CE jour la Cour, toutes les
Chambres assemblées, ayant
deliberé sur l’Arrest du Conseil
du jour d’hier, & Commission sur
iceluy apportée par les Gens du Roy,
Et veu leurs conclusions : A ESTÉ
arresté que tres-humbles remonstrances
par escrit seront faites au Roy & à
la Reyne Régente, & que la deliberation
commencée le jourd’hier, sera
continüée demain. Cependant enjoint
aux Preuost des Marchans &
Escheuins de cette Ville, donner ordre
à la seureté d’icelle : Et à tous Gouverneurs,
Capitaines, Maires & Escheuins
des Villes, Ponts, Ports & passages

des environs, de laisser passer librement
les viures & danrées qui seront
destinées pour apporter en icelle : Leur
fait tres-expresses inhibitions & défenses,
& à toutes persõnes de l’empescher,
à peine d’en respondre en leurs noms.
Et sera le present Arrest à la diligence
du Procureur General, enuoyé par
toutes les Villes & lieux où besoin sera.
Enjoint à tous Officiers du Roy de
tenir la main à l’execution d’iceluy.
Faict en Parlement le vingt-troisiéme
Septembre 1648. Signé, GVYET.

Collationné à l’Original par moy Conseiller,
Secretaire du Roy & de ses Finances.