L. G. [signé] [1652], CONGRATVLATION TRES-HVMBLE A MONSEIGNEVR L’EMINENTISSIME CARDINAL DE RETZ, ARCHEVESQVE DE CORINTHE, & Coadjuteur en l’Archeuesché de Paris. SVR SA PROMOTION AV Cardinalat. , françaisRéférence RIM : M0_755. Cote locale : B_10_25.
SubSect précédent(e)

CONGRATVLATION
TRES-HVMBLE
A MONSEIGNEVR
L’EMINENTISSIME
CARDINAL
DE RETZ.
SVR SA PROMOTION
AV CARDINALAT.

MONSEIGNEVR,

Les Honneurs & les Dignitez
ne sont pas seulement des faueurs de la Fortune ;
La sagesse Eternelle en Couronne la vertu, & le
merite au gré de ses volontez adorables, & quoy
que la veritable gloire soit dans la suitte des belles

-- 4 --

actions plustot qu’à vne esleuation casuëlle,
il faut aduoüer que lors que la iustice & la valeur
s’accordent a donner, & receuoir les preeminences
supresmes, tous les cœurs équitables, & iudicieux
doiuent benir le Seigneur, & remercier
sa bonté, de ceste distribution des Graces, C’est
aussi, MONSEIGNEVR, ce que nous faisons
auec ferueur, & zele, a ceste tres heureuse
& Triomphante Promotion de vostre Eminence,
puis quelle nous promet des prosperitez, & benedictions
abondantes. Et comme vous estes
le premier nommé sur le reste des Nations, &
que toutes les vertus, les sciences, les pietés &
la Politesse se rencontrent auec vn ordre magnifiqne,
en vostre Tres-Illustre personne, nous
pouuons esperer delà le bon-heur de nos jours,
la Paix de la France, & l’aduantage de la Monarchie ;
Et i’ose dire que iamais la pourpre ne fut
plus esclatante qu’elle nous paroist. Il est vray
MONSEIGNEVR, que les Decrets de sa
Saincteté, apres nos venerations ont attiré nos
acclamations, & nos vœux, si zelés en recognoissance
de ces legitimes faueurs, qu’il est
aisé de faire voir par nos transports la passion
extréme que nous auons pour vostre seruice.

 

MONSEIGNEVR, ceste qualité Eminente
de Cardinal, & Prince de l’Eglise, est d’vne
si haûte estime, & consideration parmy les Chrestiens
Catholiques, que nul ne se doit deffendre

-- 5 --

de l’honorer s’il ne veut encourir l’indignation
du Tout-Puissant ; Ce sont les Cardinaux qui
créent les Papes, & ce Pere Vniuersel des Fidelles
a qui les Roys deferent & rendent des homages
de submission & de dependance, est le
Lieutenant & Vicaire de Dieu, absolu icy bas,
nostre Dieu Visible, le dispensateur de la Misericorde
Céleste, & celuy qui nous ouure la porte
de sa beatitude. Et autant qu’il y a de difference
des grandeurs Temporelles auec les Eternelles,
il y en a des Princes Terriens aux Princes de
l’Eglise. Et joindre à ce brillant Romain la Doctrine,
l’Eloquence, la generosité, la courtoisie
affable, la conduitte pieuse, & les habitudes charitables ;
c’est encherir sur les Baronius, les Bellarmins,
les Borromées, les du Perrons, & tous les
autres flambeaux qui vous ont communiquez
leurs lumieres, & laissé vne place Eminente dans
ce Catalogue Precieux, qui par vn esguillon de
gloire essentielle veut exiger de vos nobles pensées
vne meditatino efficace, pour trouuer quelque
voye de Paix & d’accõmodement aux mal heurs
qui nous accueillent. Vostre Eminence sera se
Soleil rayonnant qui doit dissiper les nuages qui
nous offusquent. Et puis qu’il faut le torrent de
vostre Eloquence pour change les volontez abusées,
& apprendre le deuoir à ceux qui l’ignorent :
I’espere que celuy qui vous a perfectioné

-- 6 --

de tant de dons vous donnera encore ceste force
magnanime pour operer les effets de ces ordres
Souuerains.

 

MONSEIGNEVR, vos vertus sont Cardinalles,
puissantes & augustes, & comme telles
elles seruiront d’apuy à la Monarchie & de conseil
des-interressé à l’Estat & Diademe Royal,
leurs Majestez ont voulu & souhaité que la France
fut honnorée par l’esclat de vostre Eminence, &
que le Siecle fit voir à la posterité se qu’il possede
d’excellent & d’admirable, & que le Ciel a fauorablement
destiné pour la consolation de ceux
qui gemissent dans les horreurs d’vne affreuse
souffrance, MONSEIGNEVR, quoy que
les dissentions des grands soit assez ordinaires
dans toutes les Histoires, & que l’ambition & la
flaterie des monstres de la Cour soit des Conseillers
hardis & mal faisans contre les Peuples, nous
ne laissons pas d’esperer adoucissement dans nos
ennuis & la tranquilité à nos ames. Ouy, MONSEIGNEVR,
ces animositez sanglantes, si
criminelle deuant se Dieu de Paix & d’amour, seront
bannies de nostre commerce. Nous voicy
dans le temps que sa bonté à voulu souffrir pour
la reconciliation du Genre humain, a l’exemple
de sa clemence : [1 mot ill. ] me persuade que vostre Eminence
trauaillera pour le salut public, vous serez
nostre Prince & Protecteur de Paix, le mediateur

-- 7 --

entre le Roy & ses Sujets, & d’vn employ si venerable,
suiuy d’vn succez aduantageux, vous
arriuerez au comble de ces contentements esleuez
& durables, que ie vous souhaitte auec humilité
& respect en qualité,

 

MONSEIGNEVR,

De vostre Eminence,

Le tres-humble & tres-obeïssant
Seruiteur, L. G.

-- 8 --

SubSect précédent(e)


L. G. [signé] [1652], CONGRATVLATION TRES-HVMBLE A MONSEIGNEVR L’EMINENTISSIME CARDINAL DE RETZ, ARCHEVESQVE DE CORINTHE, & Coadjuteur en l’Archeuesché de Paris. SVR SA PROMOTION AV Cardinalat. , françaisRéférence RIM : M0_755. Cote locale : B_10_25.