Anonyme [1649], LA REFVTATION DES ARTICLES DE PAIX, QVI ONT ESTÉ PASSEZ A RVEL ENSEMBLE LES VERITABLES nouuelles receues de leur reformation le 14, 15 Mars 1649. , françaisRéférence RIM : M0_3069. Cote locale : C_9_20.
Section précédent(e)

LA
REFVTATION
DES
ARTICLES
DE PAIX,
QVI ONT ESTÉ PASSEZ A RVEL

ENSEMBLE LES VERITABLES
nouuelles receues de leur reformation,

le 14, 15 Mars 1649.

M. DC. XLVIII.

-- 2 --

-- 3 --

LA REFVTATION DES ARTICLES
de Paix qui ont esté passez à Ruel ; Ensemble les veritables
nouuelles receuës de leur reformation.

IAMAIS on a veu tant de nouuelles, & iamais
on en veid de moins assurées, nous resemblons
iustement en cecy à ces malades
qui reçoiuent toutes sortes de remedes : sans
receuoir soulagement en leurs maux, & qui
augmentent leur fiéure par les soins & les inquietudes
qu’ils en prennent. Comme nous sommes malheureusement
trauaillez de la guerre, & que nous desirons passionnement
la Paix, toutes les nouuelles nous en sont agreables,
bien qu’elles ne soient pas vrayes, sans considerer
qu’estant ainsi, elles nous causent plus de troubles qu’auparauant.
L’arriuée de nos Deputez qui venoient de Ruel,
ne nous faisoit-elle pas esperer vne Paix solide & de
durée ? Et les Articles qui en furent veuës le lendemain, n’en
estoient-ils pas comme le sceau, & le caractere ? Et neantmoins
nous voyons dans la suitte, que les choses sont en
mesme estat qu’auparauant, que les affaires sont aussi embroüillées
que iamais. En effet, ils ne se peuuent ny receuoir,
ny executer, à moins que nous voulions nous sousmettre
à des conditions honteuses, & indignes d’vn cœur
vrayement François, & nous rendre esclaues d’vn perfide
Estranger, qui n’estant né que pour obeyr par vne ambition
naturelle aux Italiens veut commander à vn Royaume
Vainqueur des Nations, & à vn Peuple qui ayme trop
la liberté pour estre gourmandé en ses actions : Non, non,
les François passeroient pour les plus lasches du monde
s’ils obseruoient des conditions qui leur seroient prejudiciables,
& s’ils n’estoient assez resolus pour choisir plustost vne
mort glorieuse, qu’vne vie sans honneur & sans courage.
Quelle apparence que nous abandonnions des Princes qui
ont si courageusement exposé leur vie pour la defense de

-- 4 --

la nostre : ou que nous souffrions, que le plus auguste,
comme le plus équitable Senat du monde, ne soit plus ce
qu’il est. Ainsi qu’il a esté desiré dans les Articles signez.
Quel object d’horreur & d’animositez, serois-ce de voir
vn Estranger sans vertu, sans merite, sans naissance, s’asseoir
sur les Fleurs de Lys, & tenir rang parmy les Princes.
Comment pourrons nous voir aussi nos voisins ruinez
sous la charge des subsides, eux qui n’ont esperé qu’en
nous, & qui se sont tousiours persuadé que nous les assisterions
de nos armes, de nos biens, & de nos forces.

 

Mais enfin, comment souffrir cette malheureuse engeance
de Maltotiers & Partisans, qui comme sangsuës affamées
succent les peuples iusques au sang, & les font mourir de rage.
Il faut donc croire que les Articles de Paix signez à
Rüel sont pour la pluspart faux, comme ils ont esté distribuez
par la ville de Paris, ou que Messieurs les Deputez
feront en sorte de les faire reformer, ou bien qu’ils seront
absolument refusez. De cette reformation, nous en auons
receus des asseurances tres-certaines, selon les lettres secrettes
enuoyées de sainct Germain, qui disent ce qui s’ensuit.

Que Monseigneur le Duc d’Orleans, Oncle de sa Majesté,
est tousiours Generalissime de ses armées.

Que Monsieur le Duc de Beaufort sera son Lieutenant
general.

Monseigneur le Prince de Condé ira en son Gouuernement
de Bourgogne pour le seruice du Roy &
de l’Estat.

Monseigneur le Prince de Conty sera Gouuerneur de
la Champagne & de la Brie.

Le Cardinal Mazarin se retirera presentement hors
de la France.

L’Archiduc Leopold, qui est aupres de Noyon, s’en
retournera à son poste.

Les villages d’alentour de Paris qui ont esté ruinez des
gens de guerre seront remboursez, comme il en sera ordonné
par le Conseil selon les informations qui en seront
faites par les Commissaires establis pour cét effet.

FIN.

Section précédent(e)


Anonyme [1649], LA REFVTATION DES ARTICLES DE PAIX, QVI ONT ESTÉ PASSEZ A RVEL ENSEMBLE LES VERITABLES nouuelles receues de leur reformation le 14, 15 Mars 1649. , françaisRéférence RIM : M0_3069. Cote locale : C_9_20.