DIALOGVE DV ROY,
ET DV DVC D’ANIOV,
AVEC LA MAMMAN.

Le Roy. IL y mange bien des mousches qui
n’y voit.

Le Duc d’Anjou. Il n’en faut croire ny
Gautier ny Garguille, il en faut faire à sa teste.

La Reyne. Qui folle par conseil, ne folle
qu’à demy.

Le Roy. Les vrays amis sont bien rares.

La Royne. Encore s’en peut-il trouuer vn
entre mille, & la mere n’en est pas morte.

Le Roy. Mon Cousin le Cardinal n’en est-il
pas le Phœnix ?

Le Reyne. Vous deuriez baiser la terre par
où il passe.

Le Roy. Mamman, Vous allez vn peu bien
viste en besongne.

Le Reyne. Vostre Majesté ne le connoist
pas comme ie fais.

Le Roy. Ie le cognois tant, que ie ne l’en
aime pas mieux.

-- 20 --

La Reyne. Vous voyez ce qu’on vous fait
quand il n’y est pas.

Le Roy. Et ie sçay ce que vous faites quand
il y est.

La Reyne. Vous en sçauez beaucoup, ie ne
sçay qui vous en a tant appris.

Le Roy. Ie ne dis mot, mais ie n’en songe
pas moins.

La Reyne. Ie vous conseille de ne rien garder
sur le cœur.

Le Roy. Tout vient à temps, qui peut attendre.

Le Duc d’Anjou. Mamman, Monsieur le
Cardinal vaut son prix, personne ne le blâme,
il n’y a que vous qui l’appellez Cu brûlé ;
Mais quand il ne viendroit iamais icy lanterner
le beurre, tout ne s’en porteroit que
mieux, i’auois cecy à vous dire, parce qu’il ne
me reuient de nulle part où ie l’enuoye. Adieu
Mamman, quand les mots sont dits, l’Eau
beniste est faite : Pensez-y plus d’vne fois,
& songez sur tout qu’on n’est pas tousiours
soubs la verge, & qu’enfans deuiennent gens.

La Reyne. Ces Badins me donneront bien
des affaires ; mais voyez vn peu, les Pistcaux

-- 21 --

enseignent à la Pie à faire son nid ; mais n’importe,
il n’y a remede, il en faut passer par
là ou par la fenestre, chose promise est deuë,
& puis le terme vaut l’argent ; & qui a vne
bonne heure en sa vie, n’a pas tousiours
pauureté.

 

FIN.