DE PAR LEROY

SA Majesté ayant esté informée
des bruits que l’on respend en sa
bonne Ville de Paris, que l’on a
dessein d’y empescher le transport
des viures, & autres denrées,
& que le peuple en a conçeu vne grande aprehension
de tomber en quelque disette & necessité,
d’où il pourroit arriuer diuers inconueniens
au prejudice du repos de ladite Ville,
& du seruice de sa Majesté. Et voulant les
empescher, & pouruoir par son auctorité,
& auec l’affection singuliere & sincere que sa
Majesté a pour le bien de ladite Ville, à ce que
non seullement le commerce ordinaire des
Bleds, & autres viures & marchandises soit
entretenu ainsi qu’il est accoustumé, mais aussi
qu’il y en ait la plus grande abondance qu’il
se pourra SADITE MAIESTÉ, par l’aduis de la
Reyne Regente sa Mere, Mande & ordonne
tres-expressément aux Gouuerneurs, & ses

-- 3 --

Lieutenans generaux en ses Prouinces, Gouuerneurs
particuliers de ses Villes & Places,
Maires & Escheuins d’icelles, Scindicqs &
principaux Habitans des autres lieux, scituez
sur les riuieres de Seyne, Marne & d’Oyse, &
en toutes les aduenuës de sa bonne Ville de
Paris, de tenir tres-soigneusement la main, à
ce que les Marchands forains, Boulangers,
Viuandiers, & toutes autres personnes qui
conduisent & transportent ordinairement
des Chairs, Belds, Vins, Legumes, Auoines,
Foings, Bois, Charbon, & tous autres viures,
denrées & marchandises generallement quelconques,
seruans à la nourriture & autres,
aillent & viennent incessamment, tant par
eauë que par terre, auec la plaine & entiere
liberté accoustumée ; Faisant deffences tres-expresses
à qui que ce soit de leur apporter
aucun trouble ny empeschement, pour quelque
cause & occasion, & sous quelque pretexte
que ce puisse estre, à peine de punition exemplaire.
Enjoint sa Majesté aux Preuost des
Marchands & Escheuins de sa Ville de Paris,

-- 4 --

de faire publier, & afficher par tous les Ports,
& ailleurs où besoin sera, la presente Ordonnance :
Et à tous Baillifs, Seneschaux, Preuosts,
& autres Iuges, ou leurs Lieutenans,
d’informer & proceder contre ceux qui contreuiendront
à icelle, selon la rigueur des Ordonnances,
à ce qu’aucun n’en pretende cause
d’ignorance. Fait à Ruel, le 24. jour de Septembre
1648. Signé, LOVYS. Et plus bas,
DE GVENEGAVD.

 

CE jourd’huy Vendredy 25. jour de Septembre 1648.
de l’Ordonnance de Messieurs les Preuost des
Marchands & Escheuins de cette Ville de Paris, l’Ordonnance
du Roy, cy dessus transcrite, a esté par moy
Iean Iossier, Iuré Crieur ordinaire du Roy, en la Ville,
Preuosté & Vicomté de Paris, publiée à son de Trompe
& cry public, par les Carrefours, Ports, Quays, &
Places publiques, & autres lieux accoustumez, assisté de
Iean du Bois, Iacques le Fance, Iurez Trompettes, du
Roy, & d’vn autre Trompette, Commis de Didier
Dourdin, aussi Iuré Trompette du Roy, esdits lieux.
Signé, IOSSIER.