Anonyme [1652], LA METAMORPHOSE DE MAZARIN, EN LA FIGVRE DV DRAGON NOSTRE-DAME. EN VERS BVRLESQVE. , françaisRéférence RIM : M0_2463. Cote locale : B_13_40.
LA METAMORPHOSE de Mazarin, en la figure du Dragon Nostre-Dame. En Vers Burlesque.
PEVPLE à mes vers prestez l’oreille, Ie vay vous dire vne merueille, Qui vous rendra le siecle d’or, Merueille qui n’est pas encor ; Mais merueille, enfin qui doit estre, Et dont vous auez veu paroistre, N’aguere le signe euident, Que ie descriray cependant.
Vous auez veu parmy la ruë, Ce Dragon à teste bouruë ; Ce Dragon qu’au bout d’vn Epieu, Belle Procession de Dieu, Fait porter vn superbe monstre : A quiconque vient à l’encontre.
Ce Dragon aussi gros qu’vn bœuf, Qui chaque œil à gros comme vn œuf :
Ce Dragon dis-je, qui la queuë, A verte, rouge, iaune & bleuë : Auec trente replis diuers : Et qui le corps à iaune & pers, Auec vn ventre de harpie, Signe d’vn animal impie, Ayant les griffes d’vn oiseau, Mais d’vn oiseau qui n’est pas beau, I’entens d’vn sale oiseau de proye ? Bref à le voir on à grand ioye, Le voyant qui tourne souuent, Ainsi qu’vn nauire à tout vent, Qui le corps à semé d’escailles, Non de plumes, comme les Cailles, Et qui monstre par tout Paris, Ses Aisles de chauuesouris, Sans parler icy de la creste, Qui sert de Couronne à sa teste : Vous l’aués veu ? car c’est enfin, Vn spectacle vrayment badin,
Disons vn mot de son histoire : Saint Marcel en ait la victoire, Et m’eist ce Mazarin à bas : Que cela soit ou ne soit pas, La chose passe pour certaine ; Et dessus les bords de la Seyne, Ce Dragon aux fiers appetits, Mangeoit dit-on Grands & petits, De tous enfin faisoit vendange, Et mesmes sur le Pont au Change, Les alloit prendre en plain midy : Le coup certes fut bien hardy, Sainct Marcel auec son estolle, Saisis incontinent le drolle, Et feist vn tel coup de sa main, Que feist autresfois sainct Romain, Lors qu’il deconfit la Gargoüille, Dont on voit encor la dépoüille, A Nostre-Dame de Rouen, Qui de rouë exempte chaque-an Vn Braue, à qui grace est offerte, A cause qu’à leuer la fierte, Ce Meurtrier à force d’Amis, Est fauorablement admis,
Mais n’en faisons point tant de bruit, Puis qu’il est certain que la Seyne, Dans l’vne ny dans l’autre plaine, Prés de Rouën & de Paris, Ou tant de corps furent meurtris, Ne veid oncques rien de semblable, A ce que fait ce maistre Diable, Ie veux dire ce Loup Marin, Surnommé Iules Mazarin, Esprit ne le sçauroit comprendre. Oreille ne sçauroit l’entendre, Langue ne sçauroit l’exprimer, Et si ne sont contes en l’air, Comme l’on dit coquecigruë, Mais des veritez recogneuës, Touchant les forts qu’il nous a faits,
Lycaon onc n’eut tant de rage, Cacus ne feist pareil rauage Les Phalaris & les Nerons, A luy comparez furent bons, Puisque Neron ne pilla Rome, Comme ce Tyran nous consomme, Et s’il la brula par depit, Du sien apres il la refeit, Enfin ce fut Ieu de Ieunesse ? Mais pour cecy, par Dieu Ieune n’est-ce, Puisque Paris manque de pain, Qu’on porte tout à sainct Germain, Ou le Dragon fait sa retraitte, Sans qu’il arriue icy charrette, De ce costé là, ny batteau, Ny du costé de Loniumeau, D’où Sortent ses noires furies, Qui font par tout cent voleries, Sans qu’il espargnent Villageois, Noble Marchant Prestre ou Bourgeois, Manant passant fille, ny femme, Bauolet Damoiselle ou Dame, Dont ils font suiuant leur desir,
Cependant qui sera l’Hercule, Qui defera le monstre Iule ? Serace le Prelat du lieu ? Ha ! n’en disons mot de par Dieu, Puis qu’il est amy de la beste, Et comme elle leue la creste.
Non, ce sera vous grand Condé, De vostre vertu Secondé, Ce sera vous Prince inuincible, Prince à nos maux vrayement sensible, De nostre siecle le Cæsar, Qui vous souuenant que de Bar, Par ses Ordres vous tint en cage, Vangerés sur luy cét outrage.
Sus auancez donc hardiment, Sçachant que comme vn Regiment, Tout vn grand Peuple à vostre suitte, Marchera sous vostre conduitte, Et si vous tuez le Dragon,
FIN.
|
SubSect précédent(e)
|
Anonyme [1652], LA METAMORPHOSE DE MAZARIN, EN LA FIGVRE DV DRAGON NOSTRE-DAME. EN VERS BVRLESQVE. , françaisRéférence RIM : M0_2463. Cote locale : B_13_40.