SVR ce qui a esté representé à sa Majesté
de la part des Preuost des Marchands
& Escheuins de sa bonne Ville de Paris,
Qu’au preiudice de ce qui leur a esté
accordé par sa Majesté, aucunes des
Villes estans sur les Riuieres de Marne & de Seyne,
& autres lieux, d’où il peut venir des Bleds à Paris,
ont fait difficulté d’en laisser sortir desdites Villes &
lieux, pour n’auoir pas receu d’ordre de sa Majesté
sur ce sujet. Et voulant y pouruoir : SA MAIESTÉ
par l’aduis de la Reyne Regente sa Mere, A ordonné
& ordonne, que les Bleds & toutes sortes de grains,
Vins & autres viures & denrées quelconques seront
tirées & transportées de toutes parts, & passeront en
toute liberté & seureté en ladite Ville de Paris, tant
par eauë que par terre, Et que le Commerce de toutes
Marchandises y sera entierement libre & restably,
tout ainsi qu’il estoit auant le present mouuement.
MANDANT sa Majesté aux Gouuerneurs & ses Lieutenans
Generaux en ses Prouinces & Armées, Mareschaux
de Camp, ayans commandement sur ses

Troupes, Gouuerneurs particuliers de ses Villes,
Maires & Escheuins d’icelles, & tous autres ses Officiers
qu’il appartiendra, de tenir la main à l’execution
de la presente : & de la faire publier en toutes les
Villes & lieux que besoin sera, à ce qu’aucun n’en
pretende cause d’ignorance. FAICT à Sainct Germain
en Laye le vingtiéme iour de Mars mil six cens
quarante-neuf. Signé, LOVIS, Et plus bas,
LE TELLIER.

Collationné à l’Original estant au Greffe de l’Hostel
de Ville de Paris, par moy Greffier de ladite Ville
soubs signé, pour estre executées selon sa forme &
teneur, foy y estant adioustée comme audit Original,
ce vingt-vniéme Mars 1649. LEMAIRE.