ORDONNANCE
DV ROY,
EN FAVEVR DES BOVRGEOIS
& Habitans de sa bonne ville de Paris,

Pour l’ouuerture & liberté des passages des Bleds,
Vins, Bois, Poisson, & autres denrées destinées
pour la prouision de ladite Ville.

Donné à Ponthoise le 29. Septembre 1652.

DE PAR LE ROY.

SA Majesté estant informée
des empeschemens qui se
font aux Passages des Marchandises
de Bleds, Vins,
Bois, Poisson, & autres, destinées
pour la prouision de sa bonne Ville
de Paris, lesquelles on arreste aux
passages des Villes, Ponts & Ports des

-- 4 --

Riuieres, au prejudice des deffenses
qui en ont esté faites ; A quoy desirant
pouruoir ; & voulant tesmoigner
aux Bourgeois & Habitans de
ladite Ville, le soin particulier qu’elle
prend des choses qui les concernent ;
SADITE MAIESTÉ a fait &
fait tres-expresses inhibitions & deffenses
à tous Gouuerneurs des Prouinces
& Villes de son Royaume, &
à tous Generaux d’Armée, Mestres
de Camps, Capitaines & Conducteurs
des Gens de Guerre de quelque
Nation qu’ils soient, de faire ny
permettre estre fait aucun empeschement
à la voiture, conduitte &
passage des marchandises destinées
pour la prouision des Bourgeois &
Habitans de ladite ville de Paris, à
peine de des obeïssance. ENIOINT
ausdits Gouuerneurs, Lieutenans-Generaux,

-- 5 --

Maires & Escheuins des
Villes, & Officiers des lieux où passeront
lesdites Marchandises, de fauoriser
la conduitte d’icelles en ladite
ville de Paris, & prester main-forte
& confort aux Marchands &
Voituriers, à peine d’en respondre
en leur propre & priué nom ; Sadite
Majesté les ayant pris & mis en
sauuegarde. ET afin qu’vn chacun
soit plainement informé de son intention,
elle veut & entend qu’a la
diligence du sieur Pietre son Procureur
en ladite ville de Paris, les
coppies de la presente Ordonnance
deuëment collationnées, en soient
enuoyées par tout où il appartiendra ;
& qu’il soit informé à sa requeste
des contrauentions qui pourroient
estre faites, pour estre procedé
contre les contreuenans ainsi

-- 6 --

que le cas le requierra. FAIT à Ponthoise
le vingt-neufiesme jour de
Septembre mil six cens cinquante-deux.

 

Signé, LOVIS,
& plus bas,
DE GVENEGAVD, & seellée.

Collationné à l’Original par moy Conseiller
Secretaire du Roy & de ses Finances.

-- 7 --