M. DC. XLIX.
LETTRE
DV
GRAND TVRC,
ENVOYÉE
AV ROY D’ESPAIGNE.
Holy Soliman, Seigneur de la Maison Otromane Empereur
& Seigneur de tous les Seigneurs & Princes du monde,
chef & deffenseur de la Loy escripte par le grand Prophete
Mahomet, Au plus grand Prince des Chrestiens deffenseur
& Protecteur de tous les Nazareens, Puissant &
remply de vertu le Roy d’Espagne, de qui la fin soit glorieuse,
apres qu’il aura à l’amiable fait la paix auec nous, Salut.
LA Renommee de tes vertus, Seigneur, m’a
esclaircy, afin que i’estime tes hauts desseins :
Encore que nous soyons de Loy differens,
ie ne desire pas assister tes Ennemis, mais
plustost t’ayder, pour te faire auoir la victoire
-- 4 --
contre eux tous, comme il est raisonnable. Et
de mon costé ie t’asseure que i’accompliray tout
ce que le Bassa mon Camerier & amy proposera
de ma part, auquel tu donneras entiere foy &
creance,
Le Seigneur vniuersel du Monde.
Les presens que le Bassa a presentez
au Roy de la part de son Maistre,
sont,
I.
Quatre Lions, auec les chaisnes & colliers
d’or massif, sur lesquels sont grauees les armes
du Grand Turc.
II.
Douze Cimetteres de Damas auec leurs garnitures
d’or, enrichies de pierreries.
III.
Quatre boules auec vne douzaine de cousteaux
emmenchez d’or, auec les Armes du
Roy d’Espagne.
-- 5 --
IV.
Vingt quatre tapis de Turquie, tissuë d’or &
desoye, ou sont representees toutes les armees
& victoires qu’a eu le grand Seigneur d’apresent.
V.
Vn petit lict de crystal de roche, releué les
courtines, & le Ciel de drap d’or, ou sont representees
les victoires du Roy d’Espagne.
VI.
Deux caisses d’or massif, remplies de riches
plumes d’Hairon & d’Aigrette.
VII.
Vne grande bouteille de crystal garnie d’or,
ou il y a quarente pierres de bezoard, chacune
pesant quatre onces.
VII.
Vne grande couuerture tissuë de soye & d’or,
auec douze estoilles d’or, dans le blanc desquelles
sont representees toutes les victoires de l’Empereur.
-- 6 --
S’ensuiuent les Articles proposez de
la part du grand Seigneur au Roy
d’Espagne.
I.
Qve le Grand Seigneur liurera entre les
mains des Chrestiens tous les lieux saincts
de Hierusalem.
II.
Qu’il y aura libre commerce entre tous les
Subjets des deux Couronnes.
III.
Que l’on ne soustiendra aucun Pirates ny de
l’vn ny de l’autre Nation.
IV.
Que Dom Iean d’Austriche se mariera auec
la Sultanne, sœur du Grand Seigneur, prise il y a
cinq ans par les Cheualiers de Malthe & maintenant
Chrestienne, à laquelle ledit Grand Seigneur
donnera vn Royaume pour doüaire.
V.
Qu’on ne fera plus d’Esclaues de part ny d’autre,
& on renuoyera ceux que l’on a sans rançon.
-- 7 --
Il y a d’autres articles reseruez, qui ne peuuent
pas estre publiees.
De tout ce que dessus, tu peux apprendre (Lecteur)
beaucoup de choses, mais principalement
considere du costé du Grand Turc cette orgueil
insupportable, de se dire le Roy des Roys, Seigneur
des Seigneurs & Prince Vniuersel de tout le
monde, quoy qu’il n’ait que la moindre partie
de chacune des trois parties de l’ancienne terre,
& ne possedant pas vn poulce de terre dans le
nouueau Monde, qui est aussi grand que l’ancien,
compris en parties de l’Europe, l’Asie & l’Afrique.
En second lieu, remarque l’abaissement de la
Maison d’Austriche, d’estre contrainte de s’allier
auec l’ennemy commun des Chrestiens.
En troisiesme lieu, remercie Dieu pour la Conuersion
de la Sultanne, & prend garde que ces
beaux presens ne te fassent conuoiter. Adieu.
FIN.
-- 8 --