LETTRES
DE MONSIEVR
le Prince à Monsieur de
Montbazon, & à Messieurs
les Preuost des Marchands
& Escheuins de la
ville de Paris.

Monsieur, Vous
auez appris par la Lettre du Roy
les raisons qui ont obligé Sa Majesté
à prendre la resolution de
sortir de Paris & à moy de la luy
conseiller, ayant esté bien informée du d’anger
où sa personne se trouuoit exposée par
vn plus long sejour. Ie ne doubte point qu’en
ce rencontre vous ne donniez des marques
de vostre affection ordinaire au seruice du
Roy : Ce qui vous sera d’autant plus aisé que
vous trouuerez, ie m’asseure, les habitans
de Paris en la mesme disposition où ils ont

-- 2 --

tousiours esté de rendre au Roy toute sorte
d’obeyssance & de fidelité. Sur ce ie suis,

 

Monsieur,

Et plus bas, Vostre bien humble seruiteur.

Signé, LOVIS DE BOVRBON.

A costé, ce sixiéme Ianvier 1649.

Et à la suscription est escrit,

A Monsieur Monsieur, le Duc de Montbazon
Pair de France, Gouuerneur pour
le Roy de l’Isle de France & de la ville de
Paris.

Messieurs, Vous aurez esté informés
par la dépesche du Roy, de ce qui a
obligé Sa Majesté à sortir de Paris : Les mesmes
raisons m’ont porté à luy en donner le
conseil, reconnoissant qu’vn plus long sejour
eust esté asseurement prejudiciable à la
seureté de sa personne. Vous auez donné par
le passé tant de preuues de vostre fidelité au

-- 3 --

seruice du Roy, & Sa Majesté en est si
satisfaite, que ie ne doubte point que vous
ne les continuyez en ce rencontre, & me
donniez moyen de vous faire paroistre que
ie suis,

 

Messieurs,
Et plus bas, Vostre tres affectionné à vous
faire seruice, Signé, LOVIS DE BOVRBON.

Et à costé le 6. Ianuier 1649.

Et à la suscription est escrit,

A Messieurs Messieurs les Preuost des Marchands
& Escheuins de la ville de Paris.

Imprimé à saint Germain en Laye, Auec
Priuilege du Roy.

-- 4 --