LETTRE
DE CONSOLATION
A MONSEIGNEVR
LE DVC DE
VANTADOVR,
CHEVALIER DES
ORDRES DV ROY, CY-DEVANT
Lieutenant pour le Roy és païs de
Languedoc, & Chanoine de l’Eglise
de Nôtre Dame de Paris.

SVR LA MORT DE MONSEIGNEVR
le Duc de Vantadour son Frere, Cheualier des Ordres
du Roy, & Lieutenant pour le Roy au païs de
Limosin.

MONSEIGNEVR,

SI nous estions du temps des
Payens, qui prenoient des pleureurs à gages,

-- 4 --

pour rendre leur douleur plus connuë, les larmes
de toute la France feroient voir au reste des
Nations, à la perte de Monseigneur le Duc de
Vantadour, la qualité de celle que tout le monde
souffre, lors que Dieu retire à soy ces belles
Ames, l’ornement de l’Vniuers, & la consolation
des affligez. Mais puis que la Foy nous apprend
que l’Eternité est preferable au temps, &
la Beatitude à la misere de cette vie, il ne faut
donner à la mort de nos proches que certaines
expressions de sentiment qui ne passent pas la
mesure de nos tendresses Chrestiennes & raisonnables ;
& seulement comme nous regrettons
le depart & l’absence de nos amis dans vn
voyage éloigné : MONSEIGNEVR vostre
Race est plus florissante & glorieuse dans le Ciel
que sur la terre, quoy que les tiltres que vous
possedez çà bas soient des plus illustres, il faut
aduoüer que les Alliances des Rois sont moindres
en dignité que celles d’estre descendus de
cette diuine Tige de Leui, qui a porté le salut
du Genre humain ; Et c’est plus dire de vos grandeurs,
en proferant vostre Nom, que de vous
faire souuenir que vous estes sorti de la premiere
Noblesse de la Chrestienté du costé maternel ;
Apres cela, MONSEIGNEVR, il ne se
peut que vous ne passiez au dessus des accidens
par les lumieres & les graces, qui sont l’appanage

-- 5 --

de vos sainctes habitudes ; Vous imitez la
Vierge dans l’obseruation d’vne exemplaire
Chasteté ; & quelques charmes qu’vne belle
Princesse ait eu pour attaquer vostre resolution,
l’amour de Dieu a preualu sur les volontés humaines
qui vous auoient engagé dans vn Mariage
tres-parfaitement assorti ; si bien que de
vos diuines & miraculeuses vnions est sorti ce
Vœu inuiolable de vous donner à Dieu irreuocablement,
& pour jamais : Tout cela, MONSEIGNEVR,
sont des effets de vostre predestination ;
Cét Estre des Estres s’interesse
plus cherement qu’au reste du monde des Seigneurs
de Leui ; & s’il le tire promptement de
ce sejour perilleux ; c’est par excés d’amour
pour la pureté de leurs mœurs : Il est vray,
MONSEIGNEVR, & j’estime que de mesme
qu’il y a vn Pseaume dans l’Eglise pour l’enterrement
des Ames pures, il y en deuroit auoir
pour ses suprémes Seigneurs de Leui : Mais ce
que les hommes ne vous rendent pas, les Anges
vous les reseruent, ils chantent dans tous
leurs Cœurs & Legions le merite de vos œuures,
& la joye de vos exaltations. MONSEIGNEVR,
vous qui ne differez pas de leur
Charité, & de l’ardeur de leurs flâmes, la tristesse
ne doit pas estre vôtre partage au plus
fort des faueurs Celestes : Ie m’asseure aussi que

-- 6 --

vous loüez les Decrets du Tout puissant, dans
les souffrances du sang, & que de bon cœur
vous luy dites que sa volonté soit faite en vous,
& en tout ce qui vous touche aussi estes-vous
plus en luy qu’en vous mesme, sa Croix est vostre
recours, vous ne demandez pas par foiblesse
ny defaut de zele allegement dans les vostres ;
C’est ce qui vous comblera de ces belles & immortelles
Couronnes de gloire, que ie vous
souhaite en qualité

 

MONSEIGNEVR,

De vôtre tres-humble &
tres-obeïssante seruante,

SVSANNE DE NERVESE.