceur de l’ancre ne salisse
& n’efface, il n’est point aussi d’esclat dans vos actions passées
qui ne s’enseuelisse dans l’infamie des presentes, & qui
ne se perde dans cet abysme de malheurs que vous vous causez.
On vous considere non plus comme vn sage, comme vn
vaillant, & comme vn fidel Germanicus, mais comme vn
cruel, vn desesperé perturbateur du repos public, vn ennemy
du Prince & du peuple. Vous auez beau flatter & promettre
de belles choses, on cognoist trop que les debordemens
de vos passions ne sont pas comme ceux du Nil qui
font la richesse de la terre, ils en font plustost le dommage.
Si vous estes de l’humeur des Lestrigons, qui viuent de
sang, & de celle des Salemandres qui se nourrissent dans
les flammes. Tout le monde n’en est pas de mesmes, & ces
deux sortes d’alimens nous font horreur & nous donnent
de la terreur autant qu’elles vous pourroient donner de
plaisir.

 

Ce n’est pas toutefois que cette terreur soit grãde, cõme cette
horreur est extreme : vos armes espouuantent fort peu ceux
qu’elles offensent, & donnent fort peu de crainte en donnant
beaucoup d’auersiõ. On voit bien que d’vn party qui à la teste
abattuë, vous ne pouuez estre que de foibles membres ; que
comme ces serpens qui sont couppez en deux, vous remüez
encor la queüe, plustost par vn reste de chaleur mourante,
& par vne foible inquietude d’esprits esperdus, que par vn
vigoureux principe de vie. Il est de vos desseins & de vos
mouuemens, comme de ceux des flots agitez par la tempeste :
elle finist, mais ils ne finissent pas si tost qu’elle ; le vent
& la pluye s’appaisent, l’horreur des tenebres se dissipe ; le
feu des esclairs cesse, le tonnerre se taise, les nuages s’escartent,
le Ciel paroist serain, le Soleil brille sur les ondes, tout
est calme, & les vagues sont encor esmeuës. Cette esmotion
toutefois ne dure plus gueres quand la cause est cessée il

-- 39 --

faut que l’effet cesse, & que la tranquilité vienne, puis que
le vent ne dure plus.

 

Voila les comparaisons qu’on fait contre vos entreprises.
Si l’on prend les armes pour vous combattre ce n’est
que par impatience ; vous ne pouuez manquer, dit-on, de
vous ruiner de vous-mesmes si l’on vous en vouloit donner le
loisir. Et de vray, quand il n’y auroit contre vous que les vœux
de toute la France, auez vous assez de soldats pour y resister ?
Si Moyse autresfois gagna des victoires par ses prieres,
croyez vous qu’on ne puisse encor vaincre de la mesme façon ?
ie veux que ses souspirs perçassent le Ciel auec plus d’efficace
que ne font les nostres, si n’auoit-il toutesfois que la
voix d’vn homme, & celle du peuple est la voix de Dieu.
Cette legion Chrestien ne que les Romains nommoient la
legion foudroyante, n’est elle par encor parmy nous, & n’en
craignez-vous point les efforts ?

Rentrez, rentrez, Monsieur, en vous-mesme d’où vostre
passion vous a sorty. Consultez les Oracles de cette raison
que vous auez mesprisée, & reprenez cet esprit de sagesse
& de generosité que vous auez abandonné. Vous verrez
que vos desseins sont des monstres qui doiuent mourir aussi-tost
que néz. Vous-mesmes vous condamnerez ces enfantemens
illegitimes, & les fruicts horribles qui ne naissent que
des accouplemens déreglez, des puissantes brutales, & des
facultez de la raison. Vous-mesmes vous serez fasché de
l’empire que vos sens ont pris sur vostre esprit, & vous rendrez
à cét esprit l’empire qu’il doit auoir sur ses sens.

Pour moy, si l’amitié que ie vous ay iurée, qui n’est point
mercenaire, qui n’est point aueugle, qui ne flatte non plus
qu’elle trahist, me peut donner la liberté de vous dire tout
ce que ie pense, & de vous le dire dans des termes dignes de
sa vertu, & de la force qu’elle luy donne ; Ie vous feray vne
espece de commandement, & ie vous diray, reuenez ; ne
demeurez plus dans l’obstination ny dans la desobeïssance,
vostre Prince vos deigne appeller, ne faite point le sourd à sa
voix. Venez auec nous admirer ce Soleil qui dans sa naissance

-- 40 --

fut si brillant, qui constinuë sa cource auec tant de lumiere,
& duquel nous pouuons dire malgré la Perse & toutes
les Indes, que dans nostre Occident il fait vn Orient si
beau, que toute la terre luy doit rendre hommage. Venez
joindre vos cris de ioye, aux clameurs des Prouinces soûmises,
& augmentez d’vn ton esclattant, la perfection de cette
fidelle harmonie, par laquelle les cœurs qui ne parlent pas,
expriment l’amour qui les brule, & le zele qui les transporte,
& par laquelle ils font estendre ces pensées toutes de flâmes.

 

SONNET.

 


Qve le Ciel, qui nous fit ce present glorieux,
Conserue ses beautez, sa bonté, sa puissance ;
Qu’il donne à ses vertus l’éclat de sa naissance,
Et comble son esprit, des graces de ses yeux.

 

 


Qu’on ne puisse rien voir d’égal, dessous les Cieux.
Qu’il soit, comme vn rayon, de la diuine Essence ;
Qui tire par amour, toute l’obeïssance :
Et merite mortel, l’Auguste Nom des Dieux.

 

 


Mais qu’auec tant de grace, auec tant de merite,
Si l’amour qu’il nous donne, & qui nous sollicite,
L’eleue peu s’en faut iusques sur les Autels ;

 

 


Le Ciel deigne souffrir, vn feu qui n’est pas crime ;
Nous pouuons eleuer, d’vn zele legitime,
Prés des derniers honneurs, le premier des Mortels.

 

Par M. L.

FIN.

-- 41 --

Section précédent(e)


M. L. [signé] [1650], LETTRE OV EXHORTATION d’vn Particulier A MONSIEVR LE MARESCHAL DE TVRENNE, Pour l’obliger à mettre bas les armes. , françaisRéférence RIM : M0_2249. Cote locale : D_2_38.