LA HONTEVSE SOR TIE
des Mazarins hors de la
Ville de Paris.

Ensemble la chasse à eux donnée par la
Paille victorieuse.

C’EST vne chose naturelle à
l’homme de se réjoüir quand il
voit approcher la fin de ses
maux. Nous le voyons par experience
au sujet de la bonne & veritable
Vnion de Messieurs nos Princes,
du Parlement, & de la Ville de Paris,
dont nous deuons d’autant plus nous
réjoüir, qu’il y a de bon-heur en ce
rencontre, parce que ce sera là où se
terminera nos longues miseres, atte[1 mot ill. ]
du les bonnes inclinations de ce [1 mot. ill. ]

-- 4 --

Pilote Son Altesse Royale, secondé
par la valeur de ces fameux Guerriers
le grand Condé & Duc de Beaufort,
ensemble des autres Princes & Seigneurs
qui sont de ce juste party, dont
la seule Paille est le symbole de la victoire.

 

Les adherans du Cardinal Mazarin
qui estoient demeurans & qui demeurent
encores dans la Ville de Paris,
estans troublez par l’image de leurs
crimes & par le remors de leurs consciences,
& preuoyans bien que l’éclat
de cette Paille estoit capable de
les ébloüir & renuerser tous, estans
presque reduits au desespoir, se sont resolus
enfin de vuider la Ville pour sauuer
leurs personnes, biens & vies pour
aller trouuer le C. M. ce cruel Tyran,
ennemy juré des François, & pour éuiter
au desordre qui se pourroit commettre
au pillage de leurs maisons.

-- 5 --

C’est pourquoy le Roy d’Angleterre
voyant que les trahisons ne luy
seruoient plus de rien, & ne tournoient
qu’à sa confusion, s’en est allé
pour rendre vn compte exact de toutes
les fourberies qu’il a faites pour
détourner le Duc de Lorraine de l’affection
qu’il auoit pour S. A. Royale
& Messieurs les Princes.

Le Coadjuteur de Paris s’en est
aussi allé, pour remercier le Cardinal
Mazarin son Maistre de la faueur qu’il
luy a faite de le colloquer à la dignité
de Cardinal.

Le Mareschal de Lhospital qui a
tant vsé de ses ruses & fourberies, par
les Lettres qu’il s’est fait escrire sous le
nom du Roy, s’en est pareillement
allé, voyant que ses malices ne luy profitoient
de rien.

Le Preuost des Marchands voyant
qu’il auoit esté assiegé dans la Maison

-- 6 --

de Ville, ne sçachant par où échapper,
parce que le feu estoit à toutes les portes,
& les mousquetades qui tiroient
sans cesse estoient toutes prestes à le
punir de ses horribles méchancetez,
s’est enfin resolu de se retirer pour
donner aduis au Cardinal Mazarin de
tout ce qui s’estoit passé au peril de sa
vie, & afin d’estre recompensé de toutes
ses peines & salaires.

 

Le Lieutenant Ciuil Daubray est
aussi allé pour dire qu’il ne pouuoit
mettre remede au desordre de la Police,
qu’il a laissé croistre de iour en
iour, s’estant laissé gaigner en plusieurs
sortes de façons.

Bref il y en a beaucoup d’autres qui
se sont exemptez de la fureur du peuple,
se voyans frustrez de leurs esperances,
& que leurs cabales & menées
ne pouuoient plus auoir lieu parmy les
gens de bien, & que leurs ruses & cauteles

-- 7 --

estoient inutiles pour venir à
bout de leurs desseins.

 

Enfin tous les peuples esperent à
present le soulagement de leurs miseres,
& conçoiuent aujourd’huy vn
changement heureux par la fuite honteuse
que les Mazarins font journellement,
& par l’Vnion faite des Princes,
de la Ville & du Parlement.

L’on ne verra plus des Princes du
Sang, & des illustres Senateurs reduits
à la violence d’vn Ministre Tyran, qui
s’est toûjours esleué sur le débris des
testes les plus illustres, & sur le mespris
& les ruïnes des plus saintes Loix.

FIN.

-- 8 --